Wasiiye le kabiir al-khannaayiin : Mazmuur le Dawuud
1 Khalli Allah yurudd leek fi yoom al-diige
wa khalli usum Ilaah Yaakhuub yahfadak !
2 Wa khalli yirassil leek fazaʼ min al-bakaan al-mukhaddas
wa min Sahyuun, khalli yisaaʼidak.
3 Wa khalli yichiif kulla hadaayaak
wa yarda be dahaayaak. Wagfa.
4 Khalli yantiik al-galbak bidoorah
wa khalli yihaggig kulla munaak.
5 Wa khalaas, aniina niragrugu min al-farah
fi chaan najaatak.
Wa narfaʼo al-raaye be usum Ilaahna
wa khalli Allah yihaggig kulla talabaatak.
6 Wa hassaʼ naʼarif kadar Allah yinajji al-malik
al-hu masahah wa darrajah
wa yurudd leyah
min bakaanah al-mukhaddas fi l-samaawaat
be fazaʼ zeenaaytah al-gawiiye.
7 Al-waahidiin yitwakkalo
ale arabaathum hana l-harib
wa l-aakhariin ale kheelhum.
Wa laakin aniina kamaan,
nitwakkalo ale usum Allah Ilaahna
wa hu bas al-ninaaduuh.
8 Wa humman yidanguru wa yagaʼo
wa laakin aniina nagiifu be tuulna wa nasbutu.
9 Ya Allah ! Najji al-malik
wa rudd leena yoom ninaaduuk !
وَصِيَّةْ لِكَبِيرْ الْغَنَّايِينْ: مَزْمُورْ لِدَاوُدْ
1 خَلِّي اللّٰهْ يُرُدّ لَيْك فِي يَوْم الضِّيقَةْ
وَ خَلِّي أُسُمْ إِلٰـهْ يَعْقُوبْ يَحْفَضَكْ!
2 وَ خَلِّي يِرَسِّلْ لَيْك فَزَعْ مِنْ الْبَكَانْ الْمُقَدَّسْ
وَ مِنْ صَهْيُون، خَلِّي يِسَاعِدَكْ.
3 وَ خَلِّي يِشِيفْ كُلَّ هَدَايَاكْ
وَ يَرْضَى بِضَحَايَاكْ. وَقْفَةْ.
4 خَلِّي يَنْطِيكْ الْقَلْبَكْ بِدَوْرَهْ
وَ خَلِّي يِحَقِّقْ كُلَّ مُنَاكْ.
5 وَ خَلَاصْ، أَنِحْنَ نِرَقْرُقُوا مِنْ الْفَرَحْ
فِي شَانْ نَجَاتَكْ.
وَ نَرْفَعَوْا الرَّايَةْ بِأُسُمْ إِلٰـهْنَا
وَ خَلِّي اللّٰهْ يِحَقِّقْ كُلَّ طَلَبَاتَكْ.
6 وَ هَسَّعْ نَعَرِفْ كَدَرْ اللّٰهْ يِنَجِّي الْمَلِكْ
الْهُو مَسَحَهْ وَ دَرَّجَهْ
وَ يُرُدّ لَيَّهْ
مِنْ بَكَانَهْ الْمُقَدَّسْ فِي السَّمَاوَاتْ
بِفَزَعْ زَيْنَايْتَهْ الْقَوِيَّةْ.
7 الْوَاحِدِينْ يِتْوَكَّلَوْا
عَلَيْ عَرَبَاتْهُمْ هَنَا الْحَرِبْ
وَ الْآخَرِينْ عَلَيْ خَيْلهُمْ.
وَ لَاكِنْ أَنِحْنَ كَمَانْ،
نِتْوَكَّلَوْا عَلَيْ أُسُمْ اللّٰهْ إِلٰـهْنَا
وَ هُو بَسْ النِّنَادُوهْ.
8 وَ هُمَّنْ يِدَنْقُرُوا وَ يَقَعَوْا
وَ لَاكِنْ أَنِحْنَ نَقِيفُوا بِطُولْنَا وَ نَثْبُتُوا.
9 يَا اللّٰهْ! نَجِّي الْمَلِكْ
وَ رُدّ لَيْنَا يَوْم نِنَادُوكْ!
