Wasiiye le kabiir al-khannaayiin : Mazmuur le Dawuud
1 Ya Allah ! Al-malik yafrah be gudurtak
wa be najaatak, yinbasit ziyaada !
2 Inta tammeet leyah muna galbah
wa wakit hu talab minnak kula,
inta ma abeet leyah. Wagfa.
3 Achaan inta garrabt leyah
wa anteetah baraka wa kheer
wa khatteet fi raasah taaj hana dahab saafi.
4 Hu dawwar minnak al-haya
wa inta anteetha leyah
wa sawweet ayyaamah tuwaal ila l-abad.
5 Charafah bigi kabiir be sabab najaatak
wa labbastah majd wa azama.
6 Achaan sawweetah baraka ila l-abad
wa fi hadaratak, yafrah farah kabiir.
7 Al-malik yitwakkal ale Allah.
Aywa, be rahmat al-Aali, abadan ma yittartaʼ.
8 Ya Rabb ! Iidak talhag kulla udwaanak
wa iidak al-zeene talhag al-yakrahook.
9 Tisawwiihum yabgo misil naar muhriga
yoom tibayyin wijhak leehum.
Wa be khadabak, ya Allah, tidammirhum
wa l-naar taakulhum.
10 Tuguchch iyaalhum min al-ard
wa zurriiyithum min been al-naas.
11 Wa kan yidooru yisawwu leek cheyy fasil
walla yilʼaamaro diddak kula,
ma yagdaro.
12 Achaan inta tatrudhum
wa be nachaachiibak, tadrubhum.
13 Ya Allah ! Gumm be kulla gudurtak !
Aniina nikhannu khuwwatak be chiʼir !
وَصِيَّةْ لِكَبِيرْ الْغَنَّايِينْ: مَزْمُورْ لِدَاوُدْ
1 يَا اللّٰهْ! الْمَلِكْ يَفْرَحْ بِقُدُرْتَكْ
وَ بِنَجَاتَكْ، يِنْبَسِطْ زِيَادَةْ!
2 إِنْتَ تَمَّيْت لَيَّهْ مُنَى قَلْبَهْ
وَ وَكِتْ هُو طَلَبْ مِنَّكْ كُلَ،
إِنْتَ مَا أَبَيْت لَيَّهْ. وَقْفَةْ.
3 أَشَانْ إِنْتَ قَرَّبْت لَيَّهْ
وَ أَنْطَيْتَهْ بَرَكَةْ وَ خَيْر
وَ خَطَّيْت فِي رَاسَهْ تَاجْ هَنَا دَهَبْ صَافِي.
4 هُو دَوَّرْ مِنَّكْ الْحَيَاةْ
وَ إِنْتَ أَنْطَيْتهَا لَيَّهْ
وَ سَوَّيْت أَيَّامَهْ طُوَالْ إِلَى الْأَبَدْ.
5 شَرَفَهْ بِقِي كَبِيرْ بِسَبَبْ نَجَاتَكْ
وَ لَبَّسْتَهْ مَجْد وَ عَظَمَةْ.
6 أَشَانْ سَوَّيْتَهْ بَرَكَةْ إِلَى الْأَبَدْ
وَ فِي حَضَرَتَكْ، يَفْرَحْ فَرَحْ كَبِيرْ.
7 الْمَلِكْ يِتْوَكَّلْ عَلَيْ اللّٰهْ.
أَيْوَى، بِرَحْمَةْ الْعَالِي، أَبَداً مَا يِتَّرْتَعْ.
8 يَا رَبّ! إِيدَكْ تَلْحَقْ كُلَّ عُدْوَانَكْ
وَ إِيدَكْ الزَّيْنَةْ تَلْحَقْ الْيَكْرَهَوْك.
9 تِسَوِّيهُمْ يَبْقَوْا مِثِلْ نَارْ مُحْرِقَةْ
يَوْم تِبَيِّنْ وِجْهَكْ لَيْهُمْ.
وَ بِغَضَبَكْ، يَا اللّٰهْ، تِدَمِّرْهُمْ
وَ النَّارْ تَاكُلْهُمْ.
10 تُقُشّ عِيَالْهُمْ مِنْ الْأَرْض
وَ ذُرِّيِّتْهُمْ مِنْ بَيْن النَّاسْ.
11 وَ كَنْ يِدَوْرُوا يِسَوُّوا لَيْك شَيّءْ فَسِلْ
وَلَّا يِلآمَرَوْا ضِدَّكْ كُلَ،
مَا يَقْدَرَوْا.
12 أَشَانْ إِنْتَ تَطْرُدْهُمْ
وَ بِنَشَاشِيبَكْ، تَضْرُبْهُمْ.
13 يَا اللّٰهْ! قُمّ بِكُلَّ قُدُرْتَكْ!
أَنِحْنَ نِغَنُّوا قُوَّتَكْ بِشِعِرْ!
