Le Dawuud
1 Allah hu nuuri wa najaati,
ana nakhaaf min yaatu ?
Allah hu maljaʼ le hayaati,
giddaam yaatu ana narjif ?
2 Wakit al-fasliin yigarrubu leyi le yaakuluuni,
humman bas khusmaani wa udwaani
al-yittartaʼo wa yagaʼo.
3 Wa kan deech ja wa gamma diddi,
ana ma nakhaaf min cheyy.
Wa hatta kan al-harib gamma kula,
ana indi amaan.
4 Ana saʼalt min Allah cheyy waahid,
cheyy al-nakurbah gawi wa daahu.
Ana naskun fi beet Allah
fi muddit kulla hayaati
le nichiif jamaal Allah
wa naʼabudah fi beetah.
5 Achaan hu yahfadni fi maskanah
fi yoom al-fasaala.
Wa yilabbidni fi kheemtah
wa yarfaʼni foog fi bakaan al-amaan.
6 Wa hassaʼ raasi marfuuʼ
giddaam udwaani al-muhawwigiinni.
Wa ana nadbah dahiiye fi kheemtah be zakhraat
wa nikhanni wa namdah Allah.
7 Ya Allah ! Asmaʼ hiss munaadaati
wa arhamni wa rudd leyi.
8 Wa nifakkir fi kalaamak al-buguul :
«Wajjuhu le Allah.»
Wa ana niwajjih aleek, ya Allah.
9 Ma tadharni min giddaamak
wa ma tatrudni ana abdak be khadab
achaan inta bas fazaʼi.
Ma taabaani wa ma tikhalliini,
ya Ilaahi, inta al-tinajjiini.
10 Hatta kan ammi wa abuuyi khallooni kula,
Allah khibilni.
11 Ya Allah, wassifni derbak
wa guudni fi derib al-adaala
achaan indi udwaan.
12 Ma tisallimni le khusmaani
achaan chahado foogi be kidib
wa hajjo be unuf.
13 Aywa, akiid nichiif kheer Allah
fi ard al-hayyiin.
14 Khutt achamak fi Allah
wa abga chadiid wa fahal.
Aywa, khutt achamak fi Allah.
لِدَاوُدْ
1 اللّٰهْ هُو نُورِي وَ نَجَاتِي،
أَنَا نَخَافْ مِنْ يَاتُو؟
اللّٰهْ هُو مَلْجَأْ لِحَيَاتِي،
قِدَّامْ يَاتُو أَنَا نَرْجِفْ؟
2 وَكِتْ الْفَسْلِينْ يِقَرُّبُوا لَيِّ لِيَاكُلُونِي،
هُمَّنْ بَسْ خُصْمَانِي وَ عُدْوَانِي
الْيِتَّرْتَعَوْا وَ يَقَعَوْا.
3 وَ كَنْ دَيْش جَاءْ وَ قَمَّ ضِدِّي،
أَنَا مَا نَخَافْ مِنْ شَيّءْ.
وَ حَتَّى كَنْ الْحَرِبْ قَمَّ كُلَ،
أَنَا عِنْدِي أَمَانْ.
4 أَنَا سَأَلْت مِنْ اللّٰهْ شَيّءْ وَاحِدْ،
شَيّءْ النَّكُرْبَهْ قَوِي وَ دَاهُو.
أَنَا نَسْكُنْ فِي بَيْت اللّٰهْ
فِي مُدَّةْ كُلَّ حَيَاتِي
لِنِشِيفْ جَمَالْ اللّٰهْ
وَ نَعَبُدَهْ فِي بَيْتَهْ.
5 أَشَانْ هُو يَحْفَضْنِي فِي مَسْكَنَهْ
فِي يَوْم الْفَسَالَةْ.
وَ يِلَبِّدْنِي فِي خَيْمِتَهْ
وَ يَرْفَعْنِي فَوْق فِي بَكَانْ الْأَمَانْ.
6 وَ هَسَّعْ رَاسِي مَرْفُوعْ
قِدَّامْ عُدْوَانِي الْمُحَوِّقِينِّي.
وَ أَنَا نَدْبَحْ ضَحِيَّةْ فِي خَيْمِتَهْ بِزَغْرَاطْ
وَ نِغَنِّي وَ نَمْدَحْ اللّٰهْ.
7 يَا اللّٰهْ! أَسْمَعْ حِسّ مُنَادَاتِي
وَ أَرْحَمْنِي وَ رُدّ لَيِّ.
8 وَ نِفَكِّرْ فِي كَلَامَكْ الْبُقُولْ:
«وَجُّهُوا لِلّٰهْ.»
وَ أَنَا نِوَجِّهْ عَلَيْك، يَا اللّٰهْ.
9 مَا تَدْحَرْنِي مِنْ قِدَّامَكْ
وَ مَا تَطْرُدْنِي أَنَا عَبْدَكْ بِغَضَبْ
أَشَانْ إِنْتَ بَسْ فَزَعِي.
مَا تَابَانِي وَ مَا تِخَلِّينِي،
يَا إِلٰـهِي، إِنْتَ التِّنَجِّينِي.
10 حَتَّى كَنْ أَمِّي وَ أَبُويِ خَلَّوْنِي كُلَ،
اللّٰهْ قِبِلْنِي.
11 يَا اللّٰهْ، وَصِّفْنِي دَرْبَكْ
وَ قُودْنِي فِي دَرِبْ الْعَدَالَةْ
أَشَانْ عِنْدِي عُدْوَانْ.
12 مَا تِسَلِّمْنِي لِخُصْمَانِي
أَشَانْ شَهَدَوْا فَوْقِي بِكِدِبْ
وَ حَجَّوْا بِعُنُفْ.
13 أَيْوَى، أَكِيدْ نِشِيفْ خَيْر اللّٰهْ
فِي أَرْض الْحَيِّينْ.
14 خُطّ عَشَمَكْ فِي اللّٰهْ
وَ أَبْقَى شَدِيدْ وَ فَحَلْ.
أَيْوَى، خُطّ عَشَمَكْ فِي اللّٰهْ.
