Wasiiye le kabiir al-khannaayiin : Le yikhannuuh hasab al-hiss al-binaaduuh «Nuwwaar al-sitteeb», taʼliim min awlaad Khuurah, khine hana mahabba
1 Galbi anmala be kalaam jamiil
wa ana gult chiʼir wa azzamt al-malik.
Wa khalli lisaani yabga misil khalam
hana kaatib mutakhassis.
2 Ya l-malik ! Inta jamiil min kulla rujaal
wa khachmak yuguul daayman kalaam halu.
Fi chaan da, al-Rabb baarakak ila l-abad.
3 Arbut seefak fi sulbak, ya l-faaris !
Aywa, alhazzam be charafak wa azamatak.
4 Wa be azamatak, arkab juwaadak
wa annasir be sabab al-hagg
wa l-adaala wa l-tawaaduʼ !
Wa be iidak al-zeene,
tisawwi achya yikhawwufu !
5 Nachaachiibak turaan,
yatʼano udwaan al-malik fi guluubhum.
Aywa, tihtak yagaʼo chuʼuub.
6 Ya Ilaahi ! Archak gaaʼid ila l-abad
wa asaat mulkak, hi asaat adaala.
7 Inta tihibb al-adaala
wa takrah al-zulum.
Achaan da, al-Rabb Ilaahak azalak inta bas min rufgaanak
wa masahak be dihin al-suruur.
8 Wa khulgaanak mudakhkhaniin
be sandal wa uud al-gamaari wa irig.
Wa min buyuut mujammaliin be l-aaj,
yaji hiss al-musiikha al-yifarrihak.
9 Banaat al-muluuk gaaʼidaat jambak,
laabsaat ziintak
wa l-malika waagfe be zeenaaytak,
laabse dahab saafi min Ufiir.
10 Asmaʼe, ya bineeyit al-malik !
Chiifi wa khutti adaanki !
Anse chaʼabki wa aayilitki.
11 Al-malik yihibb jamaalki.
Aburki giddaamah achaan hu siidki.
12 Ya bitt madiinat Suur,
al-khaniyiin min al-chaʼab
yijiibu leeki hadaaya
achaan yalgo ridaaki.
13 Khalaas be kulla azama,
bitt al-malik dakhalat,
laabse khalagha al-mudahhab.
14 Waddooha le l-malik
laabse khulgaanha al-mulawwaniin.
Wa rafiigaatha al-taabʼaatha,
waddoohin leek inta, ya l-malik.
15 Waddoohin be farah wa suruur
wa dakhalan fi gasir al-malik.
16 Awlaadak yibaddulu abbahaatak
wa inta tukhuttuhum hukkaam fi kulla l-balad.
17 Wa ana nizzakkar usmak
min zurriiye le zurriiye.
Wa be da, al-chaʼab yachkuruuk
daayman wa ila l-abad.
وَصِيَّةْ لِكَبِيرْ الْغَنَّايِينْ: لِيِغَنُّوهْ حَسَبْ الْحِسّ الْبِنَادُوهْ «نُوَّارْ السِّتَّيْب»، تَعْلِيمْ مِنْ أَوْلَادْ قُورَحْ، غِنَيْ هَنَا مَحَبَّةْ
1 قَلْبِي أَنْمَلَى بِكَلَامْ جَمِيلْ
وَ أَنَا قُلْت شِعِرْ وَ عَظَّمْت الْمَلِكْ.
وَ خَلِّي لِسَانِي يَبْقَى مِثِلْ قَلَمْ
هَنَا كَاتِبْ مُتَخَصِّصْ.
2 يَا الْمَلِكْ! إِنْتَ جَمِيلْ مِنْ كُلَّ رُجَالْ
وَ خَشْمَكْ يُقُولْ دَايْماً كَلَامْ حَلُو.
فِي شَانْ دَا، الرَّبّ بَارَكَكْ إِلَى الْأَبَدْ.
3 أَرْبُطْ سَيْفَكْ فِي صُلْبَكْ، يَا الْفَارِسْ!
أَيْوَى، أَلْحَزَّمْ بِشَرَفَكْ وَ عَظَمَتَكْ.
4 وَ بِعَظَمَتَكْ، أَرْكَبْ جُوَادَكْ
وَ أَنَّصِرْ بِسَبَبْ الْحَقّ
وَ الْعَدَالَةْ وَ التَّوَاضُعْ!
وَ بِإِيدَكْ الزَّيْنَةْ،
تِسَوِّي أَشْيَاءْ يِخَوُّفُوا!
5 نَشَاشِيبَكْ طُرَانْ،
يَطْعَنَوْا عُدْوَانْ الْمَلِكْ فِي قُلُوبْهُمْ.
أَيْوَى، تِحْتَكْ يَقَعَوْا شُعُوبْ.
6 يَا إِلٰـهِي! عَرْشَكْ قَاعِدْ إِلَى الْأَبَدْ
وَ عَصَاةْ مُلْكَكْ، هِي عَصَاةْ عَدَالَةْ.
7 إِنْتَ تِحِبّ الْعَدَالَةْ
وَ تَكْرَهْ الظُّلُمْ.
أَشَانْ دَا، الرَّبّ إِلٰـهَكْ عَزَلَكْ إِنْتَ بَسْ مِنْ رُفْقَانَكْ
وَ مَسَحَكْ بِدِهِنْ السُّرُورْ.
8 وَ خُلْقَانَكْ مُدَخَّنِينْ
بِصَنْدَلْ وَ عُودْ الْقَمَارِيْ وَ عِرِقْ.
وَ مِنْ بُيُوتْ مُجَمَّلِينْ بِالْعَاجْ،
يَجِي حِسّ الْمُسِيقَى الْيِفَرِّحَكْ.
9 بَنَاتْ الْمُلُوكْ قَاعِدَاتْ جَنْبَكْ،
لَابْسَاتْ زِينْتَكْ
وَ الْمَلِكَةْ وَاقْفَةْ بِزَيْنَايْتَكْ،
لَابْسَةْ دَهَبْ صَافِي مِنْ أُفِيرْ.
10 أَسْمَعَيْ، يَا بِنَيَّةْ الْمَلِكْ!
شِيفِي وَ خُطِّي أَدَانْكِ!
أَنْسَيْ شَعَبْكِ وَ عَايِلِتْكِ.
11 الْمَلِكْ يِحِبّ جَمَالْكِ.
أَبُرْكِي قِدَّامَهْ أَشَانْ هُو سِيدْكِ.
12 يَا بِنْت مَدِينَةْ صُورْ،
الْغَنِيِّينْ مِنْ الشَّعَبْ
يِجِيبُوا لَيْكِ هَدَايَا
أَشَانْ يَلْقَوْا رِضَاكِ.
13 خَلَاصْ بِكُلَّ عَظَمَةْ،
بِنْت الْمَلِكْ دَخَلَتْ،
لَابْسَةْ خَلَقْهَا الْمُدَهَّبْ.
14 وَدَّوْهَا لِلْمَلِكْ
لَابْسَةْ خُلْقَانْهَا الْمُلَوَّنِينْ.
وَ رَفِيقَاتْهَا التَّابْعَاتْهَا،
وَدَّوْهِنْ لَيْك إِنْتَ، يَا الْمَلِكْ.
15 وَدَّوْهِنْ بِفَرَحْ وَ سُرُورْ
وَ دَخَلَنْ فِي قَصِرْ الْمَلِكْ.
16 أَوْلَادَكْ يِبَدُّلُوا أَبَّهَاتَكْ
وَ إِنْتَ تُخُطُّهُمْ حُكَّامْ فِي كُلَّ الْبَلَدْ.
17 وَ أَنَا نِذَّكَّرْ أُسْمَكْ
مِنْ ذُرِّيَّةْ لِذُرِّيَّةْ.
وَ بَيْدَا، الشَّعَبْ يَشْكُرُوكْ
دَايْماً وَ إِلَى الْأَبَدْ.
