Wasiiye le kabiir al-khannaayiin : Le yikhannuuh hasab al-hiss al-binaaduuh «Gimriiye al-baʼiide wa ma tinsamiʼ.» Chiʼir le Dawuud, wakit al-Filistiyiin karabooh fi hillit Gaat
1 Ya Rabb, hinn foogi !
Achaan al-naas gaaʼidiin yitaaruduuni
wa kulla yoom yihaarubuuni wa yazulmuuni.
2 Wa daayman udwaani gaaʼidiin yitaaruduuni
wa humman katiiriin al-yihaarubuuni be istikbaar.
3 Wa laakin yoom ana khaayif,
nitwakkal aleek.
4 Ana nachkur al-Rabb,
aywa, nachkurah fi chaan kalaamah
wa ana nitwakkal aleyah wa ma khaayif.
Al-insaan yagdar yisawwi leyi chunu ?
5 Wa kulla yoom yajrahooni be kalaamhum
wa yifakkuru foogi illa be l-fasaala.
6 Yakursu leyi le yaktuluuni
wa yiraakhubu khatwaati
le yichiilu hayaati.
7 Wa baʼad kulla l-fasaala dool, yanjo walla ?
Ya Rabb, anzil khadabak foog al-chaʼab dool !
8 Wa inta hasabt khatwaati wakit ana aayir
wa lammeet dumuuʼi fi girbitak.
Wa da kulla ke
ma maktuub fi kitaabak walla ?
9 Wa khalaas yoom ana ninaadiik,
udwaani yikhalluuni.
Wa ana naʼarfah
kadar al-Rabb, hu maʼaayi.
10 Nachkur al-Rabb fi chaan kalaamah,
aywa, nachkur Allah fi chaan kalaamah.
11 Ana nitwakkal ale l-Rabb wa ma khaayif.
Al-insaan yagdar yisawwi leyi chunu ?
12 Ya Rabb ! Waajib nihaggig nazri
wa nigaddim leek dahaaya chukur.
13 Achaan inta najjeet nafsi min al-moot
wa rijileeni min al-tartaʼaan
achaan nuruukh giddaam al-Rabb
fi l-nuur al-yanti al-haya.
وَصِيَّةْ لِكَبِيرْ الْغَنَّايِينْ: لِيِغَنُّوهْ حَسَبْ الْحِسّ الْبِنَادُوهْ «قِمْرِيَّةْ الْبَعِيدَةْ وَ مَا تِنْسَمِعْ.» شِعِرْ لِدَاوُدْ، وَكِتْ الْفِلِسْطِيِّينْ كَرَبَوْه فِي حِلَّةْ قَاتْ
1 يَا رَبّ، حِنّ فَوْقِي!
أَشَانْ النَّاسْ قَاعِدِينْ يِطَارُدُونِي
وَ كُلَّ يَوْم يِحَارُبُونِي وَ يَظُلْمُونِي.
2 وَ دَايْماً عُدْوَانِي قَاعِدِينْ يِطَارُدُونِي
وَ هُمَّنْ كَتِيرِينْ الْيِحَارُبُونِي بِإِسْتِكْبَارْ.
3 وَ لَاكِنْ يَوْم أَنَا خَايِفْ،
نِتْوَكَّلْ عَلَيْك.
4 أَنَا نَشْكُرْ الرَّبّ،
أَيْوَى، نَشْكُرَهْ فِي شَانْ كَلَامَهْ
وَ أَنَا نِتْوَكَّلْ عَلَيَّهْ وَ مَا خَايِفْ.
الْإِنْسَانْ يَقْدَرْ يِسَوِّي لَيِّ شُنُو؟
5 وَ كُلَّ يَوْم يَجْرَحَوْنِي بِكَلَامْهُمْ
وَ يِفَكُّرُوا فَوْقِي إِلَّا بِالْفَسَالَةْ.
6 يَكُرْسُوا لَيِّ لِيَكْتُلُونِي
وَ يِرَاقُبُوا خَطْوَاتِي
لِيِشِيلُوا حَيَاتِي.
7 وَ بَعَدْ كُلَّ الْفَسَالَةْ دَوْل، يَنْجَوْا وَلَّا؟
يَا رَبّ، أَنْزِلْ غَضَبَكْ فَوْق الشَّعَبْ دَوْل!
8 وَ إِنْتَ حَسَبْت خَطْوَاتِي وَكِتْ أَنَا عَايِرْ
وَ لَمَّيْت دُمُوعِي فِي قِرْبِتَكْ.
وَ دَا كُلَّ كَيْ
مَا مَكْتُوبْ فِي كِتَابَكْ وَلَّا؟
9 وَ خَلَاصْ يَوْم أَنَا نِنَادِيكْ،
عُدْوَانِي يِخَلُّونِي.
وَ أَنَا نَعَرْفَهْ
كَدَرْ الرَّبّ، هُو مَعَايِ.
10 نَشْكُرْ الرَّبّ فِي شَانْ كَلَامَهْ،
أَيْوَى، نَشْكُرْ اللّٰهْ فِي شَانْ كَلَامَهْ.
11 أَنَا نِتْوَكَّلْ عَلَيْ الرَّبّ وَ مَا خَايِفْ.
الْإِنْسَانْ يَقْدَرْ يِسَوِّي لَيِّ شُنُو؟
12 يَا رَبّ! وَاجِبْ نِحَقِّقْ نَذْرِي
وَ نِقَدِّمْ لَيْك ضَحَايَا شُكُرْ.
13 أَشَانْ إِنْتَ نَجَّيْت نَفْسِي مِنْ الْمَوْت
وَ رِجِلَيْنِي مِنْ التَّرْتَعَانْ
أَشَانْ نُرُوغْ قِدَّامْ الرَّبّ
فِي النُّورْ الْيَنْطِي الْحَيَاةْ.
