Wasiiye le kabiir al-khannaayiin : Le yikhannuuh hasab al-hiss al-binaaduuh «Ma tidammir.» Chiʼir le Dawuud, wakit dakhal fi l-karkuur muʼarrid min Chaawuul
1 Hinn foogi, ya Rabb, hinn foogi !
Leek inta, ana naljaʼ.
Aywa, tihit janaaheek ana naljaʼ
lahaddi yufuut al-damaar.
2 Ninaadi al-Rabb al-Aali,
al-Ilaah al-yisawwi leyi al-kheer.
3 Wa min al-sama, yirassil leyi al-naja
wakit al-yidaayigni gaaʼid yitaaridni. Wagfa.
Khalli al-Rabb yirassil leyi
rahmatah wa amaanah.
4 Ana raagid fi ust al-naas
al-misil diidaan al-yaakulu al-insaan.
Sunuunhum misil huraab wa nachaachiib
wa lisaanhum misil seef tariin.
5 Ya Rabb ! Wassif azamatak fi l-sama
wa wassif majdak fi kulla l-ard.
6 Humman kajjo charakhum leyi
wa gariib nagaʼ foogah.
Wa hafaro nugra giddaami
laakin humman zaathum wagaʼo foogha. Wagfa.
7 Ya Rabb ! Galbi saabit
aywa, galbi saabit.
Ana nikhanni leek
wa namdahak, ya Allah !
8 Ya nafsi,
agoodi waaʼiye !
Ya amsibeybe wa l-jigindiiye,
agoodu waaʼiyiin !
Ana niwaʼʼi al-chagaag !
9 Ya Rabb ! Ana nachkurak fi ust al-chuʼuub
wa namdahak fi ust al-umam.
10 Achaan rahmatak kabiire fi l-sama
wa amaanak lihig lahaddi l-sahaab.
11 Inta aali fi l-sama, ya Rabb,
wa khalli majdak yukuun fi kulla l-ard.
وَصِيَّةْ لِكَبِيرْ الْغَنَّايِينْ: لِيِغَنُّوهْ حَسَبْ الْحِسّ الْبِنَادُوهْ «مَا تِدَمِّرْ.» شِعِرْ لِدَاوُدْ، وَكِتْ دَخَلْ فِي الْكَرْكُورْ مُعَرِّدْ مِنْ شَاوُولْ
1 حِنّ فَوْقِي، يَا رَبّ، حِنّ فَوْقِي!
لَيْك إِنْتَ، أَنَا نَلْجَأْ.
أَيْوَى، تِحِتْ جَنَاحَيْك أَنَا نَلْجَأْ
لَحَدِّي يُفُوتْ الدَّمَارْ.
2 نِنَادِي الرَّبّ الْعَالِي،
الْإِلٰـهْ الْيِسَوِّي لَيِّ الْخَيْر.
3 وَ مِنْ السَّمَاءْ، يِرَسِّلْ لَيِّ النَّجَاةْ
وَكِتْ الْيِضَايِقْنِي قَاعِدْ يِطَارِدْنِي. وَقْفَةْ.
خَلِّي الرَّبّ يِرَسِّلْ لَيِّ
رَحْمَتَهْ وَ أَمَانَهْ.
4 أَنَا رَاقِدْ فِي أُسْط النَّاسْ
الْمِثِلْ دِيدَانْ الْيَاكُلُوا الْإِنْسَانْ.
سُنُونْهُمْ مِثِلْ حُرَابْ وَ نَشَاشِيبْ
وَ لِسَانْهُمْ مِثِلْ سَيْف طَرِينْ.
5 يَا رَبّ! وَصِّفْ عَظَمَتَكْ فِي السَّمَاءْ
وَ وَصِّفْ مَجْدَكْ فِي كُلَّ الْأَرْض.
6 هُمَّنْ كَجَّوْا شَرَكْهُمْ لَيِّ
وَ قَرِيبْ نَقَعْ فَوْقَهْ.
وَ حَفَرَوْا نُقْرَةْ قِدَّامِي
لَاكِنْ هُمَّنْ ذَاتْهُمْ وَقَعَوْا فَوْقهَا. وَقْفَةْ.
7 يَا رَبّ! قَلْبِي ثَابِتْ
أَيْوَى، قَلْبِي ثَابِتْ.
أَنَا نِغَنِّي لَيْك
وَ نَمْدَحَكْ، يَا اللّٰهْ!
8 يَا نَفْسِي،
أَقْعُدِي وَاعِيَةْ!
يَا أَمْ سِبَيْبَةْ وَ الْجِقِنْدِيَّةْ،
أَقْعُدُوا وَاعِيِّينْ!
أَنَا نِوَعِّي الشَّقَاقْ!
9 يَا رَبّ! أَنَا نَشْكُرَكْ فِي أُسْط الشُّعُوبْ
وَ نَمْدَحَكْ فِي أُسْط الْأُمَمْ.
10 أَشَانْ رَحْمَتَكْ كَبِيرَةْ فِي السَّمَاءْ
وَ أَمَانَكْ لِحِقْ لَحَدِّي السَّحَابْ.
11 إِنْتَ عَالِي فِي السَّمَاءْ، يَا رَبّ،
وَ خَلِّي مَجْدَكْ يُكُونْ فِي كُلَّ الْأَرْض.
