Wasiiye le kabiir al-khannaayiin : Mazmuur le Dawuud, hasab tariigat Yaduutuun
1 Ale l-Rabb, niwajjih be hudu
wa minnah hu, taji najaati.
2 Aywa, hu maljaʼi al-yinajjiini
wa maskani al-gawi
wa abadan ma nittartaʼ.
3 Le mata tugummu kulluku
diddi le tidammuruuni
misil al-durdur al-aʼwaj
wa khusuun al-zariibe al-yidaffugu ?
4 Aywa, humman achchaawaro le yarmuuni
min bakaani al-aali.
Humman yafraho be l-kidib
wa be khuchuumhum, yibaaruku.
Wa laakin fi daakhal guluubhum,
yalʼano. Wagfa.
5 Ya nafsi !
Ale l-Rabb niwajjih be hudu
wa minnah hu yaji achami.
6 Aywa, hu maljaʼi al-yinajjiini
wa maskani al-gawi
wa abadan ma nittartaʼ.
7 Min al-Rabb,
taji najaati wa charafi.
Al-Rabb hu jabali al-yahmiini
wa bakaan maljaʼi.
8 Ya l-chaʼab !
Atwakkalo aleyah fi kulla wakit
wa aftaho guluubku leyah.
Al-Rabb hu maljaʼna. Wagfa.
9 Aywa, Bani Adam zaayliin
wa l-insaan ma indah amaan.
Kan khatteethum fi l-miizaan kula,
wazinhum khafiif min al-riih.
10 Ma titwakkalo ale l-rachwa
wa ma tukhuttu achamku
fi maal al-sirge bala faayde.
Wa kan maalku yiziid kula,
ma tukhuttu guluubku foogah.
11 Al-Rabb gaal cheyy waahid
wa ana simiʼtah marrateen,
kadar al-gudra le l-Rabb wiheedah.
12 Ya Rabb, leek inta al-rahma
achaan inta bas al-tikaafi
kulla insaan hasab amalah.
وَصِيَّةْ لِكَبِيرْ الْغَنَّايِينْ: مَزْمُورْ لِدَاوُدْ، حَسَبْ طَرِيقَةْ يَدُوتُونْ
1 عَلَيْ الرَّبّ، نِوَجِّهْ بِهُدُوءْ
وَ مِنَّهْ هُو، تَجِي نَجَاتِي.
2 أَيْوَى، هُو مَلْجَئِي الْيِنَجِّينِي
وَ مَسْكَنِي الْقَوِي
وَ أَبَداً مَا نِتَّرْتَعْ.
3 لِمَتَى تُقُمُّوا كُلُّكُو
ضِدِّي لِتِدَمُّرُونِي
مِثِلْ الدُّرْدُرْ الْأَعْوَجْ
وَ غُصُونْ الزَّرِيبَةْ الْيِدَفُّقُوا؟
4 أَيْوَى، هُمَّنْ أَشَّاوَرَوْا لِيَرْمُونِي
مِنْ بَكَانِي الْعَالِي.
هُمَّنْ يَفْرَحَوْا بِالْكِدِبْ
وَ بِخُشُومْهُمْ، يِبَارُكُوا.
وَ لَاكِنْ فِي دَاخَلْ قُلُوبْهُمْ،
يَلْعَنَوْا. وَقْفَةْ.
5 يَا نَفْسِي!
عَلَيْ الرَّبّ نِوَجِّهْ بِهُدُوءْ
وَ مِنَّهْ هُو يَجِي عَشَمِي.
6 أَيْوَى، هُو مَلْجَئِي الْيِنَجِّينِي
وَ مَسْكَنِي الْقَوِي
وَ أَبَداً مَا نِتَّرْتَعْ.
7 مِنْ الرَّبّ،
تَجِي نَجَاتِي وَ شَرَفِي.
الرَّبّ هُو جَبَلِي الْيَحْمِينِي
وَ بَكَانْ مَلْجَئِي.
8 يَا الشَّعَبْ!
أَتْوَكَّلَوْا عَلَيَّهْ فِي كُلَّ وَكِتْ
وَ أَفْتَحَوْا قُلُوبْكُو لَيَّهْ.
الرَّبّ هُو مَلْجَئْنَا. وَقْفَةْ.
9 أَيْوَى، بَنِي آدَم زَايْلِينْ
وَ الْإِنْسَانْ مَا عِنْدَهْ أَمَانْ.
كَنْ خَطَّيْتهُمْ فِي الْمِيزَانْ كُلَ،
وَزِنْهُمْ خَفِيفْ مِنْ الرِّيحْ.
10 مَا تِتْوَكَّلَوْا عَلَيْ الرَّشْوَةْ
وَ مَا تُخُطُّوا عَشَمْكُو
فِي مَالْ السِّرْقَةْ بَلَا فَايْدَةْ.
وَ كَنْ مَالْكُو يِزِيدْ كُلَ،
مَا تُخُطُّوا قُلُوبْكُو فَوْقَهْ.
11 الرَّبّ قَالْ شَيّءْ وَاحِدْ
وَ أَنَا سِمِعْتَهْ مَرَّتَيْن،
كَدَرْ الْقُدْرَةْ لِلرَّبّ وِحَيْدَهْ.
12 يَا رَبّ، لَيْك إِنْتَ الرَّحْمَةْ
أَشَانْ إِنْتَ بَسْ التِّكَافِي
كُلَّ إِنْسَانْ حَسَبْ عَمَلَهْ.