Wasiiye le kabiir al-khannaayiin : Le yikhannuuh hasab al-hiss al-binaaduuh «Nuwwaar al-sitteeb», mazmuur le Dawuud
1 Ya Rabb, afzaʼni !
Achaan almi gariib yazrutni.
2 Ana wagaʼt fi wahale ma indaha hadd
wa ma nagdar namrug.
Ana wagaʼt fi almi khariig
wa l-seel chaalni.
3 Ana iyiit min al-munaada
wa halguumi yibis.
Wa uyuuni diʼfo
wakit narja Ilaahi.
4 Al-yakrahooni bala sabab,
humman aktar min suuf raasi.
Wa l-yidooru yidammuruuni,
humman chudaad.
Wa bala sabab
bigo udwaani.
Wa l-cheyy al-ana ma sirigtah,
nagdar nigabbilah walla ?
5 Ya Rabbi ! Inta taʼarif gillit fihimi
wa khataayi ma mulabbad leek.
6 Khalli al-yukhuttu achamhum foogak
ma yalgo ayyi eeb be sababi,
ya Allah al-Rabb al-Gaadir !
Wa khalli al-yifattuchuuk
ma yakhjalo be sababi,
ya Ilaah Bani Israaʼiil !
7 Wa fi chaanak inta,
nahmal al-muʼyaar.
Wa fi chaanak inta,
al-eeb yikhattiini.
8 Wa bigiit deef le akhwaani
wa ajnabi le iyaal ammi.
9 Achaan hubbi le beetak
bigi leyi misil naar haragatni.
Wa l-yiʼayyuruuk,
muʼyaarhum wagaʼ foogi.
10 Bakeet wa sumt be kulla niiyti
wa da jaab leyi al-muʼyaar.
11 Ana libist khulgaan al-hizin
wa humman achchammato foogi.
12 Wa naas fi baab al-madiina yihajju beyi
wa ana bigiit khinneeye le l-sakkaara.
13 Laakin daahu niwajjih leek salaati,
ya Allah,
wa da l-wakit al-munaasib,
ya Rabbi !
Be rahmatak al-kabiire, rudd leyi
wa be sidkhak, najjiini !
14 Amrugni min al-tiine
wa khalli battaan ma nagaʼ.
Wa najjiini min al-yakrahooni
wa min almi al-khariig.
15 Khalli almi al-seel ma yichiilni
wa l-bahar al-khariig ma yazrutni
wa l-biir ma tinsadda foogi.
16 Rudd leyi, ya Allah,
achaan niʼmatak samha !
Wa be rahmatak al-kabiire,
wajjih aleyi !
17 Ma taaba !
Wajjih aleyi ana abdak.
Ajala rudd leyi
achaan ana gaaʼid fi l-diige.
18 Garrib leyi wa afdaani
wa najjiini min udwaani !
19 Inta taʼarif al-muʼyaar al-muwajjah leyi
wa l-eeb wa l-ihaana al-foogi
wa waddiriin charafi.
Wa kulla l-yidaayuguuni
gaaʼidiin giddaamak.
20 Al-muʼyaar chagga galbi
wa ana bigiit mardaan.
Wa gult akuun nalga minhum mahanna
laakin ma chift cheyy.
Wa l-yisabburuuni kula,
ana ma ligiithum.
21 Udwaani sabbo samm fi akli
wa le yisillu atachi,
zagooni be almi haamud.
22 Khalli dabalaayithum tabga leehum
charak giddaamhum
wa le l-induhum maʼaahum salaam,
khalli tabga leehum amkajjaama.
23 Khalli uyuunhum yitoochuchu
wa battaan ma yichiifu
wa daayman aksir duhuurhum !
24 Nazzil fooghum khadabak
wa khalli zaʼalak al-muhrig yalhaghum !
25 Wa khalli furgaanhum yakhrabo
wa khiyamhum yabgo faadiyiin min al-sukkaan !
26 Achaan humman taarado
al-inta darabtah
wa hajjo be taʼab al-naas
al-inta taʼʼabtuhum.
27 Khalliihum yagaʼo min khata fi khata
wa ma yalgo derib yadkhulu fi adaaltak.
28 Khalli yinmahu min kitaab al-haya
wa ma yinkatbu maʼa l-saalihiin.
29 Wa ana miskiin wa mubarjal
wa be najaatak ahfadni, ya Ilaahi !
30 Ana nimajjid usum al-Rabb be khine
wa niʼalliih be chukur.
31 Wa da adiil le Allah ziyaada min al-toor
walla min al-ijil be guruunah wa dalaafeeh.
32 Wa l-masaakiin yichiifu najaati
wa yafraho.
Wa l-yifattuchu al-Rabb,
khalli guluubhum yahyo.
33 Achaan Allah yasmaʼ al-daʼiifiin
wa ma yahgir naasah al-masaajiin.
34 Khalli al-ard wa l-sama wa l-buhuur
wa kulla cheyy al-fooghum, yimajjuduuh.
35 Achaan al-Rabb yinajji jabal Sahyuun
wa yabni battaan hillaal balad Yahuuza.
Wa chaʼabah yaskunu fooghum
wa yawrusuuhum.
36 Wa zurriiyit abiidah
yalgoohum warasa.
Wa l-yihibbu usmah
yaskunu fooghum.
وَصِيَّةْ لِكَبِيرْ الْغَنَّايِينْ: لِيِغَنُّوهْ حَسَبْ الْحِسّ الْبِنَادُوهْ «نُوَّارْ السِّتَّيْب»، مَزْمُورْ لِدَاوُدْ
1 يَا رَبّ، أَفْزَعْنِي!
أَشَانْ أَلْمِي قَرِيبْ يَزْرُطْنِي.
2 أَنَا وَقَعْت فِي وَحَلَةْ مَا عِنْدَهَا حَدّ
وَ مَا نَقْدَرْ نَمْرُقْ.
أَنَا وَقَعْت فِي أَلْمِي غَرِيقْ
وَ السَّيْل شَالْنِي.
3 أَنَا عِيِيتْ مِنْ الْمُنَادَاةْ
وَ حَلْقُومِي يِبِسْ.
وَ عُيُونِي ضِعْفَوْا
وَكِتْ نَرْجَى إِلٰـهِي.
4 الْيَكْرَهَوْنِي بَلَا سَبَبْ،
هُمَّنْ أَكْتَرْ مِنْ صُوفْ رَاسِي.
وَ الْيِدَوْرُوا يِدَمُّرُونِي،
هُمَّنْ شُدَادْ.
وَ بَلَا سَبَبْ
بِقَوْا عُدْوَانِي.
وَ الشَّيّءْ الْأَنَا مَا سِرِقْتَهْ،
نَقْدَرْ نِقَبِّلَهْ وَلَّا؟
5 يَا رَبِّي! إِنْتَ تَعَرِفْ قِلَّةْ فِهِمِي
وَ خَطَايِ مَا مُلَبَّدْ لَيْك.
6 خَلِّي الْيُخُطُّوا عَشَمْهُمْ فَوْقَكْ
مَا يَلْقَوْا أَيِّ عَيْب بِسَبَبِي،
يَا اللّٰهْ الرَّبّ الْقَادِرْ!
وَ خَلِّي الْيِفَتُّشُوكْ
مَا يَخْجَلَوْا بِسَبَبِي،
يَا إِلٰـهْ بَنِي إِسْرَائِيلْ!
7 وَ فِي شَانَكْ إِنْتَ،
نَحْمَلْ الْمُعْيَارْ.
وَ فِي شَانَكْ إِنْتَ،
الْعَيْب يِغَطِّينِي.
8 وَ بِقِيتْ ضَيْف لِأَخْوَانِي
وَ أَجْنَبِي لِعِيَالْ أَمِّي.
9 أَشَانْ حُبِّي لِبَيْتَكْ
بِقِي لَيِّ مِثِلْ نَارْ حَرَقَتْنِي.
وَ الْيِعَيُّرُوكْ،
مُعْيَارْهُمْ وَقَعْ فَوْقِي.
10 بَكَيْت وَ صُمْت بِكُلَّ نِيّتِي
وَ دَا جَابْ لَيِّ الْمُعْيَارْ.
11 أَنَا لِبِسْت خُلْقَانْ الْحِزِنْ
وَ هُمَّنْ أَشَّمَّتَوْا فَوْقِي.
12 وَ نَاسْ فِي بَابْ الْمَدِينَةْ يِحَجُّوا بَيِّ
وَ أَنَا بِقِيتْ غِنَّيَّةْ لِلسَّكَّارَى.
13 لَاكِنْ دَاهُو نِوَجِّهْ لَيْك صَلَاتِي،
يَا اللّٰهْ،
وَ دَا الْوَكِتْ الْمُنَاسِبْ،
يَا رَبِّي!
بِرَحْمَتَكْ الْكَبِيرَةْ، رُدّ لَيِّ
وَ بِصِدْقَكْ، نَجِّينِي!
14 أَمْرُقْنِي مِنْ الطِّينَةْ
وَ خَلِّي بَتَّانْ مَا نَقَعْ.
وَ نَجِّينِي مِنْ الْيَكْرَهَوْنِي
وَ مِنْ أَلْمِي الْغَرِيقْ.
15 خَلِّي أَلْمِي السَّيْل مَا يِشِيلْنِي
وَ الْبَحَرْ الْغَرِيقْ مَا يَزْرُطْنِي
وَ الْبِيرْ مَا تِنْسَدَّ فَوْقِي.
16 رُدّ لَيِّ، يَا اللّٰهْ،
أَشَانْ نِعْمَتَكْ سَمْحَةْ!
وَ بِرَحْمَتَكْ الْكَبِيرَةْ،
وَجِّهْ عَلَيِّ!
17 مَا تَابَى!
وَجِّهْ عَلَيِّ أَنَا عَبْدَكْ.
عَجَلَةْ رُدّ لَيِّ
أَشَانْ أَنَا قَاعِدْ فِي الضِّيقَةْ.
18 قَرِّبْ لَيِّ وَ أَفْدَانِي
وَ نَجِّينِي مِنْ عُدْوَانِي!
19 إِنْتَ تَعَرِفْ الْمُعْيَارْ الْمُوَجَّهْ لَيِّ
وَ الْعَيْب وَ الْإِهَانَةْ الْفَوْقِي
وَ وَدِّرِينْ شَرَفِي.
وَ كُلَّ الْيِضَايُقُونِي
قَاعِدِينْ قِدَّامَكْ.
20 الْمُعْيَارْ شَقَّ قَلْبِي
وَ أَنَا بِقِيتْ مَرْضَانْ.
وَ قُلْت أَكُونْ نَلْقَى مِنْهُمْ مَحَنَّةْ
لَاكِنْ مَا شِفْت شَيّءْ.
وَ الْيِصَبُّرُونِي كُلَ،
أَنَا مَا لِقِيتْهُمْ.
21 عُدْوَانِي صَبَّوْا سَمّ فِي أَكْلِي
وَ لِيِسِلُّوا عَطَشِي،
زَقَوْنِي بِأَلْمِي حَامُضْ.
22 خَلِّي دَبَلَايِتْهُمْ تَبْقَى لَيْهُمْ
شَرَكْ قِدَّامْهُمْ
وَ لِلْعِنْدُهُمْ مَعَاهُمْ سَلَامْ،
خَلِّي تَبْقَى لَيْهُمْ أَمْ كَجَّامَةْ.
23 خَلِّي عُيُونْهُمْ يِطَوْشُشُوا
وَ بَتَّانْ مَا يِشِيفُوا
وَ دَايْماً أَكْسِرْ ضُهُورْهُمْ!
24 نَزِّلْ فَوْقهُمْ غَضَبَكْ
وَ خَلِّي زَعَلَكْ الْمُحْرِقْ يَلْحَقْهُمْ!
25 وَ خَلِّي فُرْقَانْهُمْ يَخْرَبَوْا
وَ خِيَمْهُمْ يَبْقَوْا فَاضِيِينْ مِنْ السُّكَّانْ!
26 أَشَانْ هُمَّنْ طَارَدَوْا
الْإِنْتَ ضَرَبْتَهْ
وَ حَجَّوْا بِتَعَبْ النَّاسْ
الْإِنْتَ تَعَّبْتُهُمْ.
27 خَلِّيهُمْ يَقَعَوْا مِنْ خَطَا فِي خَطَا
وَ مَا يَلْقَوْا دَرِبْ يَدْخُلُوا فِي عَدَالْتَكْ.
28 خَلِّي يِنْمَحُوا مِنْ كِتَابْ الْحَيَاةْ
وَ مَا يِنْكَتْبُوا مَعَ الصَّالِحِينْ.
29 وَ أَنَا مِسْكِينْ وَ مُبَرْجَلْ
وَ بِنَجَاتَكْ أَحْفَضْنِي، يَا إِلٰـهِي!
30 أَنَا نِمَجِّدْ أُسُمْ الرَّبّ بِغِنَيْ
وَ نِعَلِّيهْ بِشُكُرْ.
31 وَ دَا عَدِيلْ لِلّٰهْ زِيَادَةْ مِنْ التَّوْر
وَلَّا مِنْ الْعِجِلْ بِقُرُونَهْ وَ ضَلَافَيْه.
32 وَ الْمَسَاكِينْ يِشِيفُوا نَجَاتِي
وَ يَفْرَحَوْا.
وَ الْيِفَتُّشُوا الرَّبّ،
خَلِّي قُلُوبْهُمْ يَحْيَوْا.
33 أَشَانْ اللّٰهْ يَسْمَعْ الضَّعِيفِينْ
وَ مَا يَحْقِرْ نَاسَهْ الْمَسَاجِينْ.
34 خَلِّي الْأَرْض وَ السَّمَاءْ وَ الْبُحُورْ
وَ كُلَّ شَيّءْ الْفَوْقهُمْ، يِمَجُّدُوهْ.
35 أَشَانْ الرَّبّ يِنَجِّي جَبَلْ صَهْيُون
وَ يَبْنِي بَتَّانْ حِلَّالْ بَلَدْ يَهُوذَا.
وَ شَعَبَهْ يَسْكُنُوا فَوْقهُمْ
وَ يَوْرُثُوهُمْ.
36 وَ ذُرِّيَّةْ عَبِيدَهْ
يَلْقَوْهُمْ وَرَثَةْ.
وَ الْيِحِبُّوا أُسْمَهْ
يَسْكُنُوا فَوْقهُمْ.
