Khine chakwat Dawuud al-khanna le Allah fi chaan kalaam Kuuch al-min gabiilat Banyaamiin
1 Ya Allah Ilaahi, inta maljaʼi,
khallisni min al-yitaaruduuni wa najjiini.
2 Achaan ana khaayif yadurbuuni misil al-diidaan
wa yigattuʼu jismi wa ma fi naadum al-yikhallisni.
3 Ya Allah Ilaahi, kan ana sawweet cheyy fasil
aw sawweet jariime be iideeni
4 aw sawweet al-fasaala le siid zeeni
aw bala sabab nahabt khasiimi,
5 khalaas, khalli al-adu yitaaridni wa yakrubni
wa fi l-ard, yifajjikhni
wa fi l-turaab, yarmi charafi. Wagfa.
6 Gumm, ya Allah, wa akhdab !
Gumm didd zaʼal al-khusmaani !
Inta al-amart be l-adil, fakkir foogi !
7 Khalli mujtamaʼ al-chuʼuub yilimmu giddaamak
wa min bakaanak al-aali, ahkim fooghum !
8 Ya Allah, inta al-tichaariʼ al-chuʼuub !
Ya Allah, chaariʼni hasab adaalti wa kamaali.
9 Waggif fasaalit al-aasiyiin !
Wa sabbit naas al-saalihiin !
Ya l-Ilaah al-saadikh !
Inta al-takchif al-galib
wa fikir al-insaan.
10 Al-Rabb hu daragati
wa munajji al-saalihiin.
11 Allah Al-Rabb hu gaadi saadikh
wa yiwassif khadabah kulla yoom.
12 Wa kan al-insaan ma yutuub,
Allah yitarrig seefah
wa yajbid nubbaalah wa yisawwibah.
13 Wa yijahhiz silaah al-moot
wa yisawwi nachaachiib al-yiharrugu.
14 Daahu al-yakhlab be l-charr
wa yahmal be l-fasaala,
yalda al-kidib.
15 Wa l-yahfir hawiire
wa yisawwiiha tawiile,
hu zaatah yagaʼ foogha.
16 Fasaaltah tagaʼ foogah
wa l-unuf al-sawwaah
yigabbil fi raasah.
17 Ana nachkur Allah fi chaan adaaltah
wa namdah usum Allah al-Aali.
غِنَيْ شَكْوَةْ دَاوُدْ الْغَنَّى لِلّٰهْ فِي شَانْ كَلَامْ كُوشْ الْمِنْ قَبِيلَةْ بَنْيَامِينْ
1 يَا اللّٰهْ إِلٰـهِي، إِنْتَ مَلْجَئِي،
خَلِّصْنِي مِنْ الْيِطَارُدُونِي وَ نَجِّينِي.
2 أَشَانْ أَنَا خَايِفْ يَضُرْبُونِي مِثِلْ الدِّيدَانْ
وَ يِقَطُّعُوا جِسْمِي وَ مَا فِي نَادُمْ الْيِخَلِّصْنِي.
3 يَا اللّٰهْ إِلٰـهِي، كَنْ أَنَا سَوَّيْت شَيّءْ فَسِلْ
أَوْ سَوَّيْت جَرِيمَةْ بِإِيدَيْنِي
4 أَوْ سَوَّيْت الْفَسَالَةْ لِسِيدْ زَيْنِي
أَوْ بَلَا سَبَبْ نَهَبْت خَصِيمِي،
5 خَلَاصْ، خَلِّي الْعَدُو يِطَارِدْنِي وَ يَكْرُبْنِي
وَ فِي الْأَرْض، يِفَجِّقْنِي
وَ فِي التُّرَابْ، يَرْمِي شَرَفِي. وَقْفَةْ.
6 قُمّ، يَا اللّٰهْ، وَ أَغْضَبْ!
قُمّ ضِدّ زَعَلْ الْخُصْمَانِي!
إِنْتَ الْأَمَرْت بِالْعَدِلْ، فَكِّرْ فَوْقِي!
7 خَلِّي مُجْتَمَعْ الشُّعُوبْ يِلِمُّوا قِدَّامَكْ
وَ مِنْ بَكَانَكْ الْعَالِي، أَحْكِمْ فَوْقهُمْ!
8 يَا اللّٰهْ، إِنْتَ التِّشَارِعْ الشُّعُوبْ!
يَا اللّٰهْ، شَارِعْنِي حَسَبْ عَدَالْتِي وَ كَمَالِي.
9 وَقِّفْ فَسَالَةْ الْعَاصِيِينْ!
وَ ثَبِّتْ نَاسْ الصَّالِحِينْ!
يَا الْإِلٰـهْ الصَّادِقْ!
إِنْتَ التَّكْشِفْ الْقَلِبْ
وَ فِكِرْ الْإِنْسَانْ.
10 الرَّبّ هُو دَرَقَتِي
وَ مُنَجِّي الصَّالِحِينْ.
11 اللّٰهْ الرَّبّ هُو قَاضِي صَادِقْ
وَ يِوَصِّفْ غَضَبَهْ كُلَّ يَوْم.
12 وَ كَنْ الْإِنْسَانْ مَا يُتُوبْ،
اللّٰهْ يِطَرِّقْ سَيْفَهْ
وَ يَجْبِدْ نُبَّالَهْ وَ يِصَوِّبَهْ.
13 وَ يِجَهِّزْ سِلَاحْ الْمَوْت
وَ يِسَوِّي نَشَاشِيبْ الْيِحَرُّقُوا.
14 دَاهُو الْيَغْلَبْ بِالشَّرّ
وَ يَحْمَلْ بِالْفَسَالَةْ،
يَلْدَ الْكِدِبْ.
15 وَ الْيَحْفِرْ هَوِيرَةْ
وَ يِسَوِّيهَا طَوِيلَةْ،
هُو ذَاتَهْ يَقَعْ فَوْقهَا.
16 فَسَالْتَهْ تَقَعْ فَوْقَهْ
وَ الْعُنُفْ السَّوَّاهْ
يِقَبِّلْ فِي رَاسَهْ.
17 أَنَا نَشْكُرْ اللّٰهْ فِي شَانْ عَدَالْتَهْ
وَ نَمْدَحْ أُسُمْ اللّٰهْ الْعَالِي.
