Salaat Dawuud
1 Ya Allah ! Asmaʼni wa rudd leyi
achaan ana miskiin wa daʼiif.
2 Ahfad hayaati
achaan ana muʼmin beek.
Inta ya Ilaahi, najjiini
ana abdak al-mutawakkil aleek.
3 Hinn foogi, ya Rabb,
achaan kulla yoom ninaadiik.
4 Ya Rabb, farrih galib abdak
achaan ana niwajjih aleek.
5 Ya Rabb, inta zeen wa khafuur
wa rahmatak kabiire le kulla l-yinaaduuk.
6 Ya Allah, khutt adaanak le salaati
wa asmaʼ duʼaayi.
7 Wa fi yoom diigti, ana ninaadiik
wa inta turudd leyi.
8 Ya Rabb ! Ma fi ilaah mislak
wa ma fi amal misil amalak.
9 Kulla l-umam al-inta khalagtuhum
yaju yasjudu giddaamak, ya Rabb,
wa yimajjudu usmak.
10 Achaan inta kabiir
wa tisawwi ajaayib.
La Ilaah illa inta wiheedak !
11 Ya Allah ! Wassif leyi derbak
wa ana nuruukh foogah be kulla sidikh.
Wa antiini galib mukhlis
achaan nicharrif usmak.
12 Ya Rabbi, ya Ilaahi ! Ana nachkurak be kulla galbi
wa nimajjid usmak kulla yoom.
13 Achaan rahmatak aleyi kabiire
wa inta najjeet nafsi min al-moot.
14 Ya Rabb ! Al-mustakbiriin gammo diddi
wa siyaad al-unuf be katara dawwaro mooti
wa abadan humman ma khattook fi fikirhum.
15 Wa laakin inta, ya Rabb,
inta Allah al-Rahmaan al-Rahiim
wa l-Sabuur wa l-Muhibb wa l-Amiin.
16 Wajjih aleyi wa hinn foogi
wa antiini gudra ana abdak
wa najjiini ana wileed khaadmak.
17 Sawwi leyi alaamat al-kheer
wa khalaas al-yakrahooni,
al-eeb yakrubhum.
Achaan inta bas Allah,
tafzaʼni wa tihannisni.
صَلَاةْ دَاوُدْ
1 يَا اللّٰهْ! أَسْمَعْنِي وَ رُدّ لَيِّ
أَشَانْ أَنَا مِسْكِينْ وَ ضَعِيفْ.
2 أَحْفَضْ حَيَاتِي
أَشَانْ أَنَا مُؤمِنْ بَيْك.
إِنْتَ يَا إِلٰـهِي، نَجِّينِي
أَنَا عَبْدَكْ الْمُتَوَكِّلْ عَلَيْك.
3 حِنّ فَوْقِي، يَا رَبّ،
أَشَانْ كُلَّ يَوْم نِنَادِيكْ.
4 يَا رَبّ، فَرِّحْ قَلِبْ عَبْدَكْ
أَشَانْ أَنَا نِوَجِّهْ عَلَيْك.
5 يَا رَبّ، إِنْتَ زَيْن وَ غَفُورْ
وَ رَحْمَتَكْ كَبِيرَةْ لِكُلَّ الْيِنَادُوكْ.
6 يَا اللّٰهْ، خُطّ أَدَانَكْ لِصَلَاتِي
وَ أَسْمَعْ دُعَايِ.
7 وَ فِي يَوْم ضِيقْتِي، أَنَا نِنَادِيكْ
وَ إِنْتَ تُرُدّ لَيِّ.
8 يَا رَبّ! مَا فِي إِلٰـهْ مِثْلَكْ
وَ مَا فِي عَمَلْ مِثِلْ عَمَلَكْ.
9 كُلَّ الْأُمَمْ الْإِنْتَ خَلَقْتُهُمْ
يَجُوا يَسْجُدُوا قِدَّامَكْ، يَا رَبّ،
وَ يِمَجُّدُوا أُسْمَكْ.
10 أَشَانْ إِنْتَ كَبِيرْ
وَ تِسَوِّي عَجَايِبْ.
لَا إِلٰـهْ إِلَّا إِنْتَ وِحَيْدَكْ!
11 يَا اللّٰهْ! وَصِّفْ لَيِّ دَرْبَكْ
وَ أَنَا نُرُوغْ فَوْقَهْ بِكُلَّ صِدِقْ.
وَ أَنْطِينِي قَلِبْ مُخْلِصْ
أَشَانْ نِشَرِّفْ أُسْمَكْ.
12 يَا رَبِّي، يَا إِلٰـهِي! أَنَا نَشْكُرَكْ بِكُلَّ قَلْبِي
وَ نِمَجِّدْ أُسْمَكْ كُلَّ يَوْم.
13 أَشَانْ رَحْمَتَكْ عَلَيِّ كَبِيرَةْ
وَ إِنْتَ نَجَّيْت نَفْسِي مِنْ الْمَوْت.
14 يَا رَبّ! الْمُسْتَكْبِرِينْ قَمَّوْا ضِدِّي
وَ سِيَادْ الْعُنُفْ بِكَتَرَةْ دَوَّرَوْا مَوْتِي
وَ أَبَداً هُمَّنْ مَا خَطَّوْك فِي فِكِرْهُمْ.
15 وَ لَاكِنْ إِنْتَ، يَا رَبّ،
إِنْتَ اللّٰهْ الرَّحْمـٰنْ الرَّحِيمْ
وَ الصَّبُورْ وَ الْمُحِبّ وَ الْأَمِينْ.
16 وَجِّهْ عَلَيِّ وَ حِنّ فَوْقِي
وَ أَنْطِينِي قُدْرَةْ أَنَا عَبْدَكْ
وَ نَجِّينِي أَنَا وِلَيْد خَادْمَكْ.
17 سَوِّي لَيِّ عَلَامَةْ الْخَيْر
وَ خَلَاصْ الْيَكْرَهَوْنِي،
الْعَيْب يَكْرُبْهُمْ.
أَشَانْ إِنْتَ بَسْ اللّٰهْ،
تَفْزَعْنِي وَ تِحَنِّسْنِي.
