Al-harba fi Gilbuuʼa wa moot Chaawuul
1 Wa yoom waahid, al-Filistiyiin hajamo Bani Israaʼiil wa Bani Israaʼiil jaro giddaam al-Filistiyiin wa katiiriin minhum maato fi jabal Gilbuuʼa. 2 Wa l-Filistiyiin zarroohum le Chaawuul wa iyaalah. Wa humman katalo Yuunataan wa Abinadaab wa Malkichuuʼ, iyaal Chaawuul. 3 Wa fi l-bakaan da, al-harib bigi chadiid le Chaawuul. Wa siyaad al-nuchchaab chaafooh wa wakit hu chaafaahum, gamma yarjif giddaamhum.
4 Wa Chaawuul gaal le l-sabi al-chaayil leyah silaahah : «Sill seefak wa aktulni. Achaan ma nidoor al-ma mutahhariin dool yiʼazzubuuni.» Laakin al-sabi aba achaan hu khaaf marra waahid. Wa khalaas Chaawuul chaal seefah wa wagaʼ foogah wa maat. 5 Wa wakit al-sabi da chaaf Chaawuul maat, hu kula wagaʼ fi seefah wa maat. 6 Wa be misil da, Chaawuul wa awlaadah al-talaata wa kulla aayiltah maato sawa.
7 Wa wakit Bani Israaʼiil al-saakniin jamb al-waadi simʼo be haziimat Bani Israaʼiil wa moot Chaawuul wa awlaadah, humman kula arrado wa khallo hillaalhum. Wa l-Filistiyiin jo wa sakano fi l-hillaal dool.
8 Wa ambaakir, wakit al-Filistiyiin jo fi bakaan al-duwaas le yichiilu khumaam al-maytiin, ligo Chaawuul wa awlaadah maytiin fi raas jabal Gilbuuʼa. 9 Wa humman chaalo silaah Chaawuul wa gataʼo raasah. Wa rassalo al-khabar da fi kulla balad al-Filistiyiin wa khabbaro beyah chaʼabhum wa fi buyuut asnaamhum. 10 Wa humman khatto silaah Chaawuul fi beet ilaahaathum. Wa allago raasah fi beet ilaahhum Daguun.
11 Wa kulla sukkaan hillit Yaabiich fi turaab Gilʼaad simʼo be kulla cheyy al-Filistiyiin sawwooh fi Chaawuul. 12 Khalaas kulla l-rujaal al-fahaliin gammo wa macho chaalo janaazaat Chaawuul wa awlaadah wa jaaboohum fi Yaabiich. Wa humman dafano udaamhum fi gaʼar al-chadara al-kabiire al-gaaʼide fi Yaabiich. Wa saamo sabʼa yoom.
13 Wa Chaawuul maat achaan isi Allah wa ma taabaʼ kalaamah. Wa battaan hu macha saʼal naadum al-yikallim maʼa l-maytiin 14 wa aba ma yasʼal Allah. Wa be sabab da, Allah jaʼal leyah al-moot wa sallam al-muluk le Dawuud wileed Yassa.
© Arabe tchadien (alphabet latin) Bible © Alliance Biblique du Tchad, 2019.
