Hiruudus taʼʼab al-muʼminiin
1 Wa fi l-wakit da, al-malik Hiruudus gamma yitaʼʼib naas waahidiin min jamaaʼat al-muʼminiin. 2 Wa be iznah, katalo be l-seef Yaakhuub akhu Yuuhanna. 3 Wa wakit hu chaaf al-Yahuud firho min al-cheyy al-sawwaah da, hu chaal niiye achaan yakrub Butrus kula. Wa karabah fi usbuuʼ hana iid al-Khubza bala Tawwaara. 4 Wa karab Butrus wa dassaah fi l-sijin. Wa kallaf beyah 16 askar wa fi ayyi wakit, 4 askar gaaʼidiin maʼaayah le yaharsuuh. Wa l-malik dawwar yamrug Butrus wa yigaddimah le l-chaʼab baʼad iid al-Fisha. 5 Butrus gaaʼid fi l-sijin wa laakin jamaaʼat al-muʼminiin gaaʼidiin yasʼalo Allah be chidde fi chaanah.
Al-Rabb marag Butrus min al-sijin
6 Wa fi l-leele al-gubbaal Hiruudus ma yamrug Butrus giddaam al-naas, Butrus marbuut be janaaziir itneen wa naayim been askar itneen. Wa askar aakhariin yaharsu baab al-sijin. 7 Wa fajʼatan, waahid min malaaʼikat Allah baan wa nuur chadiid sadda al-suluulu al-Butrus gaaʼid foogah. Wa l-malak darabah le Butrus fi naaytah wa gawwamah min al-noom wa gaal : «Yalla, gumm ajala !» Wa l-janaaziir wagaʼo min iideenah. 8 Wa l-malak kallam leyah wa gaal : «Arbut sulbak. Albas naʼaalak.» Wa Butrus taabaʼ kalaamah. Wa l-malak gaal leyah : «Albas khalagak wa taʼaal taabiʼni.»
9 Wa Butrus marag yitaabiʼ al-malak. Wa fi fikrah, hu gaaʼid yahlam bas wa ma irif al-cheyy al-gaaʼid yisawwiih al-malak da, sahiih. 10 Wa faato be derib al-askar al-awwal wa faato be derib al-askar al-taani wa jo fi baab al-hadiid fi khachum al-sijin al-yamrug fi l-hille. Wa l-baab anfakka wiheedah wa marago min al-sijin. Wa kammalo chaariʼ waahid wa baʼad da, al-malak khallaah. 11 Wa khalaas Butrus fakkar wa gaal : «Hassaʼ fihimt. Sahiih, Allah rassal malakah achaan yinajjiini min iideen Hiruudus wa min kulla cheyy al-Yahuud dawwaro yisawwu foogi.»
12 Wakit fihim al-cheyy al-bigi, hu macha fi beet Mariyam amm Yuuhanna al-binaaduuh Markhus. Wa muʼminiin katiiriin laammiin fi beetha achaan yisallu. 13 Wa lihig al-beet wa dagga fi l-baab al-barraani. Wa khaddaama usumha Rawda jaat tiʼakkid yaatu fi l-baab. 14 Wa wakit irfat hiss Butrus, firhat bilheen. Laakin ma fakkat al-baab wa gabbalat farhaane wa jarat achaan tuguul le l-naas al-laammiin kadar Butrus gaaʼid barra fi l-baab. 15 Wa raddo leeha wa gaalo : «Raaski laffa walla ?» Wa laakin hi akkadat leehum kalaamha. Wa gaalo leeha : «Akuun da malak hana Butrus bas.»
16 Wa laakin Butrus gaaʼid yudugg fi l-baab lahaddi jo fakkooh leyah. Wa wakit chaafooh, alʼajjabo marra waahid. 17 Wa Butrus sawwa leehum ichaara be iidah achaan yaskutu. Wa ooraahum be kikkeef Allah maragah min al-sijin wa gaal : «Amchu khabburu Yaakhuub wa l-akhwaan be l-cheyy al-bigi.» Wa khalaas, Butrus marag min al-beet wa macha bakaan aakhar.
18 Wa be fajur, al-hurraas barjalo marra waahid. Wa assaaʼalo ambeenaathum wa gaalo : «Chunu bigi le Butrus ?» 19 Wa wakit Hiruudus rassal askarah achaan yijiibu Butrus, ma ligooh. Wa naada al-hurraas wa saʼalaahum suʼaal katiir wa amar askarah achaan yaktuluuhum. Baʼad da, Hiruudus gamma min daar al-Yahuudiiya wa macha fi hillit Geesariiya wa sakan hinaak.
Moot Hiruudus
20 Hiruudus zaʼlaan min naas al-hillaal Suur wa Seeda. Wa naas al-hillaal dool lammo wa astafago ambeenaathum achaan yissaamaho maʼaayah be musaaʼadat Balaastus. Wa Balaastus da, hu masʼuul gasir al-malik Hiruudus. Wa humman dawwaro yissaamaho maʼa Hiruudus achaan akil baladhum jaayi min mamlakatah. 21 Wa fi l-yoom al-muhaddad, Hiruudus libis lubaas hana malik wa gaʼad fi l-kursi wa harajaahum giddaam kulla l-naas. 22 Wa kulla l-naas gammo aato wa gaalo : «Da ma hiss naadum ! Da hiss Allah !» 23 Wa tawwaali, waahid min malaaʼikat Allah darab Hiruudus achaan hu ma aba chakkiriin al-naas wa ma majjad Allah. Wa duud al-batun akal musraan Hiruudus wa khalaas, hu maat.
24 Wa adad al-naas al-simʼo kalaam Allah zaad wa naas katiiriin aamano. 25 Wa fi Madiinat al-Khudus Barnaaba wa Chaawuul kammalo al-khidme al-kallafoohum beeha al-muʼminiin. Wa humman gabbalo fi Antaakiya wa waddo maʼaahum Yuuhanna al-binaaduuh Markhus.
© Arabe tchadien (alphabet latin) Bible © Alliance Biblique du Tchad, 2019.
