Allah khabbar be achya jadiidiin
1 Asmaʼo, ya zurriiyit Yaakhuub,
intu al-yinaaduuku be usum Israaʼiil
wa maragtu min sulub Yahuuza.
Asmaʼo, intu al-tahalfu be usum Allah
wa tazkuru Ilaah Bani Israaʼiil
laakin bala amaan wa bala adaala.
2 Yinaaduuku naas al-madiina al-mukhaddasa
al-mutawakkiliin ale Ilaah Bani Israaʼiil
wa hu usmah Allah al-Gaadir.
3 «Al-achya al-awwal bigo,
ana khabbart beehum min zamaan.
Wa be khachmi, ana hajjeet beehum
wa ballakht beehum.
Fajʼatan ana sawweethum
wa humman bigo.
4 Achaan ana naʼarif
intu ruuseeku gawiyiin
wa anaagirku misil hadiid
wa jabhaatku misil nahaas.
5 Wa ana ooreetku min zamaan
be l-achya dool gabul ma yaju
wa khabbartuku beehum.
Ma waajib tuguulu :
‹Asnaamna sawwo al-achya dool
wa tamaasiilna hana l-hadiid wa l-hatab amaro beehum.›
6 Intu simiʼtu wa chiftu kulla l-achya dool
wa ma tiʼtarufu beehum walla ?
«Wa hassaʼ, ana niʼooriiku
be achya jadiidiin wa mahfuudiin
al-intu ma taʼarfuuhum.
7 Wa l-achya dool,
hassaʼ bas ana khalagtuhum,
humman ma gaaʼidiin min zamaan.
Wa gabul al-yoom da,
intu ma simiʼtu beehum
achaan ma tuguulu :
‹Daahu aniina naʼarfuuhum.›
8 Aywa, intu ma simiʼtu cheyy wa la iriftu cheyy,
wa abadan ma khatteetu udneeku !
Achaan ana naʼarifku intu khaayniin
wa min fi butuun ammahaatku, yinaaduuku mutamarridiin.
9 «Wa fi chaan usmi bas,
ana akhkhart khadabi.
Wa be sabab al-chukur al-waajib leyi,
ana sabart leeku achaan ma nidammirku.
10 Ana saffeetku be l-naar
laakin ma misil yisaffu al-fudda.
La ! Ana jarrabtuku be naar al-taʼab.
11 Wa da, fi chaani ana.
Aywa, fi chaani ana bas
ana gammeet wa sawweet misil da !
Achaan kikkeef nikhalli usmi ma yihtarumu ?
La ! Majdi ma nantiih le l-aakhar.
12 «Asmaʼooni, ya zurriiyit Yaakhuub
wa ya Bani Israaʼiil, intu al-ana naadeetku !
Ana bas hu !
Ana al-awwal wa l-akhiir.
13 Be iidi, ana assast al-ard
aywa, be iidi al-zeene, falleet al-samaawaat.
Wakit ninaadiihum,
tawwaali yaju sawa giddaami.
14 Limmu kulluku wa asmaʼo !
Yaatu min al-ilaahaat khabbar be l-achya dool ?
Al-raajil al-yihibbah Allah
yinaffiz niiytah didd Baabil
wa yarfaʼ duraaʼah didd al-Baabiliyiin.
15 Ana bas, ana bas al-hajjeet.
Aywa ! Ana bas naadeetah wa jibtah.
Wa fi derbah da, yanjah.
16 Garrubu leyi wa asmaʼo al-kalaam da !
Min al-bidaaya, ana ma kallamt be sirr
wa wakt al-achya dool bigo, ana gaaʼid.»
Wa hassaʼ, Allah al-Rabb khatta ruuhah foogi wa rassalaani. 17 Wa daahu Allah Khudduus Israaʼiil al-fadaaku gaal :
«Ana Allah Ilaahku, niʼallimku le faayditku
wa nuguudku fi l-derib al-waajib tamchu foogah.
18 Kan awwal khatteetu baalku le wasiiyaati,
salaamitku tabga misil al-bahar
wa adaalitku misil mooj al-bahar.
19 Wa zurriiyitku tabga katiire misil al-ramla
wa iyaalku misil turaab al-ard.
Wa usumhum wa la yingatiʼ
wa la yiwaddir min giddaami.
20 «Amurgu min Baabil !
Wa arrudu min al-Baabiliyiin !
Be zakhraat, khabburu wa khalli yasmaʼooh
wa ballukhu lahaddi taraf al-ard wa guulu :
‹Allah fada zurriiyit abdah Yaakhuub !›
21 Fi l-ard al-sahara al-waddaahum foogha,
ma karabhum atach.
Wa marag leehum almi min al-jabal
wa chagga al-jabal wa almi saal minnah.»
22 Wa Allah gaal :
«Le l-aasiyiin, ma fi salaam.»
© Arabe tchadien (alphabet latin) Bible © Alliance Biblique du Tchad, 2019.
