Allah gaal yabnu beetah battaan
1 Fi l-yoom al-awwal hana l-chahar al-saadis fi l-sana al-taaniye hana hukum al-malik Daariyuus, Allah hajja be waasitat al-nabi Haggaay le Zarubaabil wileed Chaltiyiil wa le Yachuuʼ wileed Yuusaadikh. Wa Zarubaabil da hu haakim balad Yahuuza. Wa Yachuuʼ kamaan hu kabiir rujaal al-diin.
2 Daahu Allah al-Gaadir gaal : «Al-chaʼab da gaalo kadar al-wakit al-yabnu foogah beet Allah battaan da lissaaʼ ma ja.»
3 Wa khalaas, Allah hajja leehum battaan be waasitat al-nabi Haggaay wa gaal : 4 «Hassaʼ, intu taskunu fi buyuut al-jammaltuuhum be hatab wa laakin beet Allah gaaʼid mudammar. Da adiil walla ?»
5 Wa hassaʼ, daahu Allah al-Gaadir gaal :
«Fakkuru fi haalitku.
6 Intu teerabtu katiir wa ligiitu chiyya
wa akaltu wa ma chibiʼtu.
Wa chiribtu wa ma riwiitu
wa libistu wa gaaʼidiin bardaaniin.
Wa da misil ujritku
dasseetuuha fi jeeb magduud.»
7 Daahu Allah al-Gaadir gaal : «Fakkuru fi haalitku. 8 Atlaʼo fi l-jabal wa jiibu hatab wa abnu beyah beeti battaan. Wa be da, ana nafrah beyah wa nibayyin foogah majdi. Wa da, Allah bas gaalah. 9 Intu gaaʼidiin tarjo intaaj katiir wa laakin ligiitu chiyya bas. Intu waddeetuuh fi buyuutku wa laakin ana nafakht foogah wa chattattah. Wa da fi chaan chunu ? Da fi chaan beeti gaaʼid mudammar wa laakin intu ankarabtu ayyi waahid fi bani beetah. Wa da kalaam Allah al-Gaadir. 10 Wa fi chaan da, al-sama ma nazzalat matar wa l-ard ma antat intaaj. 11 Ana jibt al-jafaaf fi l-ard wa fi l-jibaal wa fi l-ziraaʼa wa fi jineenaat al-inab wa fi chadar al-zaytuun wa fi kulla intaaj al-ard. Wa l-naas wa l-bahaayim ma ligo natiijat khidmithum.»
12 Wa khalaas, Zarubaabil wileed Chaltiyiil wa Yachuuʼ wileed Yuusaadikh kabiir rujaal al-diin wa kulla l-faddalo min al-chaʼab, kulluhum simʼo kalaam Allah Ilaahhum wa kalaam al-nabi Haggaay al-rassalah leehum Allah Ilaahhum. Wa l-chaʼab khaafo min Allah.
13 Wa Haggaay rasuul Allah hajja le l-chaʼab hasab al-kalaam al-rassalah beyah Allah wa gaal : «Daahu kalaam Allah : ‹Ana maʼaaku.›»
14 Wa Allah chajjaʼ Zarubaabil wileed Chaltiyiil haakim balad Yahuuza wa Yachuuʼ wileed Yuusaadikh kabiir rujaal al-diin wa kulla l-faddalo min al-chaʼab. Wa humman jo wa gammo yakhdumu fi beet Allah al-Gaadir Ilaahhum 15 fi yoom 24 hana l-chahar al-saadis fi l-sana al-taaniye hana hukum al-malik Daariyuus.
© Arabe tchadien (alphabet latin) Bible © Alliance Biblique du Tchad, 2019.
