Sanit niʼmat Allah
1 Ruuh Allah al-Rabb gaaʼid foogi
achaan Allah masahaani wa khassasaani
le nibachchir al-masaakiin.
Hu rassalaani le nidaawi al-naas al-galibhum munkasir
wa naʼlin be l-hurriiye le l-makruubiin
wa be l-talagaan le l-masaajiin.
2 Ana naʼlin sanit niʼmat Allah
wa yoom al-taar hana Ilaahna.
Wa da, le nisabbir kulla l-haznaaniin.
3 Hu rassalaani le naas Sahyuun
al-gaaʼidiin fi l-hizin
achaan nantiihum kadmuul jamiil
badal al-rumaad al-fi raashum
wa dihin al-suruur
badal al-hizin
wa lubaas al-chukur
badal al-ruuh al-daʼiife.
Wa yisammuuhum Chadar al-Adaala
al-Allah Maganah le Yiwassif Majdah.
4 Humman yabnu al-muhaddam min zamaan
wa yigawwumu al-khirib min awwal
wa yijaddudu buna al-mudun al-muhaddamiin
wa kharbaaniin min zurriiye le zurriiye.
5 Ya chaʼabi, al-ajaanib yaju
wa yasraho leeku be khanamku
aywa, iyaalhum yahartu ziraaʼitku
wa yakhdumu leeku fi jineenaat inabku.
6 Wa kan leeku intu, yinaaduuku
rujaal al-diin hana Allah
wa khaddaamiin Ilaahna.
Taakulu khuna al-umam
wa tifaachuru be gudrithum.
7 Wa Allah gaal :
«Badal al-eeb,
talgo gisimku marrateen
wa badal al-ihaana,
al-farah yabga gisimku.
Achaan da, tawrusu marrateen min baladku
wa farhitku tagood ila l-abad.
8 Achaan ana Allah nihibb al-adaala
wa nakrah al-sirge wa l-jariime.
Nantiihum mukaafaathum be sidikh
wa nisawwi maʼaahum muʼaahada daayme.
9 Zurriiyithum tukuun maʼruufa been al-umam
wa iyaalhum maʼruufiin ust al-chuʼuub.
Kulla l-yichiifuuhum yaʼarfu
kadar humman zurriiye al-baarakaaha Allah.»
10 Aywa, ana nafrah ziyaada be Allah
wa nafsi tafrah be Ilaahi.
Achaan hu labbasaani khulgaan al-naja
wa kasaani be jallaabiiyit al-adaala.
Hu jammalaani be kadmuul misil ariis
aywa, misil kadmuul raajil al-diin
wa misil al-aruus al-mujammala be ziinitha.
11 Aywa, misil al-ard tamrug bizritha
wa misil al-jineene tamrug teeraabha,
misil da, Allah al-Rabb kula yibayyin adaaltah
wa kulla l-umam yachkuruuh.
© Arabe tchadien (alphabet latin) Bible © Alliance Biblique du Tchad, 2019.
