Chamchuun chaal al-taar fi l-Filistiyiin
1 Wa baʼad ayyaam fi wakit gatiʼiin al-gameh, Chamchuun saafar macha bakaan martah. Wa wadda maʼaayah sakhal wa gaal : «Nidoor nadkhul fi khurfit marti.» Wa laakin abu martah ma antaah izin le yadkhul. 2 Wa gaal le Chamchuun : «Ana hasabt inta abeetha wa ana anteetha le waziirak. Wa akhutha tariiditha ma samhe minha walla ? Khalaas chiilha fi badalha.» 3 Wa Chamchuun gaal : «Hassaʼ da, kan nisawwi cheyy fasil fi l-Filistiyiin kula, ma yagdaro yuluumuuni !»
4 Wa macha karab 300 baʼaachiim wa kulli baʼaachiim itneen rabat dunubbaahum sawa. Wa khatta ambeenaat al-dunubba al-itneen dool kaniite. 5 Wa baʼad da, hu gabbad al-kaniite wa talag al-baʼaachiim fi ziraaʼat al-Filistiyiin. Wa be da, hu harrag ganaadiil al-gameh al-waagif foog wa rubat al-gameh al-magtuuʼ. Wa hatta jineenaat al-inab wa l-zaytuun kula hirgo.
6 Wa l-Filistiyiin gaalo : «Yaatu al-sawwa al-cheyy da ?» Wa gaalo leehum : «Da Chamchuun nasiib al-raajil al-min hillit Timna achaan hu da, chaal martah wa antaaha le waziirah.» Wa khalaas, al-Filistiyiin macho harrago al-mara di wa abuuha. 7 Wa Chamchuun gaal leehum : «Hatta kan sawweetu al-cheyy da kula, ana ma nagiif lahaddi nichiil taari foogku.» 8 Khalaas, hu hajamaahum wa hazamaahum haziime kabiire. Wa baʼad da, macha dakhal fi karkuur hajar Itaam wa gaʼad foogah.
Chamchuun annasar be saalfit humaar
9 Wa baʼad da, al-Filistiyiin gammo khatto muʼaskarhum fi turaab Yahuuza wa hajamo Laahi. 10 Wa rujaal Yahuuza gaalo leehum : «Maala gammeetu diddina ?» Wa l-Filistiyiin gaalo : «Aniina gammeena achaan nakurbu Chamchuun wa nisawwu foogah misil hu sawwa foogna.» 11 Wa khalaas, 3 000 raajil min Yahuuza gammo macho le l-karkuur hana hajar Itaam. Wa gaalo le Chamchuun : «Inta ma taʼarif kadar aniina gaaʼidiin tihit hukum al-Filistiyiin walla ? Wa chunu al-inta sawweetah da ?» Wa hu gaal leehum : «Ana sawweet fooghum misil humman sawwo foogi.» 12 Wa humman gaalo leyah : «Aniina jiina le nakurbuuk wa nisallumuuk le l-Filistiyiin.» Wa Chamchuun gaal leehum : «Ahalfu leyi kadar intu ke ma taktuluuni.» 13 Wa humman gaalo leyah : «La, aniina nidooru nakurbuuk wa nisallumuuk leehum bas laakin ma naktuluuk.» Khalaas, humman rabbatooh be hubaal judaad itneen wa maragooh min al-karkuur.
14 Wa wakit ja gariib le Laahi, al-Filistiyiin marago laagooh be korooraak hana harib. Laakin Ruuh Allah nazal foogah wa l-hubaal al-raabtiin beehum iideenah bigo misil al-janaago al-haragathum al-naar wa daffago min iideenah. 15 Wa tawwaali, hu ligi saalfe hint humaar maat gariib waagʼe wa chaalha wa katal beeha 1 000 raajil. 16 Wa Chamchuun gaal : «Be saalfit humaar, ana hazamtuhum ! Be saalfit humaar bas, ana katalt 1 000 raajil.»
17 Wa min kammal kalaamah bas, hu zagal minnah al-saalfe. Wa sammo al-bakaan da Raamat Laahi (maʼanaatah jabal al-Saalfe). 18 Wa hu atchaan ziyaada wa saʼal Allah wa gaal : «Inta bas al-jibt al-nasur al-kabiir da be iid ana abdak. Wa hassaʼ, hal ana numuut min al-atach wa nagaʼ fi iideen al-naas al-ma mutahhariin walla ?» 19 Wa l-Rabb chagga al-jabal al-fi Laahi wa almi jara minnah. Wa Chamchuun chirib wa battaan bigi chadiid wa hiyi. Wa be sabab da, een almi al-gaaʼide lahaddi l-yoom fi Laahi sammooha Een Khuuri (maʼanaatah een hana l-naadum al-yasʼal Allah).
20 Wa fi wakit al-Filistiyiin, Chamchuun hakam fi balad Israaʼiil 20 sana.
© Arabe tchadien (alphabet latin) Bible © Alliance Biblique du Tchad, 2019.
