1 Wa wakit Balʼaam irif kadar Allah yidoor yibaarik Bani Israaʼiil, hu ma sawwa misil al-marraat al-awwal le yaʼarif al-kheeb wa laakin wajjah ale l-sahara. 2 Wa wakit Balʼaam rafaʼ raasah, chaaf kulla Bani Israaʼiil naazliin hasab gabaayilhum. Wa khalaas Ruuh Allah nazal foogah. 3 Wa bada be l-chiʼir wa gaal :
«Da kalaam Balʼaam wileed Baʼuur.
Da kalaam al-raajil al-yichiif adiil.
4 Da kalaam al-naadum
al-yasmaʼ kalaam al-Ilaah
wa wakit yasjud, uyuunah yinfathu
yichiif al-ruʼya
al-yiwassifha leyah Allah al-Gaadir.
5 Khiyamku samhiin,
ya zurriiyit Yaakhuub,
wa masaakinku al-taskunu fooghum,
ya Bani Israaʼiil.
6 Khiyamku marsuusiin misil waadi
wa misil jineenaat fi khachum al-bahar
wa misil chadar al-kitir al-Allah gawwamah
wa misil chadar al-arz fi khachum al-almi.
7 Almi yisiil min eenah
wa bizirtah yazguuha be almi katiir.
Wa malikhum yabga ziyaada min al-malik Agaag
wa mamlakatah tabga gawiiye.
8 Wa l-Ilaah maragaahum
min balad Masir
wa induhum gudrat
misil gudrat al-jaamuus.
Wa yidammuru al-umam
al-humman udwaanhum
wa yitaʼʼunuuhum be nuchchaabhum
wa yikassuru udaamhum.
9 Humman misil al-duud al-yabruk
wa l-duudaay al-targud.
Yaatu al-yagdar yigawwimhum ?
Mabruuk al-yibaarikku
wa malʼuun al-yalʼanku.»
10 Wa khalaas Balaakh ziʼil didd Balʼaam wa darab ambeenaat iideenah wa gaal : «Ana naadeetak le talʼan leyi udwaani. Wa daahu le taalit marra inta baaraktuhum ! 11 Yalla ! Amchi baladak ! Awwal ana gult nicharrifak wa laakin daahu Allah daharak min al-charaf da.»
12 Wa Balʼaam radda le Balaakh wa gaal : «Ana kallamtuhum le naasak al-inta rassaltuhum wa gult : 13 ‹Kan Balaakh yantiini kulla l-fudda wa l-dahab al-fi beetah kula, ana ma nagdar nisawwi cheyy didd amur Allah wa ana be nafsi ma nagdar nisawwi kheer wa la charr. Ana nuguul illa l-kalaam al-Allah gaalah bas.›»
Balʼaam wassaf al-cheyy al-yukuun
14 Wa battaan Balʼaam gaal : «Hassaʼ, gubbaal ma nigabbil le chaʼabi, taʼaal niʼooriik be l-cheyy al-yisawwiih al-chaʼab da baʼadeen fi chaʼabak.» 15 Wa khalaas, bada be l-chiʼir wa gaal :
«Da kalaam Balʼaam wileed Baʼuur.
Da kalaam al-raajil al-yichiif adiil.
16 Da kalaam al-naadum
al-yasmaʼ kalaam al-Ilaah
wa indah ilim min al-Aali
wa wakit yasjud, uyuunah yinfathu
yichiif al-ruʼya
al-yiwassifha leyah Allah al-Gaadir.
17 Ana nichiif al-jaayi
wa laakin ma yaji hassaʼ.
Ana gaaʼid nichiifah
wa laakin ma min gariib.
Min zurriiyit Yaakhuub tatlaʼ najma
wa min Bani Israaʼiil yaji malik.
Be asaat mulkah yaksir jabhat Muwaab
wa yaktul kulla zurriiyit Chiit.
18 Wa balad Adoom yichiilha
wa yichiil Saʼiir balad udwaanhum
wa Bani Israaʼiil gudrithum tiziid.
19 Wa yaji malik gawi
min zurriiyit Yaakhuub
wa yidammir al-naas
al-faddalo fi l-madiina.»
20 Wa Balʼaam chaaf balad al-Amaalikh wa bada be l-chiʼir wa gaal :
«Amaalikh hu al-awwal fi l-umam
wa laakin fi l-akhiir yiddammar.»
21 Wa Balʼaam chaaf balad al-Khiiniyiin wa bada be l-chiʼir wa gaal :
«Buyuutku gaaʼidiin be amaan
misil uchuuch fi raas al-hajar.
22 Laakin balad al-Khiiniyiin tahrag be naar
wakit Achuur yakrubku masaajiin.»
23 Wa battaan Balʼaam bada be l-chiʼir wa gaal :
«Ya khasaaritna ! Yaatu yagdar yiʼiich
kan al-Ilaah bas jaʼalah misil da ?
24 Fi sufun yaju min Khubrus.
Yazulmu Achuur wa yazulmu Ibaar
wa humman kula yiddammaro.»
25 Wa khalaas, Balʼaam gabbal baladah wa Balaakh kula chaal derbah.
© Arabe tchadien (alphabet latin) Bible © Alliance Biblique du Tchad, 2019.
