Al-fasaad fi l-zaman al-akhiir
1 Waajib taʼarif kadar al-zaman al-akhiir yabga zaman gaasi bilheen. 2 Wa fi l-zaman da, al-naas yihibbu nufuushum be ziyaada wa yihibbu al-gurus bilheen. Wa yabgo fachchaariin wa mustakbiriin wa yikallumu kalaam kufur wa yabgo aaykhiin waaldeenhum wa nassaayiin al-kheer wa faasdiin. 3 Wa ma induhum mahanna wa yaabo ma yisaamuhu. Wa yabgo gattaaʼiin wa ma gaadriin yisabbutu nufuushum wa yabgo kachraaniin wa yakraho al-kheer. 4 Wa yabgo khaayniin wa mutaʼammidiin wa fachchaariin. Wa yihibbu halaat al-dunya ziyaada min Allah. 5 Wa yinkarbu fi l-chokhol al-yiwassif al-takhwa laakin fi guluubhum yaabo ma yitaabuʼu al-takhwa.
Angariʼ min al-naas al-misil dool. 6 Waahidiin minhum yindasso fi buyuut al-naas be najaada. Wa yakurbu be khachch awiin al-fikirhin ma saabit al-malaanaat be zunuub wa gaaʼidaat yitaabiʼan kulla nafar hana chahwaat. 7 Al-awiin al-misil deel yasmaʼan taʼliim katiir wa abadan ma yagdaran yafhaman al-hagg. 8 Wa l-khachchaachiin dool gaaʼidiin yikhaalufu al-hagg misil Yaniis wa Yambaaris al-khaalafo Muusa. Fikirhum talfaan wa iimaanhum baatil. 9 Laakin ma yanjaho achaan baʼad chiyya, yabga waadih le kulla l-naas kadar kalaamhum baatil. Wa yabga leehum misil al-cheyy al-bigi le Yaniis wa Yambaaris.
Agood saabit
10 Laakin inta raafagtini wa taʼarifni. Chiftini wakit ana gaaʼid niʼallim al-naas wa taʼarif haali wa niiyti fi kulli cheyy. Taʼarif iimaani wa sabri wa mahabbiti wa galbi al-saabit. 11 Inta chiftini wakit al-naas gaaʼidiin yitaʼʼubuuni wa wakit taʼab chadiid ja foogi. Wa chiftini fi kulli cheyy al-gaasi al-bigi foogi fi hillaal Antaakiya wa Iguuniya wa Listara. Himilt fooghum taʼab chadiid marra waahid. Laakin Rabbina fazaʼni wa najjaani min al-taʼab da kulla ke. 12 Wa akiid ayyi naadum al-yidoor yinkarib fi l-takhwa fi derib al-Masiih Isa, yitaʼʼubuuh. 13 Wa laakin al-naas al-fasliin wa l-kaddaabiin, fasaalithum tiziid be ziyaada wa yabgo khachchaachiin wa makhchuuchiin.
14 Laakin inta, agood saabit fi kulli cheyy al-allamtah wa aamant beyah be iimaan gawi. Taʼarif kadar al-naas al-allamook leyah amiiniin. 15 Min inta sakhayyar, irift kitaab Allah al-antaak al-ilim al-yiwaddiik le l-naja be l-iimaan be l-Masiih Isa. 16 Al-Kitaab kulla ke hu kalaam Allah al-nazzalah wa indah faayde achaan yiʼallim al-hagg wa yiwassif al-naas khataahum wa yigabbilhum fi l-derib al-adiil wa yidarribhum fi l-haal al-saalhe. 17 Wa beyah khaddaam Allah yabga gaadir wa jaahiz achaan yisawwi ayyi amal hana kheer.
© Arabe tchadien (alphabet latin) Bible © Alliance Biblique du Tchad, 2019.
