Al-malik charraf Mardakaay
1 Wa fi l-leele di, al-noom aba uyuun al-malik. Wa khalaas, amar yijiibu kitaab al-taariikh hana l-mamlaka. Wa humman jaabooh wa garooh giddaam al-malik. 2 Wa ligo al-bakaan al-Mardakaay bayyan khittat Bigtaan wa Tarach hurraas al-itneen al-yahfado madkhal gasir al-malik. Humman al-fattacho tariiga le yaktulu al-malik Achawiruuch. 3 Wa l-malik gaal : «Chunu al-charaf wa l-mukaafa al-antoohum le Mardakaay fi chaan al-cheyy da ?» Wa l-subyaan al-yakhdumu leyah gaalo : «Ma charrafooh be cheyy.»
4 Wa l-malik gaal : «Yaatu al-gaaʼid fi l-fadaay ?» Wa fi nafs al-wakit da, Hamaan ja fi l-fadaay al-barraaniiye hana l-gasir achaan yihajji le l-malik yiʼallugu Mardakaay fi raas al-uud al-hu jahhazah leyah. 5 Wa l-subyaan gaalo le l-malik : «Hamaan bas gaaʼid barra fi l-fadaay.» Wa l-malik gaal : «Khalli yadkhul.» 6 Wa Hamaan dakhal wa l-malik gaal leyah : «Yisawwu chunu le l-naadum al-malik yidoor yicharrifah ?» Wa Hamaan gaal fi nafsah : «Le yaatu battaan al-malik yidoor yantiih charaf ziyaada minni ana ?»
7 Wa khalaas, Hamaan radda le l-malik wa gaal : «Kan al-malik yidoor yicharrif naadum, 8 khalli yantuuh khalag al-libsah al-malik wa juwaad al-rikib foogah al-malik wa yukhuttu fi raas al-juwaad da taaj al-mamlaka. 9 Wa yantu al-khalag wa l-juwaad le waahid min masaaʼiil al-malik wa yilabbusu al-naadum al-malik yidoor yicharrifah. Wa yirakkubuuh fi l-juwaad wa yiwadduuh fi l-nagaʼa hana l-hille wa yiʼiitu giddaamah wa yuguulu : ‹Daahu al-cheyy al-yisawwu le l-naadum al-malik yidoor yicharrifah.›»
10 Wa l-malik gaal le Hamaan : «Ajala chiil al-khalag wa l-juwaad misil inta gultah wa sawwiih le Mardakaay al-Yahuudi al-gaaʼid fi khachum baab gasir al-malik. Ma tikhalli cheyy min kulla l-kalaam al-inta gultah.»
11 Wa khalaas, Hamaan chaal al-khalag wa l-juwaad wa labbas al-khalag le Mardakaay wa rakkabah fi l-juwaad wa waddaah fi l-nagaʼa hana l-hille wa gaaʼid yiʼiit giddaamah wa yuguul : «Daahu al-cheyy al-yisawwu le l-naadum al-malik yidoor yicharrifah.»
12 Wa baʼad da, Mardakaay gabbal fi khachum baab gasir al-malik. Wa Hamaan kamaan gabbal ajala le beetah haznaan wa mukhatti raasah min al-eeb. 13 Wa Hamaan khabbar martah Zarach wa kulla rufgaanah be l-cheyy al-hasal. Wa rufgaanah al-hakiimiin wa martah gaalo leyah : «Kan giddaam Mardakaay al-Yahuudi da bas inta badeet tiʼiib, inta ma tagdar tisawwi cheyy diddah. Wa laakin daayman tabga aayib giddaamah.» 14 Wa wakit lissaaʼhum gaaʼidiin yihajju maʼaayah ke bas, khaddaamiin al-malik jo wa waddo Hamaan ajala fi l-aazuuma al-sawwatha Astiir.
© Arabe tchadien (alphabet latin) Bible © Alliance Biblique du Tchad, 2019.
