Al-hukkaam Tuulaʼ wa Yayiir
1 Wa baʼad moot Abiimalik, Tuulaʼ wileed Fuwwa wileed Duudu al-min gabiilat Yassaakar gamma le yinajji Bani Israaʼiil. Wa hu saakin fi Chamiir fi jibaal Afraayim. 2 Hu hakam fi Bani Israaʼiil 23 sana. Wa baʼad da, maat wa dafanooh fi Chamiir.
3 Wa baʼadah gamma Yayiir al-min turaab Gilʼaad wa hakam fi Bani Israaʼiil 22 sana. 4 Wa hu indah 30 awlaad raakbiin fi 30 duhuuch wa induhum 30 hillaal al-bisammuuhum lahaddi l-yoom furgaan Yayiir fi turaab Gilʼaad. 5 Wa Yayiir maat wa dafanooh fi Khaamuun.
Bani Ammuun hajamo Bani Israaʼiil
6 Wa Bani Israaʼiil gammo battaan yisawwu al-fasaala giddaam Allah. Wa abado asnaam Baʼal wa Achtaruut wa ilaahaat hana buldaan aakhariin, misil Araam wa Seeda wa Muwaab wa Bani Ammuun wa l-Filistiyiin. Wa humman abo Allah wa battaan ma abadooh. 7 Wa Allah khidib khadab chadiid didd Bani Israaʼiil wa sallamaahum le l-Filistiyiin wa Bani Ammuun. 8 Wa min al-wakit da, humman rihko Bani Israaʼiil wa zalamoohum fi muddit 18 sana lahaddi kulla Bani Israaʼiil al-gaaʼidiin sabaah le bahar al-Urdun fi balad al-Amuuriyiin fi turaab Gilʼaad. 9 Wa Bani Ammuun gataʼo bahar al-Urdun achaan yihaarubu gabaayil Yahuuza wa Banyaamiin wa Afraayim. Wa Bani Israaʼiil addaayago mudaayaga chadiide.
10 Wa khalaas, Bani Israaʼiil sarakho le Allah wa gaalo : «Sahiih, aniina aznabna achaan abeenaak inta Ilaahna wa abadna asnaam Baʼal.» 11 Wa Allah gaal le Bani Israaʼiil : «Wakit al-Masriyiin wa l-Amuuriyiin wa Bani Ammuun wa l-Filistiyiin 12 wa l-Seeduuniyiin wa l-Amaalikh wa l-Maaʼooniyiin zalamooku wa wakit sarakhtu leyi, ana ma najjeetku minhum walla ? 13 Wa laakin intu abeetuuni wa abadtu leeku ilaahaat aakhariin wa fi chaan da, ana ma ninajjiiku battaan. 14 Yalla ! Amchu asrakho le ilaahaatku al-intu azaltuuhum. Khalli humman bas yafzaʼooku wakit tatʼabo !» 15 Wa Bani Israaʼiil gaalo le Allah : «Sahiih, aniina aznabna. Sawwi foogna kulla cheyy al-tidoorah wa laakin najjiina al-yoom.» 16 Wa humman baʼʼado minhum al-ilaahaat al-ajnabiyiin wa abado Allah. Wa hu hanna fooghum fi chaan taʼabhum.
17 Wa deech Bani Ammuun lammo wa khatto muʼaskarhum fi Gilʼaad. Wa Bani Israaʼiil lammo wa khatto muʼaskarhum fi Misfa. 18 Al-chaʼab wa kulla kubaaraat Gilʼaad gaalo ambeenaathum : «Al-raajil al-yabda al-harib maʼa Bani Ammuun, hu da bas yabga kabiir fi kulla sukkaan Gilʼaad.»
© Arabe tchadien (alphabet latin) Bible © Alliance Biblique du Tchad, 2019.
