Al-azaab le kubaaraat Israaʼiil
1 Al-azaab leeku intu
al-gaaʼidiin murtaahiin fi jabal Sahyuun
wa l-gaaʼidiin be amaan fi jabal al-Saamira.
Intu tahsubu nufuusku ahsan naas fi ahsan umma
wa kulla Bani Israaʼiil yaju leeku intu.
2 Amchu le hillit Kalna
wa chiifu al-bigi foogha
wa minha fuutu
le madiinat Hamaat al-kabiire
wa battaan amchu
Gaat madiinat al-Filistiyiin.
Hal mamaalikhum akheer
min mamlakatku walla ?
Wa arduhum akbar
min arduku walla ?
3 Wa wakit intu tahsubu yoom al-diige baʼiid bilheen,
be da, intu tigarrubu yoom al-unuf leeku.
4 Intu raagdiin fi saraayir
al-mujammaliin be aaj
wa gaaʼidiin murtaahiin
fi furaachku.
Wa taakulu laham al-kubchaan
wa l-ajjaal al-maʼzuuliin min al-zariibe.
5 Wa tikhannu maʼa l-jigindiiye
le tibaazu Dawuud
wa tasnaʼo le nufuusku aalaat hana khine.
6 Wa tacharbo al-khamar be kharaariif
wa tusubbu ahsan itir.
Wa laakin ma gaaʼidiin tahzano
le damaar zurriiyit Yuusuf.
7 Wa achaan da, hassaʼ tabgo awwal naas
al-yakurbuuhum wa yiwadduuhum fi l-khurba.
Wa l-raaha al-intu aaychiin foogha di
kula tabga ma fiiha.
Damaar al-aasima
8 Allah al-Rabb halaf be nafsah
wa daahu kalaam Allah :
«Ana Allah al-Ilaah al-Gaadir
nakrah istikbaar Bani Israaʼiil.
Wa nabkhud gusuurhum
wa nisallim madiinithum
wa kulla cheyy al-indaha le aduuhum.
9 Wa kan achara naas gaaʼidiin fi beet waahid,
kulluhum yumuutu.
10 Wa l-gariib le l-maytiin
yamchi yichiil al-janaazaat
le yahrighum barra min al-beet.
Wa yuguul le l-naadum al-faddal
daakhal fi lubb al-beet :
‹Naadum maʼaak fi walla ?›
Wa hu yuguul : ‹La !›
Wa l-gariib yuguul : ‹Askut !
Ma tinaadi usum Allah.›»
11 Wa khalaas, daahu amur Allah.
Al-buyuut al-kubaar yiddammaro
wa l-dugaag yilkassaro.
12 Wa hal al-kheel
yagdaro yajru fi raas al-hajar walla ?
Wa hal al-tiiraan
yagdaro yajbudu al-harraata fi raas al-hajar walla ?
Wa maala baddaltu al-adaala be l-samm
wa sawweetu al-hagg murr misil al-hamdal ?
Al-nasur al-ma indah faayde
13 Wa intu tafraho achaan nasartu fi hillit Luudabaar wa tuguulu : «Be gudritna bas, chilna hillit Garnaayim.» 14 Wa daahu kalaam Allah al-Ilaah al-Gaadir : «Ya Bani Israaʼiil, ana nirassil leeku umma tidaayigku min khachum hillit Labu Hamaat fi l-munchaakh lahaddi waadi al-Urdun fi l-wati.»
© Arabe tchadien (alphabet latin) Bible © Alliance Biblique du Tchad, 2019.
