Ikhaab balad Yahuuza wa l-Khudus
1 Daahu Allah al-Rabb al-Gaadir
yagtaʼ kulla l-musaaʼadaat
min balad Yahuuza wa Madiinat al-Khudus,
kulla l-musaaʼadaat wa l-mawaarid
hana l-akil wa l-charaab.
2 Wa yamrug min lubbuhum
al-faaris wa l-raajil al-muhaarib,
al-gaadi wa l-nabi,
al-chawwaafi wa l-cheekh,
3 khaayid al-khamsiin wa l-mukarram,
al-mustachaar wa l-sinaaʼi al-indah khibra
wa l-mutakhassis fi l-sihir.
4 Allah gaal :
«Nukhutt fi badalhum subyaan
le yabgo kubaaraathum
aywa, iyaal dugaag
yahkumu fooghum.»
5 Al-chaʼab yiddaayago,
al-raajil yidaayig raajil
wa raajil yidaayig akhuuh.
Wa l-sabi yitaʼʼib al-chaayib
wa l-mahguur yitaʼʼib al-indah charaf.
6 Wa naadum yakrub akhuuh
al-min aayiltah wa yuguul leyah :
«Inta indak khalag, abga khaayidna !
Wa l-kharaab da yabga tihit sultitak.»
7 Wa fi l-yoom da, akhuuh yuguul :
«Ana ma nagdar niʼaalijku.
Fi beeti kula, ma fi akil wa la khalag.
Ma tidarrujuuni khaayid al-chaʼab !»
8 Madiinat al-Khudus tittartaʼ
wa balad Yahuuza tagaʼ.
Achaan humman atmarrado didd Allah
be kalaamhum wa amalhum
wa abo majdah.
9 Amalhum yinchaaf fi wujuuhhum
wa humman bigo misil naas Saduum al-hajjo be zunuubhum,
ma labbadoohum.
Al-azaab leehum !
Achaan humman jahhazo
al-fasaala le nufuushum.
10 Guulu : «Al-saalihiin yafraho
achaan yaakulu min intaaj amalhum.»
11 Al-azaab le l-aasiyiin !
Humman yalgo al-fasaala,
achaan yijaazuuhum
hasab al-sawwooh iideehum.
12 Ya chaʼabi !
Al-yidaayuguuku iyaal dugaag
wa l-yahkumu foogku awiin.
Ya chaʼabi !
Al-yuguuduuku yiwadduruuku
wa yiwadduuku fi l-derib al-aʼwaj.
Ikhaab al-yifajjukhu chaʼab Allah
13 Allah gamma le yichaariʼ
wa le yiʼaakhib al-chuʼuub.
14 Allah yihaakim kubaaraat chaʼabah
wa masaaʼiilhum.
Wa yuguul :
«Intu dammartu jineenaat al-inab !
Wa l-khumaam al-saragtuuh min al-masaakiin
gaaʼid fi buyuutku.
15 Maala tifajjukhu chaʼabi ?
Maala tidissu wujuuh al-masaakiin fi l-turaab ?»
Wa da kalaam Allah al-Rabb al-Gaadir.
Ikhaab al-awiin
16 Wa Allah gaal :
«Banaat Sahyuun mustakbiraat,
yarfaʼan ruuseehin
wa yaktulan uyuunhin.
Wa yikoolifan fi machiihin
wa yiharrikan hujuulhin.»
17 Achaan da, al-Rabb yigawwim guub
fi ruuse banaat Sahyuun
aywa, Allah yiʼarri jabhaathin.
18 Wa fi l-yoom da, al-Rabb yamrug minhin
ziinithin hana l-hujuul
wa l-zaytuun wa l-hafaayid
19 wa l-khuruus wa l-suure wa l-laffaahaat
20 wa l-tarhaat wa l-saal wa l-karraabaat
wa gazzaaz al-itir dugaag wa l-waragaat.
21 Aywa, al-Rabb yamrug minhin
al-khawaatim wa l-chanafa
22 wa khulgaan al-iid wa l-manaadiil
wa l-ibaayaat wa l-makhaali
23 wa l-chawwaafaat wa l-tiibaan
wa khimaar al-raas wa l-rabbaataat.
Aywa, al-Rabb yamrug minhin
kulla ziinithin.
24 Badal al-itir,
tinchamma fooghin al-afana
wa badal al-karraab,
yarbutan habil.
Badal al-muchaat,
yizzayyanan
wa badal al-khalag al-sameh,
yalbasan chuwaal
wa badal al-jamaal,
wujuuhhin yahragan.
Araamil Madiinat al-Khudus
25 Ya Madiinat al-Khudus !
Rujaalki yumuutu fi l-harib
wa furraaski yumuutu fi l-duwaas.
26 Wa sukkaanki yabku wa yahzano
misil mara al-waddarat kulla cheyy
wa gaʼadat fi l-turaab.
© Arabe tchadien (alphabet latin) Bible © Alliance Biblique du Tchad, 2019.
