Niinawa anmalat be l-janaazaat
1 Al-azaab le madiinat al-damm.
Hi kullaha ke malaane be kidib wa nahib
wa daayman al-dimme waagʼe foogha.
2 Wa fi l-madiina, yinsamiʼ hiss al-soot
wa harakat dawaraan al-ajalaat
Wa l-kheel yigallubu
wa arabaat al-harib yinattutu.
3 Wa siyaad al-kheel yahjumu
wa l-suyuuf yaburgu
wa l-huraab yiraaru.
Wa l-majruuhiin katiiriin
wa l-jisas ma induhum hisaab
wa l-maytiin bala adad
lahaddi l-naas yittartaʼo fi l-janaazaat.
Allah yiʼaakhib Niinawa al-charmuuta
4 Madiinat Niinawa achcharmatat misil charmuuta
wa hi sitt al-jamaal wa sitt al-sihir.
Hi abbadat al-umam be charmatatha
wa abbadat al-gabaayil be sihirha.
5 Daahu kalaam Allah al-Gaadir :
«Akiid ana nugumm diddiki
wa narfaʼ khalagki
wa nukhuttah leeki fi wijihki.
Wa niwassif ireeki le l-umam
wa eebki le l-mamaalik.
6 Wa nukhutt leeki fi raaski kulla muharramaatki
wa niʼayyibki
wa nisawwiiki masal le l-aakhariin.
7 Wa ayyi naadum al-yichiifki
yajri minki baʼiid wa yuguul :
‹Niinawa khirbat.
Yaatu al-yihinn foogha ?
Wa min ween nalga naas
al-yisabburuuha ?›»
Niinawa tagaʼ misil madiinat Tiiba
8 Ya Niinawa, tahsibi nafiski
akheer min madiinat Tiiba
al-fi balad Masir walla ?
Hi gaaʼide ambeenaat rujuul al-Niil
wa almi haayigha.
Wa bahar haamiiha wa bahar durdurha.
Wa be da kula, hi ma nijat.
9 Balad al-Habacha wa balad Masir,
dool khuwwitha al-abadan ma tikammil.
Wa balad Fuut wa balad Liibiya kula
fazaʼha.
10 Wa laakin madiinat Tiiba kula chaalooha
wa waddo sukkaanha fi l-khurba.
Wa atfaalha kataloohum
fi kulla chawaariʼha.
Wa le siyaad al-charaf hana l-madiina,
al-udwaan gassamoohum be amʼiyeedaat
le yisawwuuhum abiid.
Wa kubaaraat Tiiba kula
janzaroohum.
11 Aywa, ya Niinawa,
inti taskare min al-taʼab wa tillabbade
wa tifattichi bakaan al-taljaʼe foogah
min udwaanki.
Askar Niinawa bigo daʼiifiin
12 Ya madiinat Niinawa,
kulla bakaanaatki al-gawiyiin
misil al-tiin al-najiid.
Kan al-riih tihizzah,
yagaʼ fi khachum al-jiiʼaan.
13 Chiifi askarki !
Bigo fi usutki daʼiifiin misil al-awiin.
Wa biibaanki anfataho marra waahid le udwaanki
wa l-naar akalat hawaadirhum.
14 Amle khazzaanaatki almi
gubbaal ma yihaasuruuku
wa chaddidi bakaanaatki al-gawiyiin.
Wa chiili tiine wa ajjiniiha
wa sallili leeki diringeel.
15 Wa be da kula, al-naar taakulki
wa l-seef yiwaddirki.
Wa l-udwaan yaakuluuki
misil al-jaraad yaakul al-zereʼ.
Ya Niinawa, sukkaanki bigo katiiriin misil jaraad
aywa, katiiriin misil saar al-leel.
16 Wa kattarti adad tujjaarki
ziyaada min nujuum al-sama.
Wa laakin hassaʼ, humman misil jaraad
yifattuhu janaaheehum
wa yitiiru khalaas.
17 Wa hurraaski misil jaraad
wa khuyyaadki misil sahaabaayit saar al-leel
al-yanzil fi l-zaraayib fi wakt al-barid.
Wa laakin wakit al-harraay tatlaʼ,
yiʼarrid wa ma yaʼarfu ween hu macha.
18 Ya malik balad Achuur,
furraasak sakato
wa masaaʼiilak al-misil ruʼyaan maato.
Wa chaʼabak chatto fi l-jibaal misil al-khanam
wa ma fi raaʼi al-yilimmuhum.
19 Wa jiraahak ma yilʼaalaj
wa da jiraah al-yaktul.
Wa kulla l-naas al-simʼo khabarak,
yisaffugu wa yafraho.
Achaan kulla l-naas daakho fasaaltak
al-ma indaha hadd.
© Arabe tchadien (alphabet latin) Bible © Alliance Biblique du Tchad, 2019.
