Allah azal al-malik Kuurach
1 Wa daahu Allah gaal le l-naadum al-hu masahah wa darrajah malik :
«Leek inta, ya Kuurach,
ana karabtak min iidak al-zeene
le narmi al-umam giddaamak.
Ana nihill hizaam al-muluuk
wa nufukk giddaamak biibaan al-mudun
wa battaan ma yukuunu magfuuliin.
2 Ana zaati namchi giddaamak
wa le l-giizaan, nisaawiihum.
Wa le biibaan al-nahaas, nikassirhum
wa le gafala al-hadiid, nifallithum.
3 Ana nantiik kanz al-madfuun fi l-dalaam
wa l-khuna al-mulabbada.
Wa be da, inta taʼarif
kadar ana Allah bas
naadeetak be usmak,
ana Ilaah Bani Israaʼiil.
4 Fi chaan Yaakhuub abdi
wa fi chaan Israaʼiil al-ana azaltah,
ana naadeetak be usmak
wa darrajtak gabul ma taʼarifni.
5 Wa ana Allah.
La ilaah illa ana
wa ma fi ilaah balaayi.
Ana rabatt leek hizaam al-gudra
gabul ma taʼarifni.
6 Da le yaʼarfu min taluuʼ al-harraay lahaddi waguuʼha
kadar ma fi cheyy balaayi.
Ana Allah wa la ilaah illa ana.
7 Ana kawwant al-nuur
wa khalagt al-dalaam.
Wa sawweet al-salaam
wa khalagt al-fasaala
wa ana Allah nisawwi kulla l-cheyy.
8 Khalli al-sama min foog tinazzil al-karany
wa l-sahaab yinazzil al-adaala.
Wa khalli al-ard tinfatih
wa tamrug al-naja
wa tinawwir al-adaala.
Ana Allah bas khalagtuhum.»
9 Al-azaab le l-naadum al-yihaarij al-kawwanah
hu al-misil jarr al-tiine fi ust al-jiraar.
Hal al-tiine tagdar tuguul le l-yuduggaha :
«Tisawwi chunu ?»
Hal al-jarr yagdar yuguul le l-daggaag :
«Inta ma indak iid walla ?»
10 Al-azaab le l-yuguul le abuuh :
«Maala jibt iyaal ?»
Al-azaab le l-yuguul le ammah :
«Maala wilidti ?»
11 Wa daahu Allah Khudduus Israaʼiil al-kawwanaahum gaal :
«Asʼalooni fi achya hana l-mustakhbal
wa laakin kan le iyaali
wa l-achya al-sawweethum be iidi,
khalluuhum leyi ana bas.
12 Ana bas sawweet al-ard
wa khalagt al-insaan al-yaskunu foogha.
Be iidi ana bas, falleet al-samaawaat
wa anteet amur le kulla khuwwaatha.
13 Ana bas jibt Kuurach le yisawwi al-adaala
wa niʼaddil kulla duruubah.
Hu yabni battaan madiinti
wa chaʼabi al-waddoohum fi l-khurba
yatlighum bala taman wa la ujra.»
Wa da, Allah al-Gaadir bas gaalah.
14 Wa daahu Allah gaal :
«Natiijat Masir
wa ribih min balad al-Habacha
wa rujaal Saba al-tuwaal,
kulla l-achya dool yawsalo leek wa yabgo hanaak.
Al-naas dool yamchu waraak.
Humman dool yamchu mujanzariin
wa yasjudu giddaamak
wa yachhadook wa yuguulu :
‹Sahiih Allah maʼaak
wa ma fi ilaah illa hu
wa ma fi ilaah aakhar.›»
15 Akiid, inta Ilaah al-ma tinchaaf
wa inta Ilaah Bani Israaʼiil al-munajji !
16 Wa l-yasnaʼo al-asnaam,
kulluhum aaybiin wa khajlaaniin
wa kulluhum sawa maachiin fi l-khajla.
17 Laakin kan le Bani Israaʼiil, Allah yinajjiihum
wa l-naja di ila l-abad.
Wa battaan intu ma tabgo aaybiin wa la khajlaaniin,
daayman wa ila l-abad.
18 Achaan daahu kalaam Allah, khaalig al-samaawaat wa hu al-Ilaah al-sawwa al-ard wa kawwanha wa sabbatha. Hu ma khalagaaha le tagood faadiye laakin kawwanha le yaskunuuha. Hu gaal :
«Ana Allah wa ma fi ilaah illa ana.
19 Ana ma hajjeet be sirr
fi bakaan adlam fi l-ard.
Wa ana ma gult le zurriiyit Yaakhuub :
‹Fattuchuuni fi l-faadi !›
Ana Allah nihajji be l-adaala
wa nikallim be l-hagg.
20 Limmu wa taʼaalu !
Garrubu sawa, intu al-faddaltu min al-umam !
Intu ma taʼarfu cheyy,
intu al-chaayliin asnaamku hana hatab
wa tasʼalo ilaahaatku al-ma yinajjuuku.
21 Khabburu wa garrubu
wa limmu sawa wa achchaawaro !
Yaatu hajja beyah min zamaan
wa khabbar beyah min al-wakit al-faat ?
Ma ana Allah walla ?
Wa la ilaah illa ana !
Ana Ilaah al-saadikh wa l-munajji
wa ma fi ilaah aakhar illa ana.
22 Intu kulluku al-fi aakhir al-ard,
wajjuhu aleyi ana wa tanjo !
Achaan ana Allah
wa la ilaah illa ana.
23 Ana halaft be nafsi wa gult
min khachmi yamrug kalaam al-adaala
wa l-kalaam da ma yinnagid.
Kulla rukba tabruk giddaami
wa ayyi lisaan yachhad kadar ana Allah.
24 Wa yihajju beyi wa yuguulu :
‹Fi Allah bas yinlagu
al-nasur wa l-gudra.›
Kulla l-gammo be zaʼal diddi
yaju giddaami aaybiin.
25 Wa beyi ana Allah, kulla zurriiyit Israaʼiil
yabgo saalihiin wa yahmuduuni.»
© Arabe tchadien (alphabet latin) Bible © Alliance Biblique du Tchad, 2019.
