Yaakhuub yibaarik awlaadah
1 Wa baʼad da, Yaakhuub gaal le iyaalah : «Limmu taʼaalu, ana nibaarikku wa nikhabbirku be l-cheyy al-baʼadeen yukuun leeku.
2 «Taʼaalu wa asmaʼo, ya iyaal Yaakhuub.
Asmaʼooni ana abuuku Israaʼiil.
3 «Ya Raʼuubiin, inta wileedi al-bikir,
inta bas al-awwal wilidtak
wakit indi gudra.
Inta futt akhwaanak be l-charaf
wa be l-gudra hana l-bukuuriiye.
4 Laakin inta ma talga al-kubuuriiye
achaan inta gammeet
misil almi faayir.
Chahwatak khalabatak
wa dakhalt fi marti
wa tallaft charafi.
5 «Chimʼuun wa Laawi humman akhwaan
wa astafago le yisawwu al-unuf.
6 Laakin ana ma nichtarik maʼaahum
wa galbi ma yarda be fiʼilhum da.
Achaan fi zaʼalhum,
humman katalo rujaal
wa fi khabiinithum,
awwago tiiraan.
7 Ana nalʼan zaʼalhum al-cheen
wa khabiinithum al-fasle.
Ana nichattit iyaalhum
fi lubb gabiilat Yaakhuub
wa yagoodu mufarragiin
fi turaab Israaʼiil.
8 «Ya Yahuuza, akhwaanak yachkuruuk
wa udwaanak yidanguru leek
wa akhwaanak yasjudu leek.
9 Ya Yahuuza, inta misil farkh al-duud
al-gamma min rimmitah
Inta misil duud al-ragad aw duudaay,
yaatu yagdar yigawwimah ?
10 Asaat al-muluk
tagood fi aayilat Yahuuza
wa asaat al-hukum kula
ma tamrug min iideehum
lahaddi yaji al-naadum
al-waajib leyah al-muluk.
Wa kulla l-chuʼuub yikarrumuuh.
11 Fi chadarat al-inab
yarbut humaarah
aywa, fi chadarat al-inab al-samha
yarbut dahachah.
Fi l-khamar yikhassil khalagah
fi asiir al-inab yikhassil lubaasah.
12 Wa uyuunah humur min al-khamar
wa sunuunah buyud ziyaada min al-laban.
13 «Zabuluun yaskun fi khachum al-bahar
bakaan al-maraakib al-kubaar yagiifu foogah.
Wa huduud turaabah
yiwassulu lahaddi hillit Seeda.
14 «Yassaakar misil humaar al-chadiid
al-raagid fi l-zariibe.
15 Hu chaaf al-bakaan al-raagid foogah da sameh
wa l-balad di haluuwe.
Wa dangar le yichiil al-tagala
wa khassad le yakhdim misil abid.
16 «Daan kula yahkim chaʼabah
misil Bani Israaʼiil al-aakhariin
yahkumu gabaayilhum.
17 Daan misil al-daabi
fi l-derib
wa hu misil amchideegaat
fi khachum al-tariig.
Hu yiʼaddi rijil al-juwaad
wa yarmi al-raakib.
18 «Ya Allah, narja fazaʼak !
19 «Gaad, al-haraamiyiin hajamooh
laakin hu khalabaahum wa taradaahum.
20 «Turaab Achiir yigawwim maʼaach katiir
al-yabga akil sameh le l-muluuk.
21 «Naftaali misil khazaalaay al-hurra
al-tijiib iyaal samhiin.
22 «Yuusuf misil chadara
al-gaaʼide jamb al-almi
al-talda iyaal katiiriin
wa furuuʼha yatlaʼo foog
min al-durdur.
23 Siyaad al-nubbaal jakhkhooh
wa haarajooh wa haarabooh.
24 Laakin hu karab nubbaalah adiil
wa iideenah saabtiin.
Talga al-baraka
be gudrat Allah al-Jabbaar, Ilaah Yaakhuub,
aywa, be usum Allah al-Raaʼi al-yahmi Israaʼiil.
25 Aywa, be gudrat Allah al-Gaadir Ilaah abuuk,
inta talga al-baraka wa l-musaaʼada.
Talga al-baraka
hana l-matara al-tanzil min al-sama
wa l-almi al-yatlaʼ min al-ard.
Talga al-baraka
hana waaluudit al-awiin
wa l-bahaayim.
26 Wa l-baraka al-talgaaha
min abuuk di,
hi faayte al-baraka
hana l-hujaar al-gudaam.
Wa l-achya al-haluwiin ziyaada
min maal hana l-jibaal al-zamaan.
Ya Yuusuf, khalli barakat abuuk tanzil fi raasak,
inta al-bigiit sultaan fi akhwaanak.
27 «Banyaamiin khatiir
misil marfaʼiin al-yaktul.
Be fajur, yahjim udwaanah
wa be achiiye, yigassim al-khaniime maʼa akhwaanah.»
28 Wa dool al-gabaayil al-atnaachar hana Israaʼiil. Wa da kalaam al-abuuhum gaalah wakit baarakaahum. Wa le ayyi waahid minhum baarakah baraka khaassa.
Moot Yaakhuub
29 Wa Yaakhuub kallam le iyaalah wa gaal : «Ana gariib numuut. Wa kan ana mutt, adfunuuni fi khabur juduudi. Wa l-khabur da, hu al-karkuur al-fi zereʼ hana Afruun al-Hitti. 30 Wa l-karkuur da fi zereʼ fi Makfiila sabaah le hillit Mamra, fi balad Kanʼaan. Wa Ibraahiim chara al-zereʼ da min Afruun al-Hitti achaan yabga bakaan hana khabur hanaayah halaalah. 31 Wa fi l-bakaan da bas, dafano Ibraahiim wa martah Saara wa wileedhum Ishaakh wa martah Rifga. Wa fi l-bakaan da bas, ana dafant marti Leeya. 32 Wa l-zereʼ wa l-karkuur dool, Ibraahiim charaahum min al-Hittiyiin.»
33 Wa wakit Yaakhuub kammal wasiiytah le iyaalah da, gabbal ragad wa khalaas maat wa lihig abbahaatah.
© Arabe tchadien (alphabet latin) Bible © Alliance Biblique du Tchad, 2019.
