Bani Ammuun ayyabo naas Dawuud
1 Wa baʼad da, Nahaach malik Bani Ammuun maat wa wileedah Hanuun hakam fi badalah. 2 Wa Dawuud gaal : «Nisawwi al-kheer le Hanuun wileed Nahaach misil al-kheer al-abuuh sawwaah leyi.»
Wa Dawuud rassal masaaʼiilah le Hanuun achaan yikalwudu leyah fi moot abuuh. Wa wakit humman wassalo fi balad Bani Ammuun, 3 kubaaraat al-balad gaalo le Hanuun siidhum : «Hal le yicharrif abuuk bas Dawuud rassal naasah achaan yikalwudu leek walla ? La, hu rassal naasah misil jawaasiis achaan yiʼakkudu min al-hille di wa baʼadeen yaju yichiiluuha.» 4 Wa khalaas, Hanuun karab masaaʼiil Dawuud wa zayyan nuss duguunhum wa gattaʼ khulgaanhum min ale jaʼabaathum. Wa baʼad da, taradaahum.
5 Wa khabbaro Dawuud be l-ihaana al-ziyaada al-bigat fi naasah. Wa hu rassal leehum naadum le yuguul leehum : «Agoodu fi hillit Ariiha lahaddi duguunku yugummu wa baʼad da, taʼaalu.»
Dawuud haarab Bani Ammuun
6 Wa naas Bani Ammuun irfo kadar humman bigo makruuhiin le Dawuud. Wa khalaas, jannado murtazakha 20 000 askar min al-Araamiyiin al-min hillit Beet Rahuub wa min al-Araamiyiin al-min hillit Suuba wa 1 000 raajil min balad al-malik Maʼaaka wa 12 000 min balad Toob. 7 Wa wakit Dawuud simiʼ be l-cheyy da, rassal Yuwaab maʼa kulla l-askar al-fahaliin didduhum. 8 Wa Bani Ammuun kamaan marago wa rasso le l-harib fi khachum baab al-hille. Wa l-Araamiyiin al-min hillit Suuba wa l-min hillit Rahuub wa naas Maʼaaka al-min balad Toob, humman dool gaʼado taraf fi l-khala. 9 Wa Yuwaab chaaf kadar hu wa naasah waajib yihaarubu majmuuʼteen, al-waahide waraahum wa l-aakhara giddaamhum. Wa khalaas, hu azzal naasah al-chudaad min Bani Israaʼiil wa gaabalaahum le l-Araamiyiin. 10 Wa naasah al-faddalo kamaan, kallaf beehum akhuuh Abichaay wa humman gaabalo Bani Ammuun.
11 Wa baʼad da, Yuwaab gaal le Abichaay : «Kan al-Araamiyiin khalabooni, inta taji tafzaʼni. Wa kan Bani Ammuun khalabook, ana naji nafzaʼak. 12 Chidd heelak, khalli nabgo rujaal ! Nidaafuʼu le chaʼabna wa le l-hillaal al-Ilaahna antaahum leena. Wa khalli Allah yisawwi al-cheyy al-yidoorah.»
13 Wa khalaas, Yuwaab wa l-askar al-maʼaayah macho le yihaarubu al-Araamiyiin al-gaaʼidiin taraf fi l-khala. Wa l-Araamiyiin dool arrado minhum. 14 Wa wakit Bani Ammuun chaafo al-Araamiyiin arrado, humman kula arrado min Abichaay wa gabbalo hillithum. Wa khalaas, Yuwaab khalla minnah al-duwaas didd Bani Ammuun wa gabbal Uruchaliim.
15 Wa laakin wakit al-Araamiyiin chaafo kadar Bani Israaʼiil annasaro fooghum, humman macho wa lammo kulla naashum. 16 Wa l-malik Hadadʼaazar rassal naas le yilimmu kulla l-Araamiyiin al-gaaʼidiin khaadi le bahar al-Furaat. Wa humman lammo fi hillit Hilaam. Wa fi raashum Chubak khaayid deech Hadadʼaazar.
17 Wa wakit khabbarooh le Dawuud, hu kula lamma kulla askar Bani Israaʼiil wa gataʼ bahar al-Urdun wa macha Hilaam. Wa l-Araamiyiin rasso gaabalooh le Dawuud wa haarabooh. 18 Laakin askar al-Araamiyiin arrado min Bani Israaʼiil. Wa wakit humman muʼarridiin, Dawuud wa askarah katalo 700 naas min siyaad arabaat al-harib wa katalo 40 000 min siyaad al-kheel. Wa darabo Chubak khaayid deech al-Araamiyiin wa hu maat fi l-bakaan da. 19 Wa wakit kulla l-muluuk al-gaaʼidiin tihit Hadadʼaazar irfo kadar Bani Israaʼiil annasaro fooghum khalaas, humman sawwo maʼaahum salaam wa gaʼado tihit hukumhum. Wa l-Araamiyiin khaafo wa battaan ma jo fazaʼo le Bani Ammuun.
© Arabe tchadien (alphabet latin) Bible © Alliance Biblique du Tchad, 2019.
