Kubuuriiyit Malkisaadikh
1 Wa Malkisaadikh da, hu malik hillit Chaaliim wa raajil diin hana Allah al-Aali. Wa hu laaga Ibraahiim wa baarakah wakit Ibraahiim mugabbil min al-bakaan al-annasar foogah fi l-muluuk. 2 Wa leyah hu, Ibraahiim anta al-uchur min kulla cheyy al-chaalah fi l-harib. Wa awwal cheyy, al-usum Malkisaadikh maʼanaatah al-malik al-aadil wa battaan hu malik Chaaliim, maʼanaatah malik al-salaam. 3 Wa fi l-Kitaab, hu ma indah abu wa la amm wa la gurma. Waktah ma indah bidaaya wa hayaatah ma indaha nihaaya laakin hu gaaʼid daayman misil Ibn Allah wa hu raajil diin ila l-abad.
4 Fakkuru fi kubuuriiytah. Ibraahiim zaatah antaah al-uchur min kulla cheyy al-chaalah fi l-harib wa Ibraahiim hu jiddina al-kabiir. 5 Wa l-naas al-min zurriiyit Laawi al-Allah jaʼalaahum rujaal diin induhum izin fi l-Tawraat achaan yichiilu al-uchur min al-chaʼab, yaʼni min akhwaanhum. Wa akhwaanhum dool kula min zurriiyit Ibraahiim. 6 Laakin Malkisaadikh da, hu ma min zurriiyit Laawi misilhum wa hu chaal al-uchur min Ibraahiim wa baarakah wa Ibraahiim hu bas al-naadum al-Allah antaah al-wuʼuud. 7 Wa bala chakak, al-naadum al-yanti al-baraka akbar min al-naadum al-yichiilha.
8 Wa misil da, al-Laawiyiin al-yichiilu al-uchur, humman al-naas al-yumuutu laakin Malkisaadikh al-chaal al-uchur, hu hayy hasab kalaam al-Kitaab. 9 Be masal aakhar, nagdaro nuguulu kadar iyaal Laawi al-yichiilu al-uchur zaathum anto al-uchur le Malkisaadikh be waasitat Ibraahiim 10 achaan Laawi lissaaʼ gaaʼid fi sulub jiddah Ibraahiim wakit Malkisaadikh laagaah.
Raajil diin misil Malkisaadikh
11 Wa khidmit rujaal al-diin al-min zurriiyit Laawi, hi asaas al-churuut al-Allah antaahum le l-chaʼab. Laakin kan khidmit rujaal al-diin al-min zurriiyit Laawi kaamile, maala Allah jaab raajil diin aakhar misil Malkisaadikh fi badal raajil diin misil Haaruun ?
12 Wa akiid kan khidmit rujaal al-diin khayyarat, laabudda al-churuut kula yikhayyuru. 13 Wa Isa al-nihajju beyah ma min zurriiyit Laawi. Wa min gabiiltah hu, abadan ma fi naadum al-kallafooh be dahaaya al-madbah. 14 Achaan Rabbina Isa hu min gabiilat Yahuuza wa da maʼruuf. Wa fi l-cheyy al-bukhuss gabiilat Yahuuza, Muusa abadan ma gaal cheyy fi rujaal al-diin.
15 Wa l-kalaam da yabga waadih bilheen wakit yaji raajil diin aakhar wa hu yichaabih Malkisaadikh. 16 Wa Isa bigi raajil diin be sabab gudrat hayaatah al-ma tikammil wa ma be sabab chart waahid min churuut al-Tawraat al-bukhuss zurriiyit al-naas. 17 Achaan al-Kitaab chahad le Isa wa gaal : <Inta bigiit raajil diin daayim misil Malkisaadikh.>
18 Wa khalaas, al-chart al-gadiim bigi baatil achaan ma yanfaʼ wa ma indah gudra. 19 Akiid, churuut al-Tawraat ma sawwo ayyi cheyy kaamil. Wa Allah jaab fi badalhum derib akheer ziyaada, al-beyah nigarrubu le Allah be acham ziyaada min awwal.
20 Wa battaan, fi cheyy aakhar wa hu haliifit Allah. Al-naas al-awwal bigo rujaal diin ma bigo be haliife. 21 Laakin Isa bigi raajil diin be haliifit Allah. Maktuub fi l-Kitaab : <Allah halaf wa hu yitimm kalaamah al-buguul : «Inta bigiit raajil diin daayim.»> 22 Be l-sabab da, indina muʼaahada akheer ziyaada wa Isa hu al-yadman leena al-muʼaahada di.
23 Wa battaan fi cheyy aakhar. Rujaal al-diin al-min zurriiyit Laawi dool katiiriin achaan humman yumuutu wa be da, ayyi waahid ma yagdar yitawwil fi khidimtah. 24 Laakin Isa hu raajil diin al-yagood daayman achaan hu hayy ila l-abad. 25 Be l-sabab da, hu daayman yagdar yinajji al-naas al-yigarrubu le Allah beyah hu achaan hu hayy daayman wa gaaʼid yasʼal leehum Allah daayman.
26 Wa be da, Isa bigi kabiir rujaal al-diin al-muwaafig leena marra waahid. Hu khudduus wa ma indah ayyi eeb wa hu daayman taahir. Hu maʼzuul baʼiid min al-muznibiin wa marfuuʼ foog fi l-samaawaat. 27 Isa hu ma misil kubaaraat rujaal al-diin al-aakhariin dool. Ma waajib leyah kulla yoom yigaddim dahiiye awwal fi chaan zunuubah hu wa baʼad da, yigaddim dahiiye fi chaan zunuub al-chaʼab. La. Hu gaddam dahiiye waahide bas wa nihaaʼiiye wa da wakit gaddam nafsah fi l-saliib. 28 Aywa, churuut al-Tawraat khatto naas daʼiifiin le yabgo kubaaraat hana rujaal al-diin. Laakin al-haliife al-jaat baʼad al-Tawraat khattat Ibn Allah kabiir rujaal al-diin. Wa Allah sawwaah kaamil ila l-abad.
© Arabe tchadien (alphabet latin) Bible © Alliance Biblique du Tchad, 2019.
