Allah kallam le Mariyam wa Haaruun
1 Wa yoom waahid, Mariyam wa Haaruun gammo didd Muusa be sabab al-mara al-hu akhadaaha min balad al-Habacha. 2 Wa humman gaalo : «Allah wa la kallam le Muusa wiheedah ? Hu ma kallam leena aniina kula walla ?» Wa Allah simiʼ kalaamhum. 3 Wa Muusa kamaan, hu raajil miskiin wa ma yichiif nafsah ziyaada min kula naas al-ard.
4 Wa tawwaali, Allah kallam le Muusa wa Haaruun wa Mariyam wa gaal leehum : «Intu al-talaata taʼaalu fi kheemat al-ijtimaaʼ.» Wa khalaas humman al-talaata macho. 5 Wa tawwaali, Allah nazal fi amuud hana sahaab wa wagaf fi khachum baab al-kheema wa naada Haaruun wa Mariyam wa humman zahafo giddaam. 6 Wa gaal : «Asmaʼo kalaami. Kan fi nabi fi usutku ana Allah niʼarrif nafsi leyah be ruʼya wa nikallim leyah wakit hu naayim. 7 Wa laakin da ma misil ana gaaʼid nisawwiih maʼa Muusa abdi achaan hu raajil amiin fi kulla chaʼabi. 8 Wa nikallim maʼaayah khachum be khachum be kalaam waadih ma mulabbad. Wa ana nibayyin nafsi leyah wa hu yichiifni ana Allah. Wa be da, maala ma khuftu wa gammeetu didd Muusa abdi ?»
9 Wa Allah khidib leehum khadab chadiid wa khalaas khallaahum. 10 Wa min al-sahaabaay gammat min al-kheema bas, khalaas Mariyam karabaaha al-jidaam wa hi bigat beeda karr misil al-laban. Wa Haaruun kula wakit anlafat hu chaaf hi mujaddime. 11 Wa Haaruun gaal le Muusa : «Ya siidi, Allah yikhalliik ! Ma tinazzil foogna ikhaab be sabab al-zanib al-sawweenaah misil ma indina raas. 12 Wa khalli Mariyam ma tabga misil sakhiir al-rumaaye al-marag min batun ammah nuss laham jildah maʼkuul.»
13 Wa fi chaan da, Muusa chahad Allah wa gaal : «Ya Ilaahi, achfiiha !» 14 Wa laakin Allah radda leyah wa gaal : «Kan abuuha bazakh leeha fi wijihha, al-khajla ma takrubha le muddit sabʼa yoom walla ? Wa achaan da, aturduuha barra min al-fariig le muddit sabʼa yoom wa baʼad da, khalli tigabbil.»
15 Wa be misil da, taradooha le Mariyam barra min al-fariig le muddit sabʼa yoom. Wa l-chaʼab ma saaro min bakaanhum lahaddi hi gabbalat. 16 Wa khalaas baʼad da, humman saaro min Hasiruut wa nazalo fi kadaadit Faaraan.
© Arabe tchadien (alphabet latin) Bible © Alliance Biblique du Tchad, 2019.
