Al-hikma tinaadi al-naas
1 Al-hikma gataʼat chiʼab sabʼa
wa beehum banat beetha.
2 Hi dabahat wa daayarat khamarha
wa farrachat bustaatha.
3 Hi rassalat khaddaamaatha
wa tinaadi min al-bakaan al-aali hana l-hille.
4 Wa tuguul : «Ayyi naadum al-jaahil khalli yaji hini.»
Wa le l-ma indah fihim, hi tuguul :
5 «Yalla aakulu min akli
wa acharbo min khamari al-daayartah.
6 Khallu minku al-jahal wa tahyo
wa chiilu al-derib al-yantiiku fihim.»
Al-hakiim wa l-chammaati
7 «Al-yiʼaddib al-chammaati
yalga al-bakhaada
wa l-yuluum al-aasi
yalga al-muʼyaar.
8 Ma tuluum al-chammaati
achaan hu yabkhudak
laakin kan tuluum al-hakiim,
hu yiriidak.
9 Allim al-hakiim
wa yalga hikma ziyaada.
Arrif al-saalih
wa maʼrafatah tabga ziyaada.
10 Al-khoof min Allah
hu asaas al-hikma
wa maʼrafat Allah al-Khudduus
tifahhimah le l-insaan.
11 Wa beyi ana al-hikma,
ayyaam hayaatak yiziidu
wa siniin umrak yutuulu.
12 Kan hakiim,
hikmatak tanfaʼak
wa kan chammaati,
tilhammal awaakhib fiʼilak.»
Al-matmuusa taʼazim
13 Al-mara al-matmuusa kalaamha katiir.
Hi mukhaffala wa ma taʼarif cheyy.
14 Hi tagood fi baab beetha
wa fi l-bakaan al-aali hana hillitha
15 le tinaadi al-faaytiin be deribhum
wa l-maachiin adiil fi tariighum.
16 Wa tuguul : «Ayyi naadum al-jaahil khalli yaji hini.»
Wa le l-ma indah fihim, hi tuguul :
17 «Al-charaab al-masruug, laziiz
wa l-akil al-mulabbad, halu.»
18 Humman ma yaʼarfu
kadar da bakaan al-maytiin
wa maʼzuumiinha
gaaʼidiin fi l-haawiye.
© Arabe tchadien (alphabet latin) Bible © Alliance Biblique du Tchad, 2019.
