Ma fi battaan naadum aadil
1 Ya khasaarti !
Ana bigiit misil naadum
al-yagtaʼ al-kichcheeb
wa l-yilaggit al-fadle hana l-inab.
Wa daahu ma faddal anguud naakulah
wa la tiin al-niriidah.
2 Wa ma fi battaan raajil waahid saalih fi l-balad
wa la raajil adiil been al-naas.
Humman kulluhum yakursu le yidaffugu al-damm
wa ayyi waahid yukujj charak le akhuuh.
3 Wa iideehum nachiitiin
le yisawwu al-fasaala.
Al-masʼuul yatlub hadiiye
wa l-gaadi yichiil al-rachwa.
Wa l-gaadir yuguul ayyi cheyy al-hu yidoorah
wa kulluhum mulʼaamiriin sawa.
4 Hatta al-adiil minhum kula
misil al-haskaniit
wa l-saalih minhum
misil zariibit al-chook.
Wa da l-yoom al-khabbarooku beyah
muraakhibiinku al-anbiya.
Aywa, ikhaabku ja
wa da yoom hana barjaal.
5 Ma tisaddugu gariibiinku
wa la tiʼaamunu rufgaanku.
Wa giddaam awiinku al-yarugdan fi hudunku,
angarʼu, fakkuru fi lisaanku.
6 Achaan al-wileed yahgir abuuh
wa l-bineeye tugumm didd ammaha
wa marit al-wileed tugumm didd nasiibitha.
Ayyi naadum, naas beetah al-halaalah
yabgo leyah adu.
7 Wa laakin ana kamaan niwajjih le Allah
wa narja al-Ilaah al-yinajjiini
wa hu Ilaahi al-yasmaʼni.
Miikha yitwakkal ale Allah
8 Ma tichchammat leyi, ya aduuyi.
Kan ana wagaʼt kula, nugumm.
Wa kan ana gaaʼid fi l-dalaam kula,
Allah hu nuuri.
9 Waajib nahmal khadab Allah
achaan ana aznabt diddah
lahaddi l-wakit al-hu yidaafiʼ leyi fi chariiʼti
wa yisabbit huguugi.
Wa hu yamrugni fi l-nuur
wa ana nichiif adaaltah.
10 Wa udwaani yichiifu najaati
wa l-eeb yikhattiihum
achaan humman gaalo leyi :
«Ween Allah Ilaahak ?»
Wa fi chaan da, nichiifhum be uyuuni
wa yagaʼo wa yifajjukhuuhum
misil tiine fi l-chaariʼ.
11 Ya Madiinat al-Khudus, yaji yoom al-yabnu foogah daraadirki
wa fi l-yoom da, yiwassuʼu huduudki.
12 Wa fi l-yoom da, yaju leeki naas
min Achuur fi l-sabaah
wa min Masir fi l-junuub
wa min khachum al-Niil wa bahar al-Furaat
wa min khuchuum al-buhuur wa mantagat al-jibaal.
13 Wa l-ard tabga kharaab be sabab sukkaanha
wa da be sabab natiijat amalhum al-fasil.
Salaat Miikha
14 Ya Rabb, guud chaʼabak al-misil warasatak
misil raaʼi yuguud khanamah be duglah.
Humman gaaʼidiin wiheedhum
fi l-khaaba muhawwaga be jineenaat inab.
Khalliihum yasraho misil zamaan fi marʼa Baachaan
wa fi bakaan hana sarha fi Gilʼaad.
15 «Misil ayyaam al-intu maragtu min balad Masir,
ana battaan niwassifku ajaayib.»
16 Wa wakit al-umam yichiifu al-cheyy da,
hatta kan induhum gudra kula, al-eeb yikhattiihum.
Humman yukhuttu iideehum fi khuchuumhum
wa udneehum ma yasmaʼo battaan.
17 Humman yalhaso al-ajaaj misil al-dabiib
wa misil kulla zawaahif al-ard.
Yarjufu wakit yamurgu min maljaʼhum
wa yaju leek inta Allah Ilaahna.
Yibarjulu wa yakhaafo minnak.
18 Yaatu ilaah mislak inta, ya Allah ?
Inta al-takhfir al-khata
wa tahmal isyaan al-naas al-faddalo
min chaʼabak al-misil warasatak.
Khadabak ma yagood daayman
achaan inta tihibb al-kheer.
19 Wa battaan tarhamna
wa tamha khataayaana.
Inta tarmi kulla zunuubna
fi l-bahar al-khariig.
20 Wa tiwassif amaanak le zurriiyit Yaakhuub
wa kheerak le iyaal Ibraahiim
misil inta zamaan halaft beyah le abbahaatna.
© Arabe tchadien (alphabet latin) Bible © Alliance Biblique du Tchad, 2019.
