Salaat Habaguug
1 Di salaat al-nabi Habaguug wa hi khine chakwa.
2 Ya Allah, ana simiʼt beek
wa khuft.
Ya Allah, sawwi fiʼilak fi tuul al-siniin
wa arrifna beyah fi tuul al-ayyaam.
Wa fi wakit khadabak kula, arhamna.
3 Wa l-Rabb ja min balad Teemaan.
Aywa, al-Khudduus ja min jabal Faaraan. Wagfa.
Majdah mala al-samaawaat
wa chukrah khatta al-ard.
4 Wa deyyah hu nuur chadiid
wa barraaga tabrug marrateen min iidah
wa da bas bakaan mullabbid izzah.
5 Al-waba maachi giddaamah
wa l-marad mulaggit derbah.
6 Hu wagaf wa l-ard anhazzat
wa hu chaaf wa l-umam rajjafo.
Al-jibaal al-gadiimiin alfatfato
wa l-hujaar al-daaymiin alkassaro
wa l-duruub al-daaymiin hineeyah hu.
7 Wa ana chift furgaan chaʼab Kuchaan
bigo ma fiihum.
Wa sataayir khiyam balad Midyaan
anhazzo giddaamah.
8 Ya Allah, wakit rikibt kheelak
wa arabaatak hana l-nasur,
khidibt khadab chadiid
didd al-rujuul walla ?
Zaʼalak didd al-rujuul
wa khadabak didd al-bahar walla ?
9 Inta salleet nubbaalak wa nachaachiibak
wa da l-kalaam al-inta halaft beyah. Wagfa.
Wa chaggagt al-ard
wa l-rujuul marago.
10 Wa l-jibaal chaafook
wa rajafo.
Wa l-matar sabba almi katiir
lahaddi hiss al-bahar al-khariig ansamaʼ
wa hu haaj wa talaʼ lahaddi foog.
11 Wa min nuur nachaachiibak
wa baragaan haribtak,
al-harraay wa l-gamar
wagafo bakaan waahid.
12 Wa be khadab, inta raayikh fi l-ard
wa be zaʼal, inta fajjakht al-umam.
13 Wa inta maragt le tinajji chaʼabak
wa tinajji al-naadum al-inta masahtah
wa darrajtah malik.
Wa dammart beet al-chariir.
Aywa, hu anhadam min raasah lahaddi asaasah. Wagfa.
14 Wa inta taʼʼant kubaaraat al-adu
be nachaachiibhum halaalhum fi ruuseehum
wakit humman jaayiin be surʼa misil al-riih
le yichattutuuna be korooraak hana farah.
Wa da misil yaakuluuna be achiir,
aniina al-masaakiin.
15 Wa inta fakkeet derib le kheelak fi lubb al-bahar
wa fi ust al-mooj al-chadiid.
16 Min ana simiʼt be jaytak,
galbi rajaf
wa min simiʼt hissak,
chalaaliifi rajafo
wa udaami maaʼo.
Wa ana wagaft bakaan waahid
wa gaaʼid narjif.
Wa hassaʼ, narja yoom al-diige
al-yaji foog aduuna.
17 Hatta kan al-tiin ma yinawwir
wa chadar al-inab ma yalda
wa l-zaytuun ma yugumm
wa l-zereʼ ma yigawwim maʼaach
wa l-khanam yabgo ma fiihum fi l-zariibe
wa l-bagar yabgo ma fiihum fi l-door,
18 be da kula, ana ninbasit be Allah
wa nafrah be Ilaahi al-yinajjiini.
19 Allah hu Rabbi wa gudurti
wa hu sawwa rijileeni khufaaf
misil rijle al-khazaala.
Wa hu gaaʼid yuguudni
wa fi l-bakaan al-aali, yiwaddiini.
Wasiiye le kabiir al-khannaayiin : Le yikhannuuh be jigindiiye.
© Arabe tchadien (alphabet latin) Bible © Alliance Biblique du Tchad, 2019.
