Allah yiʼaakhib chaʼabah
1 Ya Bani Israaʼiil, asmaʼo kalaam Allah
al-gaalah didduku,
didduku intu al-gabaayil
al-maragaaku min balad Masir :
2 «Ana azaltuku intu wiheedku
min usut kulla gabaayil al-ard.
Wa fi chaan da, ana niʼaakhibku
be sabab kulla khataayaaku.»
Allah yibayyin sirrah le l-anbiya
3 Rujaal itneen yagdaro yamchu sawa
kan ma astafago walla ?
4 Al-duud yagdar yikirr fi l-khaaba
kan ma katal walla ?
Wald al-duud hissah yinsamiʼ fi nugurtah
kan ma ligi akil walla ?
5 Al-teer yagdar yagaʼ fi l-charak
kan ma chattato leyah akil walla ?
Al-charak yagdar yamrug min al-ard
kan ma karab seedtah walla ?
6 Kan al-buug baka fi lubb al-hille,
sukkaanha ma yibarjulu walla ?
Kan cheyy fasil ja fi l-hille,
ma Allah bas jaʼalah walla ?
7 Wa misil da, Allah al-Rabb ma yisawwi ayyi cheyy
kan ma bayyan sirrah le abiidah al-anbiya.
8 Al-duud kan karra,
yaatu al-ma yakhaaf ?
Allah al-Rabb kan kallam,
yaatu al-ma yiballikh kalaamah ?
Kharaar Allah didd al-Saamira
9 «Iitu fi gusuur madiinat Achduud
wa fi gusuur balad Masir wa guulu :
‹Limmu fi jibaal al-Saamira
wa chiifu al-barjaal al-katiir al-fi lubbaha
wa l-zulum al-gaaʼid foogha.›
10 Wa da kalaam Allah.Chaʼabi ma yaʼarfu yisawwu al-hagg
wa yakhzunu fi gusuurhum kulla cheyy
al-chaalo be unuf wa nahib.»
11 Wa fi chaan da, daahu Allah al-Rabb gaal :
«Ya l-Saamira, al-adu yihaasirki
wa yidammir gudritki wa yanhab gusuurki.»
12 Daahu Allah gaal :
«Misil al-raaʼi yikhallis
min khachum al-duud
rijileen aw nuss adaan,
be misil da, yakhlaso
Bani Israaʼiil al-gaaʼidiin fi l-Saamira,
al-murtaahiin fi saraayirhum
wa l-jaalsiin fi busaataathum.
13 Wa da kalaam Allah al-Rabb al-Ilaah al-Gaadir.Asmaʼo wa hazzuru
zurriiyit Yaakhuub !
14 Yoom niʼaakhib Bani Israaʼiil be zunuubhum,
niʼaakhib madaabih Beet Iil
wa nikassir guruun al-madbah
wa narmiihum fi l-turaab.
15 Wa nidammir buyuut al-khaniyiin
al-yinjammo fooghum fi l-chite wa l-seef.
Wa l-buyuut al-mujammaliin be l-aaj kula, nidammirhum
wa buyuut katiiriin yabgo ma fiihum.»
Wa da kalaam Allah.
© Arabe tchadien (alphabet latin) Bible © Alliance Biblique du Tchad, 2019.
