Kalaam Allah didd jabal Saʼiir fi Adoom
1 Wa Allah hajja leyi wa gaal : 2 «Ya ibn Adam, wajjih ale jabal Saʼiir wa sukkaanah wa atnabbaʼ diddah. 3 Wa guul leyah : ‹Daahu Allah al-Rabb gaal :
“Akiid ana nugumm diddak,
ya jabal Saʼiir,
wa narfaʼ iidi diddak
wa nisawwiik kharaab wa yabaas.
4 Wa nisawwi mudunak koom hana turaab
wa inta tabga kharaab.
Wa be da, inta taʼarif kadar ana bas Allah.
5 «‹“Inta indak adaawa daayme wa rameet Bani Israaʼiil fi l-harib fi wakit diigithum, wakit zunuubhum lihgo hadduhum.”›»
6 Wa fi chaan da, daahu kalaam Allah al-Rabb : «Ana nahlif be usmi al-Hayy, namlaak be damm wa l-damm yitaaridak. Akiid inta ma khuft min al-dimme wa hassaʼ, al-damm yitaaridak. 7 Ya jabal Saʼiir, nisawwiik kharaab wa yabaas wa namnaʼ al-naas ma yufuutu beek. 8 Wa namla jibaalak be l-janaazaat. Wa fi hujaarak wa wudyaanak wa kulla rujuulak, naasak yumuutu fi l-harib. 9 Wa ana nisawwiik kharaab ila l-abad wa mudunak ma yaskunu fooghum. Wa be da, taʼarif kadar ana bas Allah.
10 «Inta gult : ‹Al-umam al-itneen hana Israaʼiil wa Yahuuza wa chaʼabhum, ana nichiilhum wa yabgo hineeyi ana, hatta kan Allah gaaʼid fooghum kula.› 11 Wa fi chaan da, daahu kalaam Allah al-Rabb : ‹Ana nahlif be usmi al-Hayy, nisawwi foogak hasab zaʼalak wa husdak wa karaahiiytak al-inta gammeet beehum didd al-mamaalik dool. Wa wakit ninazzil ikhaabi foogak, khalaas humman yaʼarfuuni ! 12 Wa be da, inta kula taʼarif kadar ana bas Allah wa ana simiʼt kulla l-muʼyaar al-inta ayyart beyah jibaal Israaʼiil wakit gult : “jibaal Israaʼiil bigo kharaab ! Khalaas, antoohum leena misil maʼaach wa aniina naakuluuhum !” 13 Inta hajjeet foogi be istikbaar wa kattart kalaamak diddi wa ana simiʼtah.›»
14 Wa daahu Allah al-Rabb gaal : «Wakit nakharbak, kulla l-buldaan yafraho. 15 Wakit ard warasat Bani Israaʼiil khirbat, inta firiht wa fi chaan da, ana nisawwiik misilha. Ya jabal Saʼiir, inta takhrab wa kulla balad Adoom kula. Wa be da, kulla l-naas yaʼarfu kadar ana bas Allah.»
© Arabe tchadien (alphabet latin) Bible © Alliance Biblique du Tchad, 2019.
