1 Samuwiil 5 - Arabe tchadien (alphabet latin) (ShuLatn)

Sanduug al-Rabb fi balad al-Filistiyiin

1 Wa baʼad chaalo sanduug al-Rabb, al-Filistiyiin nagalooh min hajar al-Musaaʼada wa waddooh madiinat Achduud. 2 Wa jaabooh fi beet al-ibaada hana sanamhum Daguun wa khatto sanduug al-Rabb jamb al-sanam da. 3 Wa ambaakir be fajur badri, sukkaan Achduud gammo wa daahu ligo Daguun waagiʼ be wijhah giddaam sanduug Allah ! Wa humman chaalooh wa battaan khattooh fi bakaanah. 4 Wa ambaakir kula be fajur badri, gammo wa daahu ligo Daguun waagiʼ be wijhah giddaam sanduug Allah ! Wa raasah wa iideenah mugattaʼiin wa waagiʼiin fi atabat al-beet. Wa faddalat illa jittitah bas. 5 Wa fi chaan da bas fi Achduud, rujaal al-diin hana Daguun wa kulla l-naas al-yadkhulu fi beet al-ibaada hana Daguun ma yukhuttu rijleehum fi l-ataba lahaddi l-yoom.

6 Wa Allah darab naas madiinat Achduud chadiid wa barjalaahum be ziyaada. Wa darab naas Achduud wa l-hillaal al-taabʼiinha be waba hana hubuun. 7 Wa wakit chaafo al-cheyy al-kaan fooghum, sukkaan Achduud gaalo : «Sanduug ilaah Bani Israaʼiil ke ma yagood fi baladna achaan hu nazzal waba chadiid foogna aniina wa fi ilaahna Daguun.» 8 Wa naadoohum le l-kubaaraat hana l-Filistiyiin, lammoohum kulluhum ke wa gaalo : «Hassaʼ da, nisawwu chunu be sanduug ilaah Bani Israaʼiil ?» Wa humman raddo wa gaalo : «Khalli yiwadduuh fi hillit Gaat.» Wa khalaas, humman chaalo sanduug ilaah Bani Israaʼiil wa waddooh fi hillit Gaat.

9 Wa wakit waddooh hinaak, Allah darab al-hille di darbe chadiide bilheen. Wa kulla sukkaanha barjalo marra waahid. Wa nazzal fooghum waba hana hubuun min dugaaghum lahaddi kubaarhum. 10 Wa khalaas, waddo sanduug al-Rabb le madiinat Akhruun.

Wa wakit dakhkhalooh fi Akhruun, kulla l-sukkaan sarakho wa gaalo : «Daahu jaabo leena sanduug ilaah Bani Israaʼiil achaan yikattuluuna kullina ke, aniina wa chaʼabna !» 11 Wa humman rassalo le kubaaraat al-Filistiyiin wa lammoohum wa gaalo leehum : «Gabbulu sanduug ilaah Bani Israaʼiil fi bakaanah achaan ma yaktulna aniina wa kulla chaʼabna.» Achaan fi kulla l-madiina di, barjaal chadiid min al-moot nazal fooghum achaan Allah darabaahum be ruʼub chadiid. 12 Wa kulla l-naas al-ma maato, marad al-hubuun karabaahum wa baki naas al-madiina lihig lahaddi l-sama.