Amasya bigi malik fi Yahuuza
1 Wa Amasya indah 25 sana wakit bigi malik wa hakam 29 sana fi Madiinat al-Khudus. Wa ammah usumha Yuuʼaddaan wa hi min Madiinat al-Khudus. 2 Wa hu sawwa al-adiil giddaam Allah wa laakin ma be niiye mukhlisa. 3 Wa wakit Amasya sabbat mulkah, hu katal kulla masaaʼiilah al-katalo abuuh al-malik Yuwaach. 4 Wa laakin hu ma katal iyaalhum. Wa da hasab maktuub fi kitaab Tawraat Muusa al-foogah Allah amaraahum wa gaal : «Al-abbahaat ma yaktuluuhum be sabab zanib al-iyaal wa l-iyaal ma yaktuluuhum be sabab zanib al-abbahaat. Ayyi waahid yumuut be sabab zanbah bas.»
5 Wa Amasya lamma rujaal mamlakat Yahuuza wa nazzamaahum ale hasab aayilaathum. Wa darraj khuyyaad al-aalaaf wa khuyyaad al-miyaat le kulla gabaayil Yahuuza wa Banyaamiin. Wa hu sajjal kulla l-rujaal al-umurhum min 20 sana wa foog wa ligi adadhum 300 000 rujaal jaahiziin le l-harib wa chaayliin huraab wa darag. 6 Wa jannad min mamlakat Israaʼiil 100 000 rujaal furraas murtazakha be taman hana 3 400 kiilo hana fudda.
7 Wa laakin nabi Allah ja le Amasya wa gaal : «Ya l-malik ! Khalli askar mamlakat Israaʼiil ma yamchu maʼaak fi l-harib achaan Allah ma yukuun maʼa Bani Israaʼiil, maʼa kulla naas gabiilat Afraayim dool. 8 Wa kan humman maachiin maʼaak, kan inta bigiit chadiid fi l-harib kula, al-Rabb yarmiik giddaam udwaanak. Achaan al-Rabb bas indah gudra yafzaʼ aw yarmi.» 9 Wa Amasya gaal le nabi Allah : «Nisawwi kikkeef le l-fudda al-wazinha 3 400 kiilo al-anteetha le askar mamlakat Israaʼiil ?» Wa nabi Allah gaal : «Allah indah ! Yagdar yantiik ziyaada min da.» 10 Wa be da, Amasya tarad al-askar al-jo min gabiilat Afraayim achaan yigabbulu buyuuthum. Wa laakin humman ziʼilo didd mamlakat Yahuuza wa gabbalo buyuuthum be zaʼal chadiid.
11 Wa Amasya chadda heelah wa wadda chaʼabah fi waadi al-Mileh wa katal 10 000 askar Adoomiyiin min Saʼiir. 12 Wa chaʼab Yahuuza karabo 10 000 askar aakhariin wa waddoohum fi raas hajar. Wa ramoohum min raas al-hajar da wa kulluhum alkassaro. 13 Wa fi l-wakit da, al-askar al-Amasya taradaahum achaan ma yihaarubu maʼaayah da gammo hajamo hillaal balad Yahuuza min al-Saamira lahaddi Beet Huruun. Wa katalo 3 000 naas wa chaalo khaniime katiire.
Yahuʼaach annasar fi Amasya
14 Wa wakit Amasya mugabbil min nasrah fi l-Adoomiyiin, hu jaab maʼaayah ilaahaathum min Saʼiir. Hu sawwaahum ilaahaatah wa gaaʼid yaʼabudhum wa yiharrig leehum al-bakhuur. 15 Wa khalaas, Allah khidib khadab chadiid didd Amasya wa rassal leyah nabi achaan yihajji leyah. Wa l-nabi gaal : «Maala inta taabaʼt al-ilaahaat al-ma gidro najjo chaʼabhum min iidak ?» 16 Wa laakin wakit al-nabi gaaʼid yihajji leyah, Amasya gataʼ kalaamah wa gaal : «Yaatu khattaak mustachaar hanaayi ana al-malik ? Askut kan ma tidoor yuduggak !» Wa l-nabi gaal : «Ana naʼarif kadar al-Rabb kharrar le yidammirak achaan inta sawweet al-cheyy da wa abeet ma tasmaʼ wasiiyti.» Wa baʼad da, sakat.
17 Wa Amasya malik mamlakat Yahuuza ligi wasiiye min mustachaariin aakhariin wa rassal le Yahuʼaach wileed Yahuuhaaz wileed Yaahu malik mamlakat Israaʼiil. Wa gaal leyah : «Taʼaal nilgaabalo wa nilhaarabo !» 18 Wa Yahuʼaach malik mamlakat Israaʼiil rassal le Amasya malik mamlakat Yahuuza wa hajja leyah be l-masal da : «Yoom min al-ayyaam fi jibaal Lubnaan, chookaay waahide rassalat le chadar al-arz wa gaalat leyah : ‹Akhkhid bineeytak le wileedi !› Wa laakin teetal waahid hana Lubnaan fajjakh al-chookaay di wa rihikha marra waahid.»
19 Wa Yahuʼaach gaal battaan : «Akiid inta annasart fi l-Adoomiyiin wa fi chaan da, firiht be nasrak wa gaaʼid tilfachchar. Wa hassaʼ, nuguul leek agood saakit fi beetak. Maala tidoor tigawwim harib cheen al-yidammirak inta wa mamlakat Yahuuza kula ?» 20 Wa laakin Amasya ma simiʼ kalaamah achaan Allah dawwar yisallimah fi iid udwaanah wa da fi chaan hu taabaʼ ilaahaat al-Adoomiyiin.
21 Wa khalaas, Yahuʼaach malik mamlakat Israaʼiil marag gaabalah. Wa askar Yahuʼaach wa askar Amasya malik mamlakat Yahuuza alhaarabo fi hillit Beet Chams fi balad Yahuuza. 22 Wa askar mamlakat Yahuuza anhazamo giddaam askar mamlakat Israaʼiil wa ayyi askari arrad gabbal beetah. 23 Wa fi hillit Beet Chams, Yahuʼaach malik mamlakat Israaʼiil karabah le Amasya wileed Yuwaach wileed Akhazya malik mamlakat Yahuuza. Wa hu bigi masjuun al-harib wa Yahuʼaach waddaah Madiinat al-Khudus. Wa hinaak, hu kassar durdur Madiinat al-Khudus fi tuul hana 400 duraaʼ min baab Afraayim lahaddi baab al-Rukun. 24 Wa Yahuʼaach chaal kulla l-dahab wa l-fudda wa l-muʼiddaat hana beet Allah al-hafadaahum Ubeed Adoom. Wa chaal al-kanz min gasir al-malik wa khataf naas kula. Wa baʼad da, gabbal madiinat al-Saamira.
Nihaayat hukum Amasya
25 Wa Amasya wileed Yuwaach malik mamlakat Yahuuza aach 15 sana baʼad moot Yahuʼaach wileed Yahuuhaaz malik mamlakat Israaʼiil. 26 Wa l-baagi min amal Amasya min al-bidaaya le l-nihaaya maktuub fi kitaab muluuk Bani Yahuuza wa Bani Israaʼiil. 27 Wa min wakit Amasya khalla derib Allah, naas waahidiin atmarrado diddah fi Madiinat al-Khudus. Wa hu arrad wa macha hillit Lakiich laakin humman rassalo naas waraayah wa katalooh fi l-hille di. 28 Wa humman jaabo janaaztah be kheel wa dafanooh fi khabur juduudah fi aasimat balad Yahuuza.
© Arabe tchadien (alphabet latin) Bible © Alliance Biblique du Tchad, 2019.
