Yuutaam bigi malik fi Yahuuza
1 Wa Yuutaam indah 25 sana wakit bigi malik wa hakam 16 sana fi Madiinat al-Khudus. Wa ammah usumha Yaruucha bineeyit Saduukh. 2 Yuutaam sawwa al-adiil giddaam Allah misil abuuh Uzziiya sawwaah laakin Yuutaam ma khiti be dakhiliin fi beet Allah. Wa laakin be adaaltah di kula, al-chaʼab gaaʼidiin yitallufu. 3 Wa hu addal al-baab al-foogaani hana madkhal beet Allah wa bana al-durdur hana haarat Ufal. 4 Wa bana hillaal fi jibaal Yahuuza wa mudun gawiyiin wa buyuut tuwaal hana l-muraakhaba fi l-khaaba.
5 Yuutaam haarab Bani Ammuun wa annasar fooghum. Wa fi l-sana di, Bani Ammuun antooh ziyaada min 3 400 kiilo hana fudda wa 25 000 chuwaal hana gameh ahmar wa 25 000 chuwaal hana gameh abyad. Wa antooh nafs al-hadaaya fi l-sana al-taaniye wa l-taalta kula. 6 Wa Yuutaam bigi chadiid misil ke achaan sabbat derbah giddaam Allah Ilaahah.
7 Wa l-baagi min amal Yuutaam wa kulla l-huruub al-sawwaahum wa khidimtah maktuubiin fi kitaab muluuk Bani Israaʼiil wa Bani Yahuuza. 8 Yuutaam indah 25 sana wakit bigi malik wa hakam 16 sana fi Madiinat al-Khudus. 9 Wa Yuutaam maat wa lihig abbahaatah wa dafanooh fi madiinat Dawuud. Wa wileedah Ahaaz hakam fi badalah.
© Arabe tchadien (alphabet latin) Bible © Alliance Biblique du Tchad, 2019.
