1 Kan gaʼadt taakul maʼa l-haakim,
fakkir tamaam fi l-giddaamak.
2 Kan batnak wasiiʼe
akheer tamnaʼ nafsak.
3 Ma tagram le aklah al-halu,
taʼamah yukhuchchak.
4 Ma tiʼayyi nafsak fi chaan al-maal.
Aʼarif mata tinjamm.
5 Ma tukhutt aglak fi l-maal,
hu ma daayim.
Hu yisawwi janaahe misil al-sagur,
yitiir wa yamchi yikhalliik.
6 Ma taakul eech al-rakhbaan
wa ma tagram le aklah al-halu.
7 Achaan hu indah fikir aakhar fi galbah.
Hu yuguul leek : «Aakul wa achrab !»
Wa laakin ma min galbah.
8 Wa khalaas, inta tigaddif al-lugma al-akaltaha
wa l-chukur al-chakartah leyah kula yufuut fi l-riih.
9 Ma tiwassi al-matmuus
achaan hu ma yichiif faaydit kalaamak.
10 Ma tihawwil alaamaat al-huduud al-zamaan
achaan tichiil min zereʼ al-ataama.
11 Al-yahmiihum gaadir
wa hu yidaafiʼ leehum diddak.
12 Wajjih nafsak le taʼliim al-adab
wa khutt adaanak le kalaam al-maʼrafa.
13 Ma tikhalli addibiin al-wileed.
Kan tafurchah be l-soot, ma yumuut.
14 Kan farachtah be l-soot,
najjeetah min al-moot.
15 Ya wileedi, kan galbak anmala be l-hikma
galbi ana kula yinmali be l-farah.
16 Ana ninbasit ziyaada
kan lisaanak yuguul al-hagg.
17 Ma tahsid al-muznibiin
wa laakin akhaaf min Allah kulla yoom.
18 Wa be da, talga mustakhbal sameh
wa achamak abadan ma yingatiʼ.
19 Asmaʼ, ya wileedi, abga hakiim
wa khutt fikrak fi l-derib al-adiil.
20 Ma tagood maʼa charraabiin al-mariise
wa la tamchi maʼa akkaaliin al-laham
21 achaan al-sakkaara wa l-akkaaliin
yawrusu al-taʼab
wa min chiddit al-ajaz
yalbaso illa l-janaago.
22 Asmaʼ kalaam abuuk al-wildaak
wa ma takrah ammak kan bigat ajuuz kula.
23 Fattich al-sahiih wa l-hikma wa l-adab wa l-fihim.
Wakit talgaahum, akrubhum gawi.
24 Al-indah wileed saalih yafrah ziyaada
wa l-yalda wileed hakiim yinbasit minnah.
25 Khalli abuuk wa ammak yafraho beek
wa ammak al-wildatak tinattit min al-farah.
26 Ya wileedi, antiini galbak
wa khutt uyuunak fi derbi.
27 Mart al-raajil misil biir dayge
al-marigiin minha saʼab.
Aywa, al-zaaniye misil hawiire
al-ma indaha hadd.
28 Achaan hi misil rabbaat al-duruub al-kaaris,
tiziid adad al-rujaal al-bukhuunu awiinhum.
Al-mariise ma indaha riise
29 Le yaatu al-taʼab wa l-fagur ?
Wa le yaatu al-huraaj wa l-chakwa ?
Wa le yaatu al-juruuh bala sabab ?
Wa le yaatu hamaar al-uyuun ?
30 Wa da kulla ke le l-yitawwil fi l-sakar
wa le l-yijarrib ayyi mariise.
31 Khalli hamaar al-mariise ma yaʼajibak
wa la tichiilha wakit tiraari fi l-kaas.
Tuʼmitha haluuwe fi lisaanak
32 laakin fi l-akhiir,
hi misil addiin al-daabi
wa misil samm amchideegaat.
33 Uyuunak yichiifu itneen itneen
wa lisaanak yuguul kalaam ma indah maʼana.
34 Tabga misil naadum raagid
fi safiina al-tinhazza
aw misil naadum raakib fi markaba
al-chaayilha al-challaal.
35 Wa tuguul : «Farachooni
wa l-farich ma wajaʼaani
wa daggooni
wa ana ma hasseetah.»
Wa tuguul battaan : «Mata nugumm
wa nifattich nachrab ?»
© Arabe tchadien (alphabet latin) Bible © Alliance Biblique du Tchad, 2019.
