Al-ilaahaat wagaʼo giddaam Allah
1 Al-ilaah Biil barak
wa l-ilaah Nabu dangar.
Asnaamhum, chaddoohum
fi l-haywaanaat wa l-bahaayim.
Al-asnaam al-intu chiltuuhum da
bigo himil wa tagala
le l-bahaayim al-ayyaaniin.
2 Al-ilaahaat dool dangaro wa barako sawa
wa ma gidro yinajju tamaasiilhum al-tugaal.
Wa humman zaathum yichiiluuhum
wa yiwadduuhum fi l-khurba.
3 «Asmaʼooni, ya zurriiyit Yaakhuub
wa kulluku al-faddaltu min Bani Israaʼiil !
Ana chilt masʼuuliiyitku
min intu fi butuun ammahaatku.
Min wildooku, ana chiltuku.
4 Lahaddi tichayyubu,
ana nukuun maʼaaku
wa lahaddi be cheebku kula,
ana nilhammalku.
Ana bas khalagtuku wa nichiilku
wa ana bas nilhammalku wa ninajjiiku.
5 Be yaatu tichabbuhuuni ?
Wa maʼa yaatu tisaawuuni ?
Wa maʼa yaatu tigaaduruuni achaan nukuunu sawa ?
6 Naas waahidiin yusubbu al-dahab min makhaaliihum
wa yawzunu al-fudda fi l-miizaan.
Wa yikaffu sayyaakhi
le yudugg leehum sanam ilaah
wa le l-ilaah da,
humman yarkaʼo wa yasjudu.
7 Wa l-ilaah da, yichiiluuh fi kataafeehum wa yahmuluuh
wa yukhuttuuh fi bakaanah wa yagood,
ma yilharrak min bakaanah da.
Kan yikooruku leyah, ma yurudd
wa fi l-diige kula, ma yafzaʼ.
8 «Azzakkaro al-cheyy da wa abgo rujaal !
Fakkuru foogah, ya l-aasiyiin !
9 Fakkuru fi l-achya
al-bigo awwal min zamaan.
Achaan ana Allah wa la ilaah illa ana
wa ma fi ilaah misli ana.
10 Wa min al-bidaaya, ana nikhabbir be l-yaji fi l-mustakhbal
wa min zamaan, ana khabbart be l-achya al-lissaaʼ ma bigo.
Wa gult : ‹Niiyti tilhaggag
wa kulla l-dawwartah, nisawwiih.›
11 Wa ana ninaadi min al-sabaah
raajil misil sagur.
Ninaadiih min balad baʼiide
le yihaggig niiyti.
Al-gultah, yukuun
wa l-kharrartah, nihaggigah.
12 Asmaʼooni, ya l-ruuseeku gawiyiin
wa intu al-baʼiidiin min al-adaala !
13 Wa ana nigarrib adaalti al-hi ma baʼiide
wa ninajjiiku bala taʼkhiir.
Wa fi Sahyuun, nijiib al-naja
wa fi Israaʼiil, nijiib majdi.»
© Arabe tchadien (alphabet latin) Bible © Alliance Biblique du Tchad, 2019.
