Al-maytiin murtaahiin min al-hayyiin
1 Ana chift battaan kulla l-zulum
al-gaaʼid yukuun fi l-ard.
Daahu ana chift dumuuʼ al-mazluumiin
wa ma fi al-yisabbirhum.
Wa l-gudra daayman le l-zaalimiin
wa l-mazluumiin,
ma fi al-yisabbirhum.
2 Wa fi fikri,
al-maytiin khalaas humman murtaahiin
min al-hayyiin al-lissaaʼhum aaychiin.
3 Wa laakin al-lissaaʼ ma wildoohum murtaahiin
min al-maytiin wa l-hayyiin kula !
Achaan humman lissaaʼ ma chaafo
al-amal al-fasil
al-gaaʼid yukuun fi l-ard.
Al-jumma akheer min amal bala hadd
4 Ana chift kadar kulla l-khidme
wa kulla najaah al-amal
jaayi min husud al-insaan le akhuuh.
Wa da kula zaayil saakit
misil al-jari wara l-riih.
5 Al-matmuus kan yitabbig iideenah,
yidammir hayaatah.
6 Wa laakin iid waahide munjamme
akheer min iide itneen yakhdumu daayman
wa yajru wara l-riih.
Naaseen akheer min naadum waahid
7 Ana chift battaan cheyy aakhar fi l-ard
zaayil saakit.
8 Daahu naadum wiheedah
ma indah naadum maʼaayah,
wa la wileed wa la akhu.
Wa hu yakhdim bala hadd
wa be da kula, hu ma yachbaʼ min al-khuna.
Wa hu yifakkir wa yuguul :
«Le yaatu ana nakhdim misil da
wa nitaʼʼib nafsi ?»
Wa da kula zaayil saakit
wa di chakhala hint taʼab.
9 Naaseen akheer min naadum waahid
achaan yalgo ujra adiile min khidmithum.
10 Achaan kan waahid wagaʼ,
al-aakhar yarfaʼah.
Wa laakin al-khassaara
le l-gaaʼid wiheedah
achaan kan yagaʼ,
ma fi naadum al-yarfaʼah.
11 Wa misil da, kan naaseen yunuumu sawa,
yalgo dafu.
Wa laakin al-gaaʼid wiheedah
yalga dafu min ween ?
12 Naadum yagdar yakhlib naadum waahid
wa laakin ma yagdar yakhlib naaseen.
Wa l-habil al-mutallat
ma yingatiʼ ajala.
Al-siyaasa al-ma adiile
13 Akheer sabi fagri wa hakiim
min malik chaayib wa matmuus
al-yaaba al-wasiiye.
14 Achaan al-sabi da yagdar yamrug
min al-sijin wa yahkim,
hatta kan wildooh fi l-fagur
fi usut chaʼab mamlakatah kula.
15 Ana chift battaan kulla l-naas
al-maachiin fi l-ard,
yagiifu maʼa l-sabi
al-yarkab baʼad al-malik.
16 Wa l-chaʼab da ma yinhasbu
wa la l-waagfiin giddaamah.
Wa laakin al-yaju baʼadah
ma yafraho beyah.
Akiid da kula zaayil saakit
misil al-jari wara l-riih.
© Arabe tchadien (alphabet latin) Bible © Alliance Biblique du Tchad, 2019.
