Jayyit al-Masiih al-taaniye
1 Ya akhwaani al-nihibbuku, daahu al-jawaab al-taani al-katabtah leeku. Wa fi jawaabaati nidoor nizakkirku be l-kalaam al-taʼarfuuh khalaas wa tifakkuru be fikir mukhlis. 2 Fakkuru fi kalaam al-anbiya al-saalihiin al-gaalooh min zamaan. Wa fakkuru fi wasiiyat Isa Rabbina wa munajjiina al-simiʼtuuha be waasitat al-rusul al-macho leeku.
3 Wa daahu awwal cheyy al-waajib tafhamooh. Fi l-zaman al-akhiir chammaatiin yugummu wa yichchammato. Wa yitaabuʼu chahwaathum bas. 4 Wa yuguulu : «Waaʼado be jayyit Isa wa laakin hu ma ja. Abbahaatna maato wa min bidaayit al-dunya lahaddi al-yoom, cheyy khayyar ke ma fiih !»
5 Wa l-naas dool be niiyithum bas niso cheyy waahid maʼruuf wa da hu. Zamaan Allah kallam kilme wa beeha al-samaawaat kaano wa l-ard anfasalat min al-almi wa l-almi hawwagha. 6 Wa be kilmit Allah di, al-almi da kharag al-dunya fi l-zaman daak wa dammaraaha. 7 Wa be kilmit Allah battaan al-samaawaat wa l-ard al-gaaʼidiin haaliiyan madmuumiin achaan yarjo al-naar. Allah gaaʼid yahfadhum lahaddi yoom al-Hisaab al-yahlako foogah al-naas al-fasliin.
8 Ya akhwaani al-nihibbuku, fi cheyy waahid maʼruuf al-ma waajib tansooh wa da hu. Le Allah yoom waahid misil alif sana wa alif sana misil yoom waahid. 9 Wa Allah ma yiʼakhkhir waʼadah. Al-naas al-yuguulu hu akhkhar, ma fihmo adiil. Akheer nuguulu Allah sabuur leeku. Hu ma yidoor ayyi naadum yahlak laakin yidoor kulla l-naas yutuubu. 10 Wa laabudda yoom Allah yaji be khafla misil jayyit al-sarraag. Wa ajala ke haraka chadiide tinsamiʼ wa l-samaawaat yabgo ma fiihum wa l-nujuum yinhargu. Wa l-ard wa kulla cheyy al-yisawwuuh foogha yinkachif.
11 Wa kan kulla cheyy yiddammar misil da, intu waajib tisawwu chunu ? Waajib tiʼiichu be takhwa wa haal saalhe. 12 Arjo yoom Allah wa atmanno jaytah. Wa fi l-yoom da, al-samaawaat yinhargu wa yiddammaro wa l-nujuum yumuuʼu fi l-hamu. 13 Wa Allah antaana waʼad wa achaan da narjo al-sama al-jadiid wa l-ard al-jadiide wa l-dunya al-taji tabga daar al-saalihiin.
Nihaayat al-jawaab
14 Ya akhwaani al-nihibbuku, da bas al-cheyy al-tarjooh min Allah. Wa achaan da, sawwu juhud achaan tiʼiichu be salaam giddaamah bala khata wa la eeb. 15 Fakkuru fi l-ruuh al-tawiile hana Rabbina wa aʼarfu kadar hu yiʼakhkhir jaytah achaan al-naas yanjo. Wa l-kalaam da misil al-kalaam al-akhuuna Buulus al-niriiduuh katabah leeku min al-hikma al-Allah antaaha leyah. 16 Wa hu yihajji be l-kalaam da fi kulla jawaabaatah. Wa fi kalaam gaaʼid fi jawaabaatah al-tafsiirah ma hayyin. Wa naas waahidiin al-ma garo wa iimaanhum ma saabit yiʼawwuju kalaamah misil yiʼawwuju kalaam al-kutub al-aakhariin. Wa be da, yijiibu le nufuushum al-halaak.
17 Wa leeku intu ya akhwaani al-nihibbuku, taʼarfu al-kalaam da min awwal. Wa achaan da, awʼu baalku wa ma tikhallu kidib al-aasiyiin yiwaddiiku fi deribhum wa yitallif iimaanku al-saabit. 18 Laakin abgo gawiyiin fi niʼmat Rabbina Isa al-Masiih munajjiina wa be irfitku leyah. Wa l-Masiih, khalli yimajjuduuh fi l-wakit al-haadir wa ila l-abad. Aamiin.
© Arabe tchadien (alphabet latin) Bible © Alliance Biblique du Tchad, 2019.
