Irmiya yachki min najaah al-fasliin
1 Ya Allah, inta aadil !
Wa laakin nidoor nachki leek.
Aywa, nidoor nihajji maʼaak
fi cheyy bukhuss al-chariiʼa.
Maala al-fasliin yanjaho
fi khatwaathum ?
Maala al-khaayniin yagoodu
fi l-raaha be khiyaanithum ?
2 Inta bas maggantuhum misil chadara
wa dasso uruughum fi l-turaab
wa kibro lahaddi sawwo iyaal.
Khuchuumhum yinaadu usmak
wa laakin guluubhum ma maʼaak.
3 Ya Allah ! Inta tichiifni
wa takchif al-fi galbi
wa taʼarifni kadar ana maʼaak.
Wa laakin le l-fasliin dool,
suughum misil khanam al-juzur
al-mukhassasiin le yoom al-dabih.
4 Lahaddi mata al-ard tahzan
wa yaybas kulla gechch al-kadaade ?
Wa l-haywaanaat wa l-tuyuur
yabgo ma fiihum
wa da be sabab fasaalit sukkaanha al-yuguulu :
«Hu ma yaʼarif mustakhbalna.»
5 Wa Allah gaal leyi ana Irmiya :
«Kan tajri maʼa naas be rijileenak wa taʼaya,
kikkeef tagdar tisaabig maʼa l-kheel ?
Wa kan waajib leek balad salaam le tiʼiich be amaan,
kikkeef tagdar tiʼiich fi khaabat al-Urdun ?
6 «Daahu akhwaanak iyaal abuuk zaathum yukhuunuuk. Aywa, humman yijtamuʼu maʼa naas aakhariin waraak. Angariʼ, ma tiʼaaminhum hatta kan yihajju leek kalaam halu kula.»
Allah sallam chaʼabah le l-adu
7 Wa Allah gaal :
«Ana nikhalli beeti
wa naaba chaʼabi al-misil warasati.
Wa ummati al-mahbuuba,
ana nisallimha le l-adu.
8 Wa chaʼabi bigi leyi misil duud
fi lubb al-khaaba.
Hu yikirr diddi
wa be da, ana ma nihibbah.
9 Wa chaʼabi misil al-sagur al-argat
al-yahjumuuh al-suguura.
Yalla limmu kulla haywaanaat al-kadaade
wa aʼazumuuhum fi l-khada !
10 Wa kubaaraat al-adu jo dammaro baladi
misil ruʼyaan be maalhum
yidammuru jineenti hana l-inab.
Wa fajjakhooha wa sawwooha sahara kharaab,
hi al-awwal misil zerʼi al-jamiil.
11 Humman sawwooha kharaab
wa daahu hi giddaami yaabse wa kharbaane.
Aywa, al-balad kullaha ke kharbaane
wa ma fi naadum al-yihinn foogha.»
12 Wa fi kulla ruuse al-jibaal
al-mukharribiin jaayiin min al-sahara.
Seef Allah yadrub al-ard min tarafha le tarafha
wa ma fi salaam le ayyi insaan.
13 Intu teerabtu al-gameh
wa ligiitu al-haskaniit bas
wa ayyeetu nufuusku bala faayde.
Wa l-eeb karabku min natiijat khidmitku
wa da be sabab khadab Allah al-muhrig.
Allah yihaddid jiiraan chaʼabah
14 Wa daahu Allah gaal : «Kulla l-jiiraan al-fasliin al-yilammusu al-ard al-ana anteetha warasa le chaʼabi Bani Israaʼiil, ana nimallithum misil chadara min arduhum. Wa Bani Yahuuza kula nimallithum min usuthum. 15 Wa laakin baʼad mallattuhum, battaan ana narhamhum wa nigabbilhum ayyi waahid fi ard warasatah wa ayyi waahid fi baladah. 16 Awwal al-umam dool allamo chaʼabi yahalfu be Baʼal. Wa laakin hassaʼ, kan humman yitaabuʼu derib chaʼabi wa yahalfu be usmi ana Allah al-Hayy, khalaas yaskunu be amaan fi usut chaʼabi. 17 Wa laakin al-umma al-ma tasmaʼ kalaami da, ana nimallitha marra waahid wa niwaddirha.» Wa da kalaam Allah.
© Arabe tchadien (alphabet latin) Bible © Alliance Biblique du Tchad, 2019.
