Hamaan wa Mardakaay alkhaasamo
1 Wa baʼad da, al-malik Achawiruuch antaah le Hamaan wileed Hamdaata al-min zurriiyit Agaag charaf ziyaada min kulla l-masaaʼiil al-gaaʼidiin maʼaayah. 2 Wa kulla khaddaamiin al-malik al-gaaʼidiin fi khachum baab gasir al-malik yidanguru wa yasjudu giddaam Hamaan wa da misil al-malik amar beyah. Wa laakin Mardakaay wa la yidangir wa la yasjud giddaamah.
3 Wa khaddaamiin al-malik al-gaaʼidiin fi khachum baab gasrah gaalo le Mardakaay : «Maala ma titabbig amur al-malik ?» 4 Wa daayman gaaʼidiin yihajju leyah wa laakin hu ma yasmaʼ kalaamhum. Wa khalaas, humman khabbaro Hamaan achaan yichiif kan kalaam Mardakaay da sahiih achaan hu gaal hu Yahuudi.
5 Wa wakit Hamaan chaaf kadar Mardakaay ma dangar wa ma sajad, hu ziʼil zaʼal chadiid. 6 Wa Hamaan ma dawwar yukhutt iidah foog Mardakaay wiheedah bas achaan khabbarooh kadar hu Yahuudi. Wa be misil da, Hamaan gaaʼid yifattich tariiga al-yidammir beeha kulla l-Yahuud chaʼab Mardakaay al-gaaʼidiin fi kulla mamlakat Achawiruuch. 7 Wa fi l-chahar al-awwal al-usmah Niisaan fi sanit 12 hana hukum Achawiruuch, sawwo amʼiyeedaat al-usumha Fuuriim giddaam Hamaan. Wa hu yidoor yihaddid al-yoom wa l-chahar al-adiil le khittitah wa khalaas, amʼiyeedaat wagaʼat fi chahar 12 al-usmah Adaar.
Hamaan yijahhiz damaar al-Yahuud
8 Wa khalaas, Hamaan gaal le l-malik Achawiruuch : «Fiyah chaʼab muchattat wa mufarrag fi lubb al-chuʼuub hana kulla wulaayaat mamlakatak. Wa gawaaniinhum chig min gawaaniin kulla l-chuʼuub al-aakhariin wa humman ma gaaʼidiin yitabbugu gaanuunak, ya l-malik. Wa da ma waajib al-malik yikhalliihum fi raaha. 9 Wa kan bigi leek adiil, ya l-malik, khalli tamrug kharaar le damaarhum. Wa be da, ana nanti 34 000 kiilo hana fudda le khaddaamiin al-mamlaka wa yusubbuuha fi makhaazin al-malik.»
10 Wa khalaas, al-malik salla khaatmah al-yakhtim beyah min usbaʼah wa antaah le Hamaan wileed Hamdaata al-min zurriiyit Agaag adu al-Yahuud. 11 Wa l-malik gaal le Hamaan : «Al-fudda di, saamahnaaha leek wa l-chaʼab da kula, sawwi fooghum misil inta tidoorah.»
12 Wa fi yoom 13 hana l-chahar al-awwal, naado kulla kuttaab al-malik wa katabo kulla amur Hamaan fi maktuub le muhaafiziin al-mamlaka wa le l-hukkaam hana ayyi wulaaya wa le l-masaaʼiil hana ayyi chaʼab wa katabo le ayyi wulaaya hasab kitaabitha wa lukhkhitah. Wa humman katabo al-jawaabaat dool be usum al-malik Achawiruuch wa khatamoohum be khitim al-malik. 13 Wa l-jawaabaat dool rassaloohum be murassaliin fi kulla wulaayaat al-mamlaka achaan yidammuru wa yaktulu wa yikammulu kulla l-Yahuud, min al-subyaan lahaddi l-chiyyaab, hatta l-awiin wa l-atfaal kula. Wa yanhaboohum wa yaksabo kulla cheyy al-induhum. Wa da yabga fi yoom waahid bas yaʼni fi yoom 13 hana chahri 12 fi l-chahar al-usmah Adaar. 14 Wa nuskha al-jawaab da, yanchuruuha misil gaanuun fi ayyi wulaaya wa yiballukhuuha le kulla l-chuʼuub achaan yukuunu jaahiziin fi l-yoom da. 15 Wa be amur al-malik, al-murassaliin macho be surʼa wa ballakho al-gaanuun da fi madiinat Chuucha al-gawiiye. Al-malik wa Hamaan gaʼado le yacharbo wa laakin naas madiinat Chuucha barjalo marra waahid.
© Arabe tchadien (alphabet latin) Bible © Alliance Biblique du Tchad, 2019.
