Gassimiin ard Kanʼaan
1 Wa daahu al-ard al-ligooha Bani Israaʼiil misil warasa fi balad Kanʼaan. Wa l-naas al-gassamooha leehum humman raajil al-diin Aliʼaazar wa Yachuuʼ wileed Nuun wa chuyuukh aayilaat gabaayil Bani Israaʼiil. 2 Wa l-warasa di bigat le tisʼa gabaayil wa nuss gabiilat Manassa be amʼiyeedaat misil Allah amar beyah be waasitat Muusa. 3 Awwal, Muusa anta le itneen gabiila wa nuss gabiilat Manassa warasa sabaah le bahar al-Urdun. Wa laakin le l-Laawiyiin ma antaahum warasa maʼa l-gabaayil al-aakhariin. 4 Achaan Iyaal Yuusuf bigo itneen gabiila wa humman gabiilat Manassa wa gabiilat Afraayim. Wa ma anto ard warasa le gabiilat Laawi fi l-balad illa antoohum hillaal al-yaskunu fooghum wa ard hana sarha le bahaayimhum wa maalhum. 5 Wa Bani Israaʼiil sawwo misil Allah amar beyah Muusa wa humman algaasamo al-balad.
6 Wa yoom waahid, naas min gabiilat Yahuuza jo le Yachuuʼ fi Gilgaal. Wa Kaalib wileed Yafuuna al-Khinaazi gaal leyah : «Inta taʼarif tamaam kalaam Allah al-gaalah le l-nabi Muusa fi sababi ana wa fi sababak inta wakit aniina fi Khaadich Barniiʼa. 7 Ana umri 40 sana wakit Muusa abd Allah rassalaani min Khaadich Barniiʼa le nuruukh al-balad wa ana kallamt leyah be kulla cheyy al-chiftah hasab maʼrafati. 8 Wa akhwaani al-macho maʼaayi jo wa be kalaamhum khawwafo al-chaʼab. Wa laakin ana taabaʼt Allah Ilaahi be kulla niiyti. 9 Wa fi l-yoom da, Muusa halaf leyi wa gaal : ‹Al-balad al-inta rukht foogha tabga daayman warasa leek inta wa le zurriiytak achaan inta taabaʼt Allah Ilaahi be kulla niiytak.›
10 «Wa hassaʼ, daahu Allah antaani umur tawiil hasab kalaamah wa min Allah gaal al-kalaam da le Muusa, indah 45 sana. Wa fi kulla l-wakit da, Bani Israaʼiil gaaʼidiin fi l-sahara. Wa l-yoom, daahu indi 85 sana. 11 Wa l-yoom, indi nafs al-gudra wakit Muusa rassalaani namchi nuruukh al-balad. Wa l-gudra al-hassaʼ indi, hi misil al-gudra al-indi wakit nihaarib aw wakit namchi wa naji min al-harib. 12 Wa khalaas, antiini ard fi l-jibaal misil Allah gaalah fi l-yoom da. Achaan fi l-yoom da, inta irift kadar Bani Anakh gaaʼidiin fi l-ard di fi mudun gawiyiin. Wa laakin kan Allah yukuun maʼaayi, ana nichiil minhum al-ard di misil Allah gaalah.»
13 Wa Yachuuʼ baarak Kaalib wileed Yafuuna wa antaah hillit Hibruun misil warasa. 14 Wa be sabab da, Kaalib wileed Yafuuna al-Khinaazi ligi Hibruun misil warasa lahaddi l-yoom achaan hu taabaʼ Allah Ilaah Bani Israaʼiil be kulla niiytah. 15 Wa gabul da, Hibruun usumha Kharyat Arbaʼa. Wa Arbaʼa da hu raajil maʼruuf fi Bani Anakh. Wa khalaas, al-harib wagaf wa l-balad ligat al-raaha.
© Arabe tchadien (alphabet latin) Bible © Alliance Biblique du Tchad, 2019.
