Dawuud wa Batchaabaʼ
1 Wa fi l-sana al-jadiide, fi wakit al-muluuk yamchu al-harib, Dawuud rassal Yuwaab khaayid deechah wa naasah wa kulla Bani Israaʼiil fi l-harib. Wa humman dammaro Bani Ammuun wa haasaro madiinat Rabba aasimathum. Wa laakin Dawuud gaʼad fi Uruchaliim.
2 Wa yoom waahid be achiiye, Dawuud gamma min furaachah wa gaaʼid yihawwig fi raas gasrah wa min foog, chaaf mara gaaʼide tilbarrad. Wa hi jamiile marra waahid. 3 Wa Dawuud rassal le yiʼakkudu min al-mara di. Wa oorooh gaalo leyah : «Di Batchaabaʼ bineeyit Aliʼaam. Wa hi marit Uriiya al-min gabiilat al-Hittiyiin.»
4 Wa khalaas, Dawuud rassal naas le yijiibuuha. Wa l-mara di dahaabha khassalat wa hi jaat fi gasrah wa hu ragad maʼaaha. Wa baʼad da, hi gabbalat beetha. 5 Wa l-mara di bigat khalbaane. Wa hi rassalat le Dawuud wa ooratah wa gaalat kadar hi khalbaane.
6 Wa tawwaali, Dawuud rassal le Yuwaab wa gaal : «Rassil leyi Uriiya al-Hitti.» Wa khalaas, Yuwaab rassalah leyah. 7 Wa wakit Uriiya ja le Dawuud, hu saʼalah min aafiyit Yuwaab wa l-askar wa khabar al-harib. 8 Wa baʼad da, Dawuud gaal le Uriiya : «Amchi beetak wa khassil rijileenak.»
Wa Uriiya marag min gasir al-malik wa waraayah al-malik rassal leyah hadiiye. 9 Wa laakin Uriiya ragad fi madkhal gasir al-malik maʼa khaddaamiin siidah wa ma macha beetah.
10 Wa khabbarooh le Dawuud wa gaalo leyah : «Daahu Uriiya ma macha beetah.» Wa Dawuud saʼalah wa gaal : «Inta ma dahaabak jiit min al-safar ? Wa maala ma macheet beetak ?» 11 Wa Uriiya radda le Dawuud wa gaal : «Sanduug Allah wa askar Bani Israaʼiil wa Bani Yahuuza saakniin fi khiyam wa siidi Yuwaab wa naasak al-aakhariin gaaʼidiin barra fi l-kadaade. Wa be da, kikkeef namchi beeti wa naakul wa nachrab wa nargud maʼa marti ? Da ma mumkin ! Nahlif leek be hayaatak inta kadar cheyy misil da, abadan ma nisawwiih.» 12 Wa Dawuud gaal le Uriiya : «Khalaas, al-yoom kula agood hini. Wa ambaakir kamaan, nikhalliik tamchi.»
Wa Uriiya gaʼad fi Uruchaliim fi l-yoom da wa ambaakir kula. 13 Wa Dawuud azamah fi gasrah le yaakul wa yachrab wa sakkarah. Wa be l-leel, Uriiya marag wa macha ragad fi furaachah maʼa khaddaamiin al-malik. Laakin ma macha beetah. 14 Wa be fajur, Dawuud katab jawaab le Yuwaab wa rassalah leyah be waasitat Uriiya. 15 Wa fi l-jawaab da, Dawuud katab wa gaal : «Gaddim Uriiya wa khuttah fi l-bakaan al-khatari marra waahid hana l-harib al-chadiid. Wa intu baʼʼudu minnah. Wa be da, al-adu yadurbah wa hu yumuut.»
Moot Uriiya raajilha le Batchaabaʼ
16 Wa Yuwaab gaaʼid yiraakhib fi l-hille al-haasarha. Khalaas, khatta Uriiya fi l-bakaan al-yaʼarfah gaaʼidiin foogah udwaanhum al-fahaliin. 17 Wa askar al-hille di marago wa hajamo Yuwaab wa katalo waahidiin min askarah wa naas Dawuud. Wa Uriiya al-Hitti kula maat.
18 Wa Yuwaab rassal khabbarah le Dawuud be kulla cheyy al-kaan fi l-duwaas. 19 Wa anta amur le l-mursaal da wa gaal : «Baʼad kammalt hijeek le l-malik be kulla cheyy al-kaan fi l-duwaas da, 20 akuun al-malik yazʼal wa yuguul leek : ‹Maala intu garrabtu le l-hille hatta daawastu ? Ma taʼarfu kadar humman yadurbuuku min al-durdur walla ? 21 Wa ma fakkartu zamaan yaatu al-katal Abiimalik wileed Yarbuuchat fi hillit Tiibis ? Ma mara bas zagalat foogah murhaaka min al-durdur wa katalatah. Wa be da, maala intu garrabtu le l-durdur ?› Wa kan al-malik hajja leek misil da, inta rudd leyah wa guul : ‹Khaddaamak Uriiya al-Hitti kula maat.›»
22 Wa l-mursaal macha. Wa wakit wassal bakaan Dawuud, kallamah be kulla cheyy al-Yuwaab kallafah beyah. 23 Wa gaal le Dawuud : «Bani Ammuun dool bigo chudaad minnina wa marago barra min al-hille wa hajamoona. Wa laakin aniina daawasnaahum lahaddi khachum baab al-hille. 24 Wa fi l-wakit da, siyaad al-nuchchaab zarrago fi askarak min foog le l-durdur. Wa waahidiin min askarak maato wa khaddaamak Uriiya al-Hitti kula maat.»
25 Wa Dawuud gaal le l-mursaal : «Amchi chajjiʼah le Yuwaab wa guul leyah ma yihimm fi l-cheyy da achaan fi l-harba, daayman fi moot min hini wa min hinaak kula. Khalli yihaaribhum be chidde wa yidammir al-hille di.»
26 Wa wakit Batchaabaʼ marit Uriiya simʼat be moot raajilha, hi hiznat le zoojha. 27 Wa baʼad wakt al-hizin kammal khalaas, Dawuud rassal jaabooha leyah wa hu khattaaha fi beetah. Wa hi bigat leyah martah wa wildat leyah wileed. Wa laakin Allah khidib le Dawuud be sabab al-cheyy al-hu sawwaah.
© Arabe tchadien (alphabet latin) Bible © Alliance Biblique du Tchad, 2019.
