Allah sallam leehum Oog wa baladah
1 Wa baʼad da, aniina wajjahna ale Baachaan. Wa laakin Oog malik Baachaan wa chaʼabah marago wa haaraboona fi Idraʼi. 2 Wa Allah gaal leyi ana Muusa : «Ma takhaaf achaan ana nisallimah leek fi iidak, hu wa chaʼabah wa baladah. Wa sawwi foogah misil sawweet fi Siihuun malik al-Amuuriyiin al-gaaʼid fi Hachbuun.»
3 Wa khalaas, Allah Ilaahna sallam leena fi iidna Oog malik Baachaan wa kulla chaʼabah. Wa aniina katalnaahum lahaddi waahid minhum kula ma faddal hayy. 4 Wa fi l-wakit da, chilna kulla mudunah wa ma fi madiina al-ma chilnaaha. Wa adad al-mudun dool 60 fi mantagat Arguub fi balad Baachaan al-haakim foogha Oog. 5 Wa kulla l-mudun dool, humman mudun gawiyiin wa induhum daraadir tuwaal wa biibaan wa hawaadir al-yisiddu beehum al-biibaan. Wa fi hillaal aakhariin kula katiiriin al-ma induhum daraadir. 6 Aniina chilna al-mudun dool wa dammarnaahum misil dammarna Siihuun malik Hachbuun. Wa katalna al-rujaal wa l-awiin wa l-iyaal hana l-mudun dool lahaddi waahid minhum kula ma faddal hayy. 7 Wa nahabna kulla l-bahaayim wa chilna khumaam al-mudun dool misil khaniime.
Muusa gassam ard Gilʼaad
8 Wa fi l-wakit daak, aniina chilna balad muluuk al-Amuuriyiin al-itneen dool yaʼni Oog wa Siihuun. Wa di l-ard al-gaaʼide sabaah le bahar al-Urdun min waadi Arnuun fi l-wati lahaddi jabal Harmuun fi l-munchaakh. 9 Wa jabal Harmuun da, naas balad Seeda sammooh Siryuun wa l-Amuuriyiin kula sammooh Saniir. 10 Wa aniina chilna kulla mudun al-sahale wa kulla turaab Gilʼaad wa kulla turaab Baachaan lahaddi mudun Salka wa Idraʼi. Wa dool mudun Baachaan al-hakam fooghum al-malik Oog. 11 Wa Oog malik Baachaan, hu aakhir waahid al-faddal min al-Rafaayiin. Wa sariirah hana hadiid gaaʼid fi Rabba aasimat Bani Ammuun. Wa tuul al-sariir da 9 duraaʼ wa urdah 4 duraaʼ.
12 Wa wakit aniina chilna al-balad di, ana anteet le gabiilat Raʼuubiin wa gabiilat Gaad al-ard min hillit Aruuʼir al-fi waadi Arnuun lahaddi nuss balad jibaal Gilʼaad wa mudunah. 13 Wa l-faddal min Gilʼaad wa kulla mamlakat Oog fi Baachaan, ana anteetah le nuss gabiilat Manassa. Wa da, kulla mantagat Arguub wa kulla Baachaan al-awwal binaaduuh balad al-Rafaayiin. 14 Wa zurriiyit Yayiir wileed Manassa chaalo kulla mantagat Arguub lahaddi turaab al-Gachuuriyiin wa l-Maʼaakiyiin. Wa sammo balad Baachaan be usum jidduhum Yayiir wa lahaddi l-yoom kula, binaaduuha Furgaan Yayiir. 15 Wa ana anteet al-nuss al-munchaakhi hana Gilʼaad le zurriiyit khachum beet Makiir wileed Manassa.
16 Wa le gabiilat Raʼuubiin wa gabiilat Gaad, ana anteethum nuss balad Gilʼaad lahaddi waadi Arnuun wa ust al-waadi da bigi huduudhum al-junuubiiye. Wa anteethum battaan lahaddi waadi Yabbuukh wa hu kula bigi huduudhum maʼa Bani Ammuun. 17 Wa l-huduud al-kharbaaniiye hana khachum beet Makiir wa gabiilat Raʼuubiin wa gabiilat Gaad, humman macho maʼa tuul waadi al-Urdun min bahar al-Jaliil fi l-munchaakh lahaddi l-bahar al-Mayyit fi l-wati. Wa minnah, al-huduud macho lahaddi gaʼar jabal al-Fisga fi l-sabaah.
18 Achaan fi l-wakit daak, ana amartuhum wa gult : «Allah Ilaahku antaaku al-balad di warasa. Wa intu al-rujaal al-fahaliin, chiilu silaahku wa agtaʼo bahar al-Urdun giddaam akhwaanku Bani Israaʼiil al-aakhariin. 19 Illa awiinku wa iyaalku wa maalku yagoodu fi l-hillaal al-ana anteethum leeku. Wa ana naʼarif kadar intu induku maal katiir. 20 Wa saaʼudu akhwaanku lahaddi Allah yantiihum al-raaha misilku. Wa wakit humman kula chaalo al-balad al-yantiiha leehum Allah Ilaahku warasa kharib le bahar al-Urdun, fi l-wakit da, intu tigabbulu wa tagoodu ayyi waahid fi ardah al-ana anteetha leyah.»
21 Wa fi l-wakit daak, ana anteet amur le Yachuuʼ wa gult leyah : «Inta chift be uyuunak kulla cheyy al-sawwaah Allah Ilaahku le l-muluuk al-itneen dool yaʼni Oog wa Siihuun. Wa hu yisawwi nafs al-cheyy fi kulla l-mamaalik al-tamchu leehum kharib le bahar al-Urdun. 22 Ma takhaafo minhum achaan Allah Ilaahku, hu zaatah yihaarib leeku.»
Muusa ma yadkhul balad Kanʼaan
23 Wa fi l-wakit daak, ana chahadt Allah wa gult : 24 «Ya Allah al-Rabb, inta badeet tiwassif le abdak azamatak wa iidak al-chadiide. Hal fi ilaah fi l-sama aw fi l-ard al-yagdar yisawwi misil amalak wa khidimtak al-chadiide walla ? 25 Ya Allah, nachhadak khalliini nagtaʼ kharib le bahar al-Urdun achaan nichiif al-balad al-adiile di wa l-jibaal al-samhiin wa Lubnaan.»
26 Wa laakin Allah khidib aleyi be sababku intu wa ma simiʼ suʼaali. Wa gaal leyi : «Khalaas, battaan ma tihajji leyi be l-kalaam da. 27 Atlaʼ fi raas jabal al-Fisga wa chiif munchaakh wa wati wa kharib wa sabaah. Wa chiif al-bakaan da adiil achaan inta ma tagtaʼ bahar al-Urdun da. 28 Anti amur le Yachuuʼ wa khalli yabga chadiid wa fahal achaan hu bas al-yagtaʼ bahar al-Urdun fi raas al-chaʼab da wa hu bas al-yantiihum warasa al-balad al-inta gaaʼid tichiifha.»
29 Wa min al-wakit da, aniina gaaʼidiin hini fi l-waadi mugaabiliin Beet Faʼuur.
© Arabe tchadien (alphabet latin) Bible © Alliance Biblique du Tchad, 2019.
