Ayyuub yihajji bala faayde
1 Wa battaan Aliihu chaal al-kalaam wa gaal :
2 Inta tahsib indak hagg wakit tuguul :
«Ana saalih ziyaada min al-Rabb.»
3 Achaan inta gult le l-Rabb :
«Da mufiid leek walla ?
Kan ma naznib da,
yanfaʼni be chunu ?»
4 Ana bas al-nurudd leek,
nurudd leek inta
wa le rufgaanak al-maʼaak.
5 Anzur al-sama wa chiifah adiil
wa chiif al-sahaab min foog leek !
6 Kan taznib da,
tudurr al-Rabb be chunu ?
Wa kan isyaanak yabga katiir kula,
tisawwi leyah chunu ?
7 Wa kan inta aadil, hu yistafiid chunu ?
Wa yalga minnak chunu ?
8 Achaan fasaaltak di tudurr naas mislak bas
wa adaaltak kula tanfaʼ insaan bas.
9 Al-naas yikooruku be sabab
katarat al-zaalimiin
wa yikooruku le l-fazaʼ
min iid al-gawiyiin.
10 Laakin ma fi naadum al-yuguul :
«Ween al-Rabb al-khalagaani,
hu al-ana ninaadiih be khine be l-leel ?
11 Ween hu al-antaana agul ziyaada
min bahaayim al-ard,
wa sawwaana hakiimiin
min tuyuur al-sama ?»
12 Khalaas, al-naas yikooruku
wa l-Rabb ma yurudd leehum
achaan istikbaar al-fasliin dool.
13 Akiid, al-Rabb ma yasmaʼ korooraakhum fi l-faadi,
wa l-Gaadir ma yijiib khabarhum.
14 Ya Ayyuub, kan ke da,
al-Rabb ma yasmaʼak
wakit tuguul inta ma gaaʼid tichiifah
wa muchkiltak gaaʼide giddaamah wa inta tarjaah.
15 Wa ziyaada min da, tuguul khadab al-Rabb ma yugumm
wa ma indah haaje be l-isyaan.
16 Ya Ayyuub, tihajji saakit
wa tikattir kalaamak bala faayde !
© Arabe tchadien (alphabet latin) Bible © Alliance Biblique du Tchad, 2019.
