1 Jawaab minni ana Buulus rasuul hana Isa al-Masiih be izin Allah. Wa hu jaʼalaani rasuul achaan niballikh al-haya al-abadiiye al-Allah waaʼadaana beeha wa antaaha be Isa al-Masiih. 2 Wa naktib leek inta, ya Timuutaawus, al-bigiit wileedi al-niriidak. Aleekum al-salaam wa l-niʼma wa l-rahma min Allah abuuna wa Isa al-Masiih Rabbina.
Chukur wa chajaaʼa
3 Fi chaanak inta, nachkur Allah al-naʼabudah misil juduudi abadooh be niiye mukhlisa wa nifakkir foogak daayman wakit nadʼi leel wa nahaar. 4 Nifakkir fi dumuuʼak wa nagram leek. Nidoor nichiifak battaan achaan ninmali be l-farha. 5 Ana gaaʼid nifakkir fi iimaanak al-mukhlis al-misil al-iimaan al-awwal chiftah fi jidditak Luwiisa wa ammak Yuunika wa hassaʼ akiid gaaʼid foogak inta.
6 Achaan da, nidoor nizakkirak battaan. Wakit ana daʼeet wa khatteet foogak iideeni, Allah antaak baraka wa hi misil jamur. Hajjijha achaan tabga battaan haamiye misil awwal. 7 Achaan Allah antaana al-Ruuh al-Khudduus al-hu ma yisawwiina khawwaafiin. Be l-aks, al-Ruuh al-Khudduus yantiina al-gudra wa l-mahabba wa l-agul al-saabit.
Al-taʼab fi chaan al-bichaara
8 Ma takhaaf wa ma takhjal. Bachchir al-naas be usum al-Rabb al-ana masjuun fi chaanah. Ma tidangir raasak be sabab sijni ana. Chaarikni fi l-taʼab fi chaan bichaarat al-Masiih wa Allah yantiik al-gudra. 9 Hu najjaana wa naadaana achaan nabgo naas khaassiin leyah. Wa da ma be sabab ayyi amal saalih al-aniina sawweenaah laakin be sabab niiytah wa rahmatah. Gubbaal al-dunya ma badat, hu indah niiye achaan yantiina al-niʼma di fi l-Masiih Isa. 10 Wa hassaʼ fi l-zaman al-haadir, hu bayyan rahmatah be jayyit al-naadum al-yinajjiina wa hu al-Masiih Isa. Al-Masiih battal gudrat al-moot wa fi bichaartah wassaf leena al-haya al-abadiiye. 11 Wa Allah azalaani wa sawwaani mubachchir wa rasuul wa muʼallim.
12 Wa achaan da bas, ana gaaʼid natʼab misil da. Laakin al-eeb abadan ma sawwaani achaan hu al-ana aamant beyah naʼarfah tamaam. Wa ana muʼakkid kadar hu gaadir wa yahfad al-amaana al-anteetha leyah lahaddi l-yoom al-akhiir.
13 Akrub gawi al-taʼliim al-adiil al-simiʼtah minni wa taabiʼah tamaam. Wa ankarib fi l-iimaan wa l-mahabba misil al-waajib fi derib al-Masiih Isa. 14 Kalaam al-hagg, hu amaana min Allah. Ahfadah be gudrat al-Ruuh al-Khudduus al-gaaʼid fi usutna.
15 Akiid, inta simiʼt kadar kulla l-akhwaan al-min balad Aasiya gataʼo maʼaayi al-alaakha wa l-akhwaan Figeel wa Harmuugiin kula minhum. 16 Khalli Rabbina yarham naas beet akhuuna Waani Sifirus achaan hu ja leyi fi l-sijin wa chajjaʼaani katiir. Janaaziiri abadan ma sawwo leyah eeb. 17 Be l-aks, wakit wisil fi Rooma hu fattachaani be niiye waahide lahaddi ligiini. 18 Wa nasʼal Rabbina le Waani Sifirus achaan yalga rahma min Allah fi l-yoom al-akhiir. Wa inta taʼarif hu saaʼadaani katiir wakit ana gaaʼid fi hillit Afasus kula.
© Arabe tchadien (alphabet latin) Bible © Alliance Biblique du Tchad, 2019.
