Wasaaya le l-iyaal wa waaldeenhum
1 Asmaʼo, ya l-iyaal, al-Rabb yidoor intu tasmaʼo kalaam waaldeenku. Da bas al-waajib tisawwuuh. 2 Maktuub fi l-Kitaab : <Karrim ammak wa abuuk.> Wa min al-wasaaya, di bas al-wasiiye al-awwal al-indaha waʼad. 3 Wa l-waʼad hu : <Achaan talga al-kheer wa umrak yabga tawiil fi l-ard.>
4 Asmaʼo, ya abbahaat al-iyaal, ma tizaʼʼulu iyaalku laakin rabbuuhum fi l-adab wa taʼliim al-Rabb.
Wasaaya le l-abiid wa siyaadhum
5 Asmaʼo, ya l-abiid, taabuʼu kalaam al-naas al-fi l-dunya di humman siyaadku. Aywa, karrumuuhum wa akhaafo minhum. Akhdumu leehum be niiye waahide misil intu gaaʼidiin takhdumu le l-Masiih. 6 Akhdumu leehum ma fi chaan humman gaaʼidiin yichiifuuku bas. Ma tukhuttu baalku fi chukur al-naas. Laakin khuttu fi fikirku intu abiid le l-Masiih wa sawwu al-yidoorah Allah be niiye mukhlisa. 7 Akhdumu leehum be farah misil khidmitku hi le Rabbina wa ma le l-naas bas. 8 Khalli taʼarfu kadar ayyi naadum minnina yalga ajur min al-Rabb ale hasab al-kheer al-hu sawwaah, kan hu abid walla hurr.
9 Asmaʼo, ya siyaad al-abiid, tabbugu nafs al-taʼliim. Wa ma tihaddudu abiidku. Ma tanso kadar intu wa abiidku kulluku abiid hana siid waahid. Wa hu al-gaaʼid fi l-samaawaat wa ma yichiif naadum akheer min naadum.
Silaah Allah al-kaamil
10 Wa aakhir cheyy, abgo gawiyiin fi alaakhitku maʼa l-Rabb wa be gudurtah al-aziime. 11 Albaso silaah Allah al-kaamil achaan tagoodu beyah saabtiin wa najaadit Ibliis ma tinnasir foogku. 12 Aniina ma nihaarubu adu min al-naas. Laakin fi l-zaman al-haadir da, al-dunya gaaʼide fi l-dalaam wa fiyah chawaatiin al-gaaʼidiin yamulkuuha. Wa aniina gaaʼidiin nihaarubu hukkaam wa kubaaraat al-chawaatiin dool, al-humman askar Ibliis al-gaaʼidiin fi l-samaawaat.
13 Achaan da bas, albaso silaah Allah al-kaamil achaan tagoodu saabtiin wakit Ibliis yahjimku. Wa baʼad kulla l-duwaas yikammil, tagoodu saabtiin battaan. 14 Achaan da, agoodu saabtiin, sulubku marbuut be l-hagg. Khalli al-haal al-saalhe tabga leeku direʼ gawi fi sadurku. 15 Abgo daayman chajiiʼiin le tiballukhu bichaarat al-salaam wa da yabga leeku misil niʼle adiiliin fi rijleeku. 16 Wa ziidu ale l-silaah da al-iimaan wa khalli yabga leeku daraga. Ibliis al-chariir yidoor yizarrigku be nachaachiibah al-induhum fi raashum naar wa be l-iimaan taktulu al-niiraan dool. 17 Wa khalli al-naja tabga leeku taagiiye hint harib. Wa akurbu gawi kalaam Allah al-hu misil seef hana l-Ruuh al-Khudduus.
18 Wa khallu al-Ruuh al-Khudduus yuguudku fi salaawaatku wa asʼalo Allah fi kulla wakit be kulla anwaaʼ hana duʼa wa talab. Wa misil da, agoodu waaʼiyiin wa ankarbu fi salaawaatku wa asʼalo Allah le kulla l-saalihiin.
19 Wa asʼalo Allah leyi ana zaati achaan fi ayyi wakit al-nidoor nihajji be kalaam Allah, khalli hu yantiini al-kalaam al-waajib leyi. Nidoor nihajji bala khoof wa nifassir le l-naas sirr Allah al-bayyanah fi bichaarat al-Masiih. 20 Wa fi chaan al-bichaara, ana bigiit safiir wa be sababha karabooni fi l-sijin. Khalli Allah yantiini gudra achaan niballikhha bala khoof wa nikallim misil waajib.
Nihaayat al-jawaab
21 Wa khalaas, akhuuna Tichiikus yiʼooriiku be kulla khabari. Hu akhuuna al-nihibbuuh wa yakhdim le Rabbina be amaan. 22 Wa hu yikhabbirku be haalitna wa yichajjiʼku wa be sabab da bas, rassaltah leeku. 23 Wa khalli kulla l-akhwaan yalgo al-salaam wa l-mahabba maʼa l-iimaan min Allah abuuna wa Rabbina Isa al-Masiih. 24 Wa l-niʼma le kulla l-naas al-yihibbu Rabbina Isa al-Masiih be l-mahabba al-ma tikammil abadan.
© Arabe tchadien (alphabet latin) Bible © Alliance Biblique du Tchad, 2019.
