Al-haal al-waajbe
1 Zakkir al-akhwaan achaan yasmaʼo kalaam al-hakuuma wa l-kubaaraat wa yitaabuʼu kalaamhum. Wa khalli yabgo jaahiziin le yisawwu al-kheer fi kulli haal. 2 Wa khalli ma yuguulu kalaam fasil fi ayyi naadum wa la yihaaruju. Wa khalli yihajju be nafas baarid wa be adab maʼa kulla l-naas.
3 Khalli ma nanso kadar awwal aniina kula misilhum, juhhaal wa aasiyiin. Awwal aniina muwaddiriin wa chahwaatna malakoona wa guluubna marbuutiin fi halaat al-dunya. Awwal aniina aaychiin be l-fasaala wa l-husud, wa gaaʼidiin nakraho al-naas wa l-naas yakrahoona. 4 Wa laakin wakit Allah munajjiina bayyan mahannitah wa mahabbitah le l-insaan, 5 hu najjaana. Wa da ma be sabab ayyi amal saalih al-sawweenaah laakin be sabab rahmatah hu. Wa hu khassalaana be l-waaluuda al-taaniye wa antaana haya jadiide be l-Ruuh al-Khudduus 6 al-hu nazzalah foogna be kulla barakaatah be waasitat munajjiina Isa al-Masiih. 7 Wa misil da, bigiina saalihiin be niʼmatah wa aniina achmaaniin foog Rabbina kadar nawrusu al-haya al-abadiiye.
8 Wa l-kalaam da hagg. Wa nidoor kadar inta tifassir leehum kulla l-kalaam da achaan al-naas al-aamano be Allah yinkarbu be niiye waahide fi amal al-kheer. Kulla l-kalaam da sameh bilheen wa indah faayde le kulla l-naas.
9 Laakin angariʼ min al-munaakhachaat al-ma induhum faayde misil munaakhachaat fi l-guram wa l-mukhaasama wa l-mukhaalata fi tafsiir al-Tawraat. Kalaam misil da baatil wa ma indah faayde abadan. 10 Wa ayyi naadum al-yihajji kalaam chig wa yifarrig beyah al-akhwaan, hazzirah marra waahide wa hazzirah marra taaniye wa baʼad da, agtaʼ maʼaayah al-alaakha. 11 Akiid ayyi naadum al-misil da, hu muwaddir wa khaati. Hu yijiib al-ikhaab fi raasah.
Nihaayat al-jawaab
12 Nidoor nirassil leek Artimaas walla Tichiikus. Wa wakit waahid minhum yawsalak, aʼasir nafsak achaan taji leyi fi hillit Nikuubulus. Ana chilt niiye nagood foogha tuul al-chite. 13 Wa fi l-cheyy al-bukhuss akhwaanna Zeenaas al-muhaami wa Abuluus, aʼasir nafsak achaan tisaaʼidhum fi safarhum wa khalli cheyy ma yigassir leehum fi l-derib. 14 Wa khalli kulla akhwaanna yaʼarfu kikkeef yinkarbu fi amal al-kheer achaan yisaaʼudu al-naas al-hawjaaniin be l-sahiih. Wa misil da akhwaanna ma yabgo naas al-hayaathum ma indaha faayde.
15 Kulla l-naas al-maʼaayi yisallumuuk. Wa sallim kulla l-muʼminiin al-yihibbuuna.
Aleekum kulluku al-niʼma.
© Arabe tchadien (alphabet latin) Bible © Alliance Biblique du Tchad, 2019.
