Allah yijiib chaʼabah fi l-mahkama
1 Asmaʼo al-kalaam al-yuguulah leyi Allah :
«Gumm sawwi chariiʼa giddaam al-hujaar
wa khalli al-jibaal yasmaʼo hissak.
2 Ya l-jibaal ! Asmaʼo chakwat Allah !
Intu ya asaas al-ard al-gawi,
khuttu baalku !
Allah yijiib chaʼabah fi l-chariiʼa
wa yuluum Bani Israaʼiil.»
3 Wa Allah gaal :
«Ana sawweet leeku chunu, ya chaʼabi ?
Wa kikkeef ana ayyeetku ?
Ruddu leyi !
4 Wa da achaan ana maragtuku
min balad Masir walla ?
Achaan fadeetku
min al-ubuudiiye walla ?
Achaan rassalt Muusa wa Haaruun wa Mariyam
le yuguuduuku walla ?
5 Ya chaʼabi ! Azzakkaro muʼaamarat Balaakh malik Muwaab didduku
wa kikkeef Balʼaam wileed Baʼuur radda leyah
wa gaal nisawwi leeku illa l-kheer.
Azzakkaro kikkeef gammeetu
min Chittiim sabaah bahar al-Urdun
wa wassaltu fi arduku fi Gilgaal.
Wa be da, taʼarfu adaalit Allah.»
Al-cheyy al-yigarrib le Allah
6 Be chunu nigarrib le Allah ?
Be chunu nigarrib le l-Ilaah al-Aali ?
Hal nigarrib leyah be ajjaal awlaad sana
al-nigaddimhum dahaaya muharragiin walla ?
7 Hal Allah yakhbal dahaaya
hana aalaaf al-kubchaan ?
Walla yakhbal hadaaya
hana dihin katiir misil almi al-waadi ?
Hal nigaddim wileedi al-bikir
fi chaan isyaani ?
Walla nigaddim wileed sulbi
fi chaan zanbi ?
8 Ya Bani Adam, Allah khabbarak
be l-cheyy al-adiil
wa be l-cheyy al-hu yidoorah minnak.
Sawwi al-adaala wa hibb al-kheer
wa maskin nafsak
wa amchi adiil giddaam Ilaahak.
Allah yiʼaakhib Madiinat al-Khudus
9 Daahu Allah gaaʼid yinaadi sukkaan al-madiina
wa yinajji al-yakhaafo minnah :
«Asmaʼo, ya naas gabiilat Yahuuza
al-lammiin fi l-madiina.
10 Fi maal hawaan gaaʼid fi beet al-aasi.
Naas yistaʼmalo mikyaal makhchuuch al-yikhaddibni.
Hal nikhassid be l-haraam da walla ?
11 Hal nibarri siid al-miizaan al-ma adiil ?
Walla nibarri al-naadum al-yikiil
be kooro hana khachch ?
12 Fi l-madiina, fiyah naas khaniyiin
malaaniin be l-unuf.
Wa sukkaanha yihajju be l-kidib
wa lisaanhum yikallim be l-khachch.
13 Wa fi chaan da, ana darabtuku be marad
wa kharrabtuku be sabab zunuubku.
14 Intu taakulu wa ma tachbaʼo
wa l-juuʼ yaskun fi butuunku.
Intu takhzunu
wa ma tagdaro tahfadooh adiil.
Wa l-hafadtuuh kula,
ana nisallimah le l-harib.
15 Intu tazraʼo
wa ma tagtaʼo.
Wa tarhako al-zaytuun
wa ma tilmassaho be dihnah.
Wa tarhako al-inab
wa ma tacharbo min khamarah.
16 Wa intu titaabuʼu al-aade al-fasle hana l-malik Umri
wa l-amal al-hawaan hana aayilat malik Akhaab
wa turuukhu hasab khittithum.
Wa fi chaan da, ana nisallim madiinitku le l-kharaab
wa sukkaanha yabgo chimmeete
wa yiʼayyubuuku misil yiʼayyubu kulla chaʼabi.»
© Arabe tchadien (alphabet latin) Bible © Alliance Biblique du Tchad, 2019.
